تاكەي ەسەت ۇلىنىڭ ءومىر جولى مەن قىزمەتىنە ارنالعان عىلىمي-تانىمدىق كونفەرەنتسيا وبلىس اكىمدىگىندە ءوتتى. وعان زيالى قاۋىم وكىلدەرى, مەملەكەت جانە قوعام قايراتكەرلەرى, ەل اعالارى, تاكەي ەسەت ۇلىنىڭ ۇرپاقتارى, تۋعان-تۋىستارى مەن ۇزەڭگىلەس ىنىلەرى قاتىستى.
مەملەكەت جانە قوعام قايراتكەرلەرى قۇدايبەرگەن سارجانوۆ, ابدىجالەل باكىر, قورقىت اتا اتىنداعى قىزىلوردا ۋنيۆەرسيتەتىنىڭ پروفەسسورى جەڭىس سادۋاقاس ۇلى, تاكەي ەسەت ۇلىنىڭ بالاسى ادىلبەك ەسەتوۆ ءسوز الىپ, قايراتكەر تۋرالى ەستەلىكتەرىمەن ءبولىستى.
سونداي-اق, كونفەرەنتسيادا پارلامەنت سەناتىنىڭ دەپۋتاتتارى اقمارال ءالنازاروۆانىڭ, رۋسلان رۇستەموۆتىڭ جانە پارلامەنت ءماجىلىسىنىڭ دەپۋتاتتارى مارحابات جايىمبەتوۆتىڭ, مۇرات ەرگەشباەۆتىڭ ارنايى قۇتتىقتاۋ حاتى وقىلدى.
ەسكە سالا كەتەيىك, تاكەي ەسەتوۆ 1923 جىلى قازالى اۋدانىندا دۇنيەگە كەلگەن.
جيىندا ايتىلعانداي, ول الماتىداعى 6 ايلىق اۆياتسيالىق كۋرستى ءبىتىرىپ, مايدانعا اتتانعان. 1943 جىلى اۋىر جاراقات العان سوڭ, ەلگە ورالادى. سوعىستان كەيىن, ارال اۋداندىق سوتىندا, مەملەكەتتىك قاۋىپسىزدىك كوميتەتىندە, قارجى بولىمىندە قىزمەت ەتكەن.
1957-1985 جىلدارى ارال اۋداندىق پارتيا كوميتەتىنىڭ ەكىنشى حاتشىسى, قىزىلوردا وبلىسى پارتيا كوميتەتىنىڭ ءبولىم مەڭگەرۋشىسى, ارال اۋداندىق پارتيا كوميتەتىنىڭ ءبىرىنشى حاتشىسى, وبلىستىق پارتيا كوميتەتىنىڭ ءبىرىنشى حاتشىسى قىزمەتتەرىن ابىرويمەن اتقارادى.
تاكەي ەسەت ۇلى 1978 جىلدان 1985 جىلدار ارالىعىندا قىزىلوردا ءوڭىرىن باسقارعان كەزەڭدە وبلىس ورتالىعىندا دراما تەاتر, مۋزەي, اۋەجاي, باسقا دا الەۋمەتتىك نىساندار: وكپە اۋرۋلارى اۋرۋحاناسى, ەمحانالار, مەكتەپتەر, بالاباقشالار جانە باسقا قۇرىلىس نىساندارىنىڭ قۇرىلىسى سول كەزەڭدەردە قاتار جۇرگىزىلىپ, ەل يگىلىگىنە پايدالانۋعا بەرىلدى. ودان وزگە «قىزىلورداريسماش» زاۋىتى, «شالقيا» كەنىشى سەكىلدى كوپتەگەن ءوندىرىس ورىندارىنىڭ جۇمىسى جاندانا ءتۇستى. «قۇمكول» مۇنايى قورىن زەرتتەپ تابۋ, العاشقى مۇناي ءوندىرۋ ءىسى ونىڭ تىكەلەي قولداۋىمەن, ۇيىمداستىرۋىمەن باستالعان-دى.
«سىر بويىنىڭ قاي كەزدە دە ەكونوميكالىق تابىسى نەگىزىنەن اۋىل شارۋاشىلىعىنا تىكەلەي بايلانىستى ەكەنى بارشاعا ايان. سول جىلدارى ايماق اۋىل شارۋاشىلىعىندا ايتارلىقتاي ىلگەرى باسۋشىلىق بولىپ, تابىس تابىسقا ۇلاستى. وبلىس ديقاندارى 1978 جىلى مەملەكەتكە 17 ميلليون پۇت سىر سالىسىن تاپسىردى. وسىدان التى جىل وتكەندە كورسەتكىش 24 ميلليونعا جەتكەنىن ءبىرىنشى باسشىنىڭ ۇيىمداستىرۋشىلىق ۇتىرلى قابىلەتى مەن بىلىكتىلىگىنىڭ جەمىسى دەپ بىلگەن ءجون بولار. سول تۇستارى وبلىستىڭ جەتى اۋدانىندا مال باسىن امان ساقتاۋ, الىنعان ءتولدى شىعىنسىز ءوسىرۋ شارالارى قاتار جۇرگىزىلەتىن. وبلىس بويىنشا تولدەگەن قويدىڭ ءار جۇزىنەن ورتا ەسەپپەن 110-115-تەن قوزى الىندى. سونداي-اق باسقا دا تۇلىك تۇرلەرىنەن الىناتىن ونىمدەر جىل ساناپ مولايا تۇسكەنىن سول جىلدارداعى كورسەتكىشتەردەن ايقىن اڭعارىلادى», دەپ جازادى قالامگەر تولىباي ابىلاەۆ.
تاكەي ەسەت ۇلى ارال اۋدانىنا باسشىلىق جاساعان جىلدارى ءۇش رەت قاتارىنان قازاق كسر جوعارى كەڭەسىنىڭ VII, VIII, IX شاقىرىلىمىنا, كسرو جوعارى كەڭەسىنىڭ جوعارى پالاتاسى – ۇلتتار كەڭەسىنىڭ X, XI شاقىرىلىمىنا ەكى مارتە دەپۋتات بولىپ سايلاندى. ول ۇلتتار كەڭەسىندە وداق بويىنشا قۇرىلىس جانە قۇرىلىس ماتەريالدارى ءوندىرىسى ماسەلەلەرى بويىنشا كوميسسيانىڭ, ال قازاق كسر جوعارى كەڭەسىندە رەسپۋبليكالىق بيۋدجەتتى جوسپارلاۋ كوميسسياسىنىڭ مۇشەسى بولدى. ول مەملەكەتتىك دەڭگەيدەگى كوپتەگەن وردەن-مەدالمەن ماراپاتتالعان.
