فوتو: ا.بايجۇمانوۆ
«ينكليۋزيا جونىندەگى كەڭەس سەنات جانىنان قۇرىلعان بولاتىن. بۇل تۋرالى پالاتا توراعاسى ماۋلەن اشىمباەۆ وسى جىلدىڭ قىركۇيەك ايىندا وتكەن «مۇگەدەكتىگى بار ادامداردىڭ وزەكتى ماسەلەلەرى جانە ولاردى شەشۋ جولدارى» تاقىرىبىنا ارنالعان دوڭگەلەك ۇستەل وتىرىسىندا ايتتى», دەلىنگەن حابارلامادا.
الداعى ۋاقىتتا كەڭەس مۇشەلەرى مۇگەدەك ادامداردىڭ ءومىرىن جاقسارتۋعا باعىتتالعان ۇسىنىستاردى قابىلداپ, ونى ىسكە اسىرۋ جولدارىن ازىرلەۋدى قولعا الادى.
وتىرىس بارىسىندا قاتىسۋشىلار كەڭەس توراعاسى لاۋازىمىنا سەناتور ءلاززات قالتاەۆانى لايىق دەپ شەشتى. دەپۋتات ارىپتەستەرىنە العىسىن ءبىلدىرىپ, كەڭەس جۇمىسىنىڭ نەگىزگى باعىتتارىن ايتتى.
«پرەزيدەنت قاسىم-جومارت توقاەۆ مۇگەدەكتىگى بار ادامداردىڭ ماسەلەسىن شەشۋگە ەرەكشە نازار اۋدارىپ كەلەدى. بۇل ولاردىڭ ءومىر ءسۇرۋ دەڭگەيىن ارتتىرۋعا مۇمكىندىك بەرەتىن زاڭنامالىق جانە ينستيتۋتسيونالدىق بازانى جەتىلدىرۋگە دە قاتىستى. پارلامەنت سەناتىندا پالاتا توراعاسى ماۋلەن اشىمباەۆتىڭ قولداۋىمەن وسى سالا بويىنشا جۇيەلى تۇردە جۇمىستار جۇزەگە اسىپ وتىر. كەڭەس مەملەكەتتىك ورگانداردىڭ, جەرگىلىكتى ءوزىن-ءوزى باسقارۋ ورگاندارىنىڭ, قوعامدىق بىرلەستىكتەردىڭ, عىلىمي جانە باسقا دا ۇيىمداردىڭ ىنتىماقتاستىعىنا ارنالعان الاڭ. سوندىقتان ولاردىڭ ماقساتى – مۇگەدەك ادامداردىڭ قۇقىقتارىن قورعاۋ, ولار ءۇشىن تەڭ مۇمكىندىكتەر جاساۋ جانە ءومىردىڭ بارلىق سالالارىنا قاتىسۋعا قول جەتكىزۋدى قامتاماسىز ەتۋ», دەدى ل.قالتاەۆا.
باسقوسۋعا ەڭبەك جانە حالىقتى الەۋمەتتىك قورعاۋ, وقۋ-اعارتۋ, مادەنيەت جانە اقپارات مينيسترلەرىنىڭ ورىنباسارلارى, سونداي-اق ساراپشىلار مەن مۇددەلى قوعامدىق بىرلەستىكتەردىڭ وكىلدەرى قاتىستى.
