شۇبات ىشەمىز دەپ ايالدايتىن قوناقتاردا دامىل جوق. ءبىرى كەلىپ, ءبىرى كەتىپ جاتىر. دەنساۋلىققا پايداسىن بىلگەن سوڭ-داعى سۇرانىس كوپ شىعار. ايتەۋىر, وتباسىلىق كاسىپتىڭ باسى-قاسىندا جۇرگەن ايمەن ايدارحانقىزى كەلىمدى-كەتىمدى مەيماندارعا كەسەسىن الا جۇگىرىپ, قوناقجايلىق تانىتادى. كەيبىرەۋ ەم ءۇشىن دەپ جۇيەلى تۇردە كەلىپ ىشەدى. قۇتىعا قۇيىپ, ساتىپ الىپ كەتىپ جاتقانى قانشاما!
پايداسى قىمىزدان ەش كەم ەمەس شۇبات تاۋلىك ىشىندە بابىنا كەلەدى. سودان سوڭ عانا ساپىرىپ, كوپىرشىتىپ بارىپ ىشەر ەدىڭىز. ءدامى ءتىل ۇيىرەدى.
– شۇباتقا عانا ەمەس, تۇيەنىڭ ەتىنە دە سۇرانىس بار. بالانىڭ بۋىنى قاتپاي جاتسا, اياق-قول قاقساسا, ەتى تاپتىرماس ەم ەكەن. قىلاياعى, تۇيە سويعاندا اياعىنا دەيىن سۇراپ كەلەتىندەر بار, – دەيدى ايمەن ايدارحانقىزى ويۋلى كەسەگە شۇبات قۇيىپ جاتىپ.
ساۋىن ۋاقىتى تاياپ قالسا كەرەك, وقتىن-وقتىن كيىز ءۇيدىڭ ەسىگىنە مويىن سوزا قاراپ قويادى. ءبىر ۋاقىتتا ادام بويى بىتىك وسكەن ءشيدىڭ اراسىنان جەلدىرتىپ كەلە جاتقان تۇيەلەر كورىنگەن. بوتا-تايلاعىن قوسقاندا, قىرىق شاقتىسىن باعىپ وتىر ەكەن. قويعا قاراعاندا اۋرەسى از دەيدى. بوتالايتىن ۋاقىتتا عانا كۇن-ءتۇنى كۇزەتىپ, كۇتىمىن جاسايدى. ايتپەسە, كوبىنەسە جايىلىمدا جۇرەدى. قىس ماۋسىمىنا دەپ جوڭىشقاسىن ءتۇسىرىپ, بوتالارىنا جەم ازىرلەيدى.
– تۇيە ساۋعا ابدەن ماشىقتانىپ الدىق. ءبارى جۋاس. وسى ماڭايدا جايىلىپ جۇرە بەرەدى. ساۋىن كەزى ايداپ الىپ كەلەمىز. تۇنگە قاراي قامايمىز. ءوزىمىز كۇننىڭ جىلى كەزىندە كيىز ۇيدە قونىپ جاتا بەرەتىنبىز. قازىر اۋىلعا بارىپ, تاڭەرتەڭ ەرتە قايتا كەلەمىز, – دەيدى شارۋاشىلىق جەتەكشىسى ماناربەك قۇرمەت ۇلى.
ماڭ-ماڭ باسقان ويسىلقارا تۇقىمى ماڭايىنا ماڭعازدانا قاراي كەلىپ, كەڭ قورشاۋدىڭ كىرەبەرىسىندەگى ۇيرەنشىكتى ورىندارىنا توقتادى. ايمەن مەن ماناربەك قوس بۇيىرلەرىنە تۇرا قالىسىپ, بىرنەشە تۇيەنى لەزدە ساۋىپ الا قويدى. قازىر ءتورت ۋاقىت ساۋسا, قىستىڭ كۇنى ەكى-اق رەت ساۋادى. راس, اكەتىپ بارا جاتقانداي اۋرەسى جوق سياقتى. ءتىپتى ساۋىن كەزىندە كوزدەرى جاۋدىرەگەن بوتاسىن دا بايلامايدى ەكەن. ءوز بەتتەرىمەن ەنەسىنە ەركەلەپ تۇرا بەرەدى.
زايساننىڭ ىرگەسىندە كاسىپتەرىن دوڭگەلەتىپ, حالىقتىڭ سۇرانىسىن اقتاپ, ەڭبەكپەن بىتە قايناسىپ وتىرعان بۇل وتباسى قىتايدىڭ جەمەنەي اۋدانىنان كوشىپ كەلگەن. ءبىر جاعىنان تۇيە باعۋدى بالا كۇندەرىنەن كورىپ وسكەندىكتەن شىعار, كۇتىپ-باپتاۋدىڭ ەبى مەن ەسەبىن بىلەدى. اۋەلدە سيىر اسىراۋدى ءجون كورىپ, مەملەكەتتىڭ 2 ملن تەڭگە ءتيىمدى نەسيەسىن الىپتى. الايدا, باسقا مالدان گورى تۇيەنىڭ پايداسى كول-كوسىر دەگەن بايلامعا كەلگەن. سويسا ەت, مىنسە, كولىك. «قۋىرداقتىڭ كوكەسىن تۇيە سويعاندا كورەسىڭ» دەگەندەي, ەت تە مول تۇسەدى. الدىنا تاستايتىن جەم-ءشوبى سيىر مەن جىلقىدان ارتىق ەمەس شىعار. كورگەنىمىزدەي, ماناربەك پەن ايمەن اتاكاسىپتى مىقتاپ قولعا العان, جولعا قويعان. سونىڭ ارقاسىندا بالا-شاعاسىن اسىراپ وتىر.
ايتۋلارىنا قاراساق, اتاكاسىپ ەرتەڭگى كۇنى تۋريستەردىڭ دە نازارىن اۋدارادى. ونىڭ ۇستىنە, شۇبات اۋىلى ومبى – مايقاپشاعاي كۇرە جولىنىڭ بويىندا تۇر. سوڭعى كەزدەرى ساياحات قۇرىپ, ەلىمىزگە اعىلىپ جۇرگەن قىتاي ازاماتتارى شەكارادان وتە سالعان بەتتە الدارىنان قازاقتىڭ اقشاڭقان كيىز ءۇيى كەزدەسىپ, شۇبات ۇسىنسا, قوناقجايلىعىمىزدى كورسەتكەنىمىز ەمەس پە! ەڭ باستىسى, ءار توقتاعان تۋريست تابىس اكەلەدى. ءسويتىپ, زايساننىڭ تۋريستىك ەكونوميكالىق الەۋەتى دە ارتا تۇسەر مە ەدى؟
شىعىس قازاقستان وبلىسى,
زايسان اۋدانى
