فوتو: akorda.kz
قاسىم-جومارت توقاەۆ قازاقستان مەن ماجارستاننىڭ تاريحي تامىرلاستىعى جانە تىعىز بايلانىستارى بۇگىندە ەكى ەل اراسىنداعى ىنتىماقتاستىقتىڭ تەرەڭدەي تۇسۋىنە نەگىز ەكەنىن ايتتى.
«قازاق پەن ماجار – ەجەلدەن سىيلاستىعى جاراسقان تۋىستاس, دوستاس حالىقتار. ەكى ەلدىڭ ءتىلى, سالت-ءداستۇرى مەن مادەنيەتى ۇقساس. ورتا عاسىرلاردا تورعاي دالاسىنان ەۋروپاعا قونىس اۋدارعان قىپشاق تايپالارىنىڭ ۇرپاقتارى بۇگىندە ماجارستان اۋماعىندا ءومىر ءسۇرىپ جاتىر. ءبىز مۇنى ماقتان تۇتامىز. بىرلەسكەن كۇش-جىگەرىمىزدىڭ ارقاسىندا قازاق-ماجار ىقپالداستىعى بارلىق سالادا قارقىندى دامىپ كەلەدى. بۇعان, قۇرمەتتى پرەمەر-مينيستر مىرزا, ءسىز ولشەۋسىز ۇلەس قوسىپ كەلەسىز. ءبىز باۋىرلاستىعىمىزدى, ءوزارا ءتيىمدى قارىم-قاتىناستى ودان ءارى تەرەڭدەتۋگە مۇددەلىمىز. بۇگىنگى كەلىسسوزدەر ەكىجاقتى ستراتەگيالىق سەرىكتەستىكتى ودان ءارى دامىتۋعا تىڭ سەرپىن بەرەدى دەپ سەنەمىن», دەدى ق.توقاەۆ.
پرەزيدەنت قازاقستان مەن ماجارستان اراسىندا ەكىجاقتى ىنتىماقتاستىقتى ودان ءارى دامىتۋ ءۇشىن جاقسى ينستيتۋتسيونالدى نەگىز دە جوق ەمەستىگىن ايتتى. ەكونوميكالىق ىنتىماقتاستىق جونىندەگى ۇكىمەتارالىق كوميسسيا مەن ىسكەرلىك كەڭەس ەكى ەلدىڭ ساۋدا قاتىناستارىن دامىتۋدا بەلسەندى ءرول اتقارۋى كەرەك ەكەنىن ەسكەرتتى.
«گەوساياسي شيەلەنىستەرگە قاراماستان, بىلتىر تاۋار اينالىمى 20 پايىزدان استام ءوستى. تاياۋ بولاشاقتا بۇل كورسەتكىشتى 1 ميلليارد دوللارعا دەيىن جەتكىزۋگە تولىق مۇمكىندىگىمىز بار ەكەنىنە سەنىمدىمىن», دەدى پرەزيدەنت.
كەزدەسۋ بارىسىندا تاراپتار ەنەرگەتيكا, كولىك, لوگيستيكا, مەتاللۋرگيا, وڭدەۋ ونەركاسىبى, اۋىل شارۋاشىلىعى, فارماتسەۆتيكا, تاماق ونەركاسىبى جانە تۋريزم سياقتى سالالارداعى بايلانىستاردى دامىتۋعا ءوزارا مۇددەلى ەكەنىن ءبىلدىردى. سونىمەن قاتار كەلىسسوز بارىسىندا ەكى ەلدىڭ زاڭ شىعارۋشى ورگاندارىندا جۇمىس ىستەيتىن دوستىق توپتارى ارقىلى پارلامەنتارالىق بايلانىستى نىعايتۋدىڭ ماڭىزدىلىعى ايتىلدى. سونداي-اق بۇۇ, ەقىۇ, تمۇ جانە ءتۇرلى حالىقارالىق پلاتفورمالار اياسىنداعى ءوزارا ىقپالداستىق پەرسپەكتيۆالارى قاراستىرىلدى.
بۇدان بولەك, مەملەكەت باسشىسى ەكى ەلدىڭ گۋمانيتارلىق بايلانىستارىن نىعايتۋ ماسەلەسىنە دە توقتالدى. بۇگىن استانا كوشەلەرىنىڭ بىرىنە ماجار ۇلتىنىڭ كورنەكتى اقىنى شاندور پەتەفيدىڭ ەسىمى بەرىلەدى. بۇل – قازاقستان مەن ماجارستان اراسىنداعى تىعىز دوستىق قاتىناستاردىڭ تاعى ءبىر ايقىن دالەلى.
ۆيكتور وربان دا ءسوز الىپ, قۇرمەتپەن قارسى العانى ءۇشىن قاسىم-جومارت توقاەۆقا جانە باۋىرلاس قازاقستان حالقىنا العىس ايتتى.
ء«بىز قازاقستانعا ارقاشان ەرەكشە قۋانىشپەن كەلەمىز. ءبىز مۇندا سوڭعى رەت پاندەمياعا دەيىن بولعان ەدىك. سول كەزدىڭ وزىندە ەكىجاقتى قارىم-قاتىناسىمىز وتە تابىستى دامىدى. بىراق كوروناۆيرۋس بارلىق بايلانىستارىمىزدىڭ قارقىنىن تەجەدى. ءبىز بۇگىن ءوزارا ىقپالداستىعىمىزعا تىڭ سەرپىن بەرۋ ءۇشىن كەلدىك. ورتا ازيا ايماعىندا ءبىزدى قازاقستانمەن عاسىرلار بويعى تاريحىمىز بايلانىستىرادى. سوندىقتان سىزدەردىڭ ءاربىر جەتىستىكتەرىڭىزگە قۋانامىز. قازاقستان – تابىستى دامىپ كەلە جاتقان عاجاپ ەل. مەن ارقاشان قازاقستاننان ۇلكەن اسەرمەن قايتامىن», دەدى ۆ.وربەن.
كەلىسسوز قورىتىندىسى بويىنشا ءبىلىم سالاسىنداعى ءوزارا تۇسىنىستىك تۋرالى مەموراندۋمعا قول قويىلدى.
