الدىمىزدا جاتقان ارنايى كيىمدى بار-جوعى 19 سەكۋند ىشىندە كيىپ, شارتتى تۇردە ءورت بولعان ورىنعا شىعىپ كەتۋىمىز كەرەك ەكەن. ءار سەكۋند – ءورتتىڭ ءورشۋى, ءار سەكۋند – بىرەۋدىڭ ءومىرى. سوندىقتان بارىنشا شيراق قيمىلداۋعا تىرىستىق. قوربيىپ جاتقان برەزەنت كيىمدى ءاپ-ساتتە كيىپ العانىمىزبەن, تاناۋعا ماسكانى, باسقا كاسكانى كيە الماي توسىلدىق. ارقامىزعا اۋا تولى تەمىر باللوندى ارتقاندا قىزدار جاعى تالتىرەكتەپ قالعان. سوندا دا قىزىل جالىننىڭ اراسىنان جۇگىرىپ ءوتىپ, توننەل ىسپەتتى تار قۇبىرمەن تومەن قۇلديلادى. بۇل كەزەڭنەن ءساتتى وتكەندەرى نىساناعا دالدەپ سۋ شاشتى. قىسىمدى كۇشەيتكەن سايىن قولداعى شلانگانى ۇستاپ تۇرۋ دا بالەندەي وڭاي شارۋا ەمەس ەكەنىنە كوز جەتتى. بۇدان سوڭ ءورت شىققان التىنشى قاباتقا تەرەزەدەن كىرۋىمىز كەرەك بولدى. بۇيرىق – سولاي. ءبىز جۇگىرىپ جەتكەنشە, تەرەزەگە قاراي ارنايى تەحنيكادان باسپالداق سوزىلدى. ءبىر-بىرلەپ ورلەي جونەلدىك. ارقاداعى 6 كگ باللوننىڭ سالماعى تىپتەن اۋىر تارتا باستاعان سەكىلدى. باسپالداقتىڭ باسىنا تاياعاندا قوس وكپە ەنتىگىپ, تىنىس الۋ اۋىرلاعان. اياقتاعى رەزەڭكە ەتىكتىڭ دە سالماعى سەزىلدى. كەيبىر ارىپتەستەر بيىگىنە جەتە بەرە باسى اينالىپ, باسپالداققا جابىسا جاتا قالىسقان. ونىنشى, ون ءتورتىنشى قاباتتارعا وسىلاي كوتەرىلسەك قايتەر ەدىك؟ ءوزىڭدى كوتەرىپ شىققانىڭ بىلاي تۇرسىن, تۇتىنگە تۇنشىققان تۇرعىنداردى ارقالاپ ءتۇسۋىڭ كەرەك بولسا شە؟ قۇتقارۋشىلاردىڭ, ءورت سوندىرۋشىلەردىڭ قىزمەتتەرى وڭاي ەمەس, بىلەمىز. بىراق بۇل جولى سونى سەزىندىك. كوز اشتىرمايتىن قارا ءتۇتىننىڭ اراسىمەن دە ءجۇرىپ كوردىك.
قىزمەتتە جانىن شۇبەرەككە ءتۇيىپ جۇرەتىن ءورت سوندىرۋشىلەردىڭ قاي-قايسىسىن ايتساق تا, باتىر دەر ەدىك. جازعا سالىم سەمەي ورمانى وتقا ورانعاندا ءورت سوندىرۋشىلەر ءدال وسىلاي اساي-مۇسەيلەرىن اسىنىپ, ايعا جۋىق ورتپەن ارپالىسقانىن كوردىك قوي. ونىڭ الدىندا باتىس التايدى ءتىلسىز جاۋ شارپىپ, اپتالاپ سوندىرگەن. ءورت سوندىرۋشىلەردىڭ ءومىر مەن ءولىم اراسىندا جۇرەتىنىن ۇكىمەت ەسكەرىپ, جالاقىلارىن كوتەرىپتى. سوعان قۋاندىق. قازىر ءورت ءسوندىرۋ بولىمىنە ءا دەپ جۇمىسقا ورنالاسقان ازامات قولىنا 180 مىڭ تەڭگەنىڭ كولەمىندە جالاقى الادى. بۇرىن 70-80 مىڭ تەڭگەنىڭ توڭىرەگىندە عانا ەدى. بىرتىندەپ تەحنيكالارى دا جاڭارىپ جاتقان كورىنەدى.
شارتتى قويىلعان ءورت ءسوندىرىلىپ, ءتۇتىن تۇنعان عيماراتتان تىسقا شىققانىمىز سول ەدى, جاپا-تارماعاي جارىسا جەتكەن «جۋرناليستەر» جان-جاقتان سۋرەتكە ءتۇسىرىپ, نەگە كەشىكتىڭىزدەر دەگەن سەكىلدى سۇراقتاردى قارشا بوراتتى.
– ۇزاق كيىندىك. كيىنە سالا ءورت شىققان جەرگە جۇگىرەيىك دەسەك, ارتىپ العان باللون اۋىر. قيمىلداي الماي قالدىق. قىسقاسى, ءورت سوندىرۋشىلەردىڭ جۇمىسىن ءبىر ءسات سەزىنىپ كوردىك. ەڭبەكتەرىڭىز ەرەن. سىزدەردى شىعىستاعى باق وكىلدەرى اتىنان كاسىبي مەرەكەلەرىڭىزبەن قۇتتىقتايمىز! – دەپ جىلى لەبىزىن ءبىلدىردى سايت ءتىلشىسى انەل ابزالبەكوۆا.
ەندىگى جۇمىس ءۇيىندىنىڭ استىندا قالعان ادامدى قۇتقارۋ ەدى. قولىمىزدا – 20 توننادان اسا اۋىرلىقتى كوتەرەتىن قۇرىلعى. جالپاعىنان جاتقان بەتوندى وپ-وڭاي كوتەرە سالدى. قيىنعا سوققانى – ءۇيىندىنىڭ اراسىنان 60-70 كگ تارتاتىن مۋلياجدى الىپ شىعۋ ەدى. الۋى الىپ شىعىپ, ءبىرىنشى مەديتسينالىق كومەك كورسەتۋدى دە ۇيرەندىك. جالپى, العاشقى مەديتسينالىق جاردەمدى ءار ازامات كورسەتە بىلۋگە ءتيىس.
– قىزىقتى شارا ءوتتى. جۋرناليستەر ەش دايىندىقسىز كەلىپ, شارتتى قويىلعان ءورتتى سوندىرۋگە كىرىستى. كورسەتكىشتەرى جامان ەمەس. ءبىز دە تىلشىلىك قىزمەتتىڭ قىر-سىرىن تۇسىندىك. جەدەل ءارى ناقتى اقپارات تاراتۋعا تىرىستىق, – دەدى شقو تجد باستىعىنىڭ ورىنباسارى ارمان توقانوۆ.
شىعىس قازاقستان وبلىسى
