فوتو: جاسلان جۇمابەكوۆ
ماجىلىستە وتكەن «AMANAT» پارتياسى فراكتسياسىنىڭ كەڭەيتىلگەن جيىنىنىڭ قورىتىندىسىندا دەپۋتاتتار «2024-2026 جىلدارعا ارنالعان رەسپۋبليكالىق بيۋدجەت تۋرالى» جانە «قازاقستان رەسپۋبليكاسىنىڭ ۇلتتىق قورىنان 2024-2026 جىلدارعا ارنالعان كەپىلدەندىرىلگەن ترانسفەرت تۋرالى» زاڭ جوبالارىن قارادى. اتالعان زاڭ جوبالارىندا پرەزيدەنتتىڭ جولداۋىن جانە سايلاۋالدى باعدارلاماسىن, سونداي-اق «AMANAT» پارتياسىنىڭ سايلاۋالدى باعدارلاماسىن ىسكە اسىرۋ قامتىلدى.
دەپۋتاتتار جيىندا كوستەنكو اتىنداعى شاحتادا قازا تاپقان كەنشىلەردى ءبىر مينۋت ۇنسىزدىكپەن ەسكە الدى. ماجىلىستەگى «AMANAT» فراكتسياسىنىڭ جەتەكشىسى ەلنۇر بەيسەنباەۆ دەپۋتاتتار مەملەكەتتىڭ حالىق الدىنداعى الەۋمەتتىك مىندەتتەمەلەرىن, ونىڭ ىشىندە جالاقى مەن زەينەتاقىنى يندەكستەۋ, جاردەماقىلاردى كوبەيتۋ, مەديتسينالىق كومەكتى قامتاماسىز ەتۋ سياقتى باسقا دا باسىمدىقتاردى ورىنداۋعا ەرەكشە نازار اۋدارعانىن ايتتى. پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ رەسپۋبليكالىق بيۋدجەتتىڭ 2024 جىلعا ارنالعان شىعىستارى 24 ترلن تەڭگە دەڭگەيىندە دەپ بولجانىپ وتىرعانىن جەتكىزدى. ترانسفەرتتەردى ەسەپكە الماعاندا كىرىستىڭ كولەمى 16,1 ترلن تەڭگەگە جەتەدى دەپ جوسپارلانىپ وتىر.
«بيۋدجەت جوباسى مەملەكەت باسشىسىنىڭ جولداۋىن جانە سايلاۋالدى باعدارلاماسىن, سونداي-اق «AMANAT» پارتياسىنىڭ سايلاۋالدى باعدارلاماسىن ورىنداۋ جونىندەگى جول كارتاسىن ىسكە اسىرۋدى ەسكەرە وتىرىپ جاسالدى. بۇل جۇمىس ۇكىمەتتىڭ ەرەكشە باقىلاۋىندا. ماجىلىسمەندەردىڭ تىكەلەي ارالاسۋىمەن 2,4 ترلن تەڭگەگە جۋىق قاراجات ماڭىزدىلىعىنا قاراي قايتا قاراستىرىلدى. بۇل وتە تىڭعىلىقتى ءارى جۇيەلى جۇمىس بولدى. وڭىرلەردى دامىتۋعا 2024-2026 جىلدارعا 7 ترلن تەڭگە قاراستىرىلعانىن» ايتقان ۆيتسە-پرەمەر «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋعا 2,4 ترلن تەڭگە ءبولىپ, 2025 جىلعا دەيىن 655 دەنساۋلىق ساقتاۋ نىسانىن سالۋ جانە 32 اۋدانارالىق اۋرۋحانانى جاڭعىرتۋ جوسپارلانعانىن جەتكىزدى. «جايلى مەكتەپ» ۇلتتىق جوباسىنا 1,7 ترلن تەڭگە باعىتتالىپ, بۇل اقشا 369 مەكتەپتىڭ قۇرىلىسىنا جۇمسالماق. جيىندا ءماجىلىس دەپۋتاتى, «AMANAT» فراكتسياسىنىڭ مۇشەسى مارحابات جايىمبەتوۆ بيۋدجەت جوباسىن ازىرلەۋ بارىسىندا دەپۋتاتتار مەملەكەتتىك ورگانداردان قوسىمشا مالىمەتتەر الۋ ءۇشىن 200-دەن استام ساۋال جولداعانىن جەتكىزدى. سونداي-اق زاڭ جوبالارىنا 300-گە جۋىق تۇزەتۋ ەنگىزگەنىن, «بيۋدجەتتىڭ شىعىستارىن بيۋدجەت تاپشىلىعىن ۇلعايتۋ جانە ۇلتتىق قوردان بەرىلەتىن ترانسفەرتتەر ەسەبىنەن جابۋ ءۇردىسى ساقتالعانىن» ء مالىم ەتتى.
ءماجىلىس سپيكەرى, «AMANAT» پارتياسىنىڭ توراعاسى ەرلان قوشانوۆ ۇلتتىق قور قاراجاتىن ۇتىمدى جانە ءتيىمدى پايدالانۋدىڭ ماڭىزى زور ەكەنىن ايتتى. «مەملەكەت باسشىسى ۇكىمەتكە ۇلتتىق قوردان ترانسفەرتتەردى قىسقارتۋدى جانە بيۋدجەت تاپشىلىعى ماسەلەسىن ۇنەمى ونىڭ قاراجاتى ەسەبىنەن شەشپەۋدى بىرنەشە رەت تاپسىردى. كىرىس بولىگىن تولىقتىرۋعا ارنالعان رەزەرۆ ماسەلەسىن ەكونوميكانىڭ بارلىق سەكتورىنداعى ءتيىمسىز شىعىنداردى وڭتايلاندىرۋ ارقىلى شەشۋ كەرەك. كەلەسى جىلدان باستاپ «ۇلتتىق قور – بالالارعا» باعدارلاماسى جۇمىس ىستەي باستايدى. ەندى ۇلتتىق قوردان اقشا ءبولۋ تۋرالى كەز كەلگەن اقپاراتقا تولەم الۋعا ۇمىتكەر بالالاردىڭ اتا-انالارى قاتتى نازار اۋدارادى. بۇل وتە سەزىمتال ماسەلە جانە وعان وتە مۇقيات قاراۋ كەرەك», دەدى ە.قوشانوۆ. پارتيا توراعاسى قاراعاندىداعى كەنشىلەر قازا تاپقان قايعىلى وقيعا ونەركاسىپ قاۋىپسىزدىگىن قامتاماسىز ەتۋدە ماسەلەنىڭ شاش-ەتەكتەن ەكەنىن ايتتى. ءماجىلىس سپيكەرى بيۋدجەت جوباسىن قاراعاندا ازاماتتار الدىندا ايتىلعان ۋادەنىڭ ورىندالۋى قاتاڭ قاداعالاناتىنىن دا اتاپ ءوتتى.
«دەپۋتاتتار زاڭ جوباسىنا 1,7 ترلن تەڭگەنى قۇراعان ارنايى تۇزەتۋلەرگە ۇسىنىستار بەردى. بيىل ءبىز رەكوردتى جاڭارتتىق دەپ ايتا الامىز. بيۋدجەت قاراجاتى مەملەكەت باسشىسىنىڭ جولداۋىندا, پرەزيدەنتتىڭ سايلاۋالدى باعدارلاماسىندا جانە پارتيانىڭ سايلاۋالدى باعدارلاماسىندا بەلگىلەنگەن شارالاردى ۋاقتىلى جانە ساپالى ورىنداۋعا ارنالعان. بۇل ءبىزدىڭ ۇكىمەتپەن بىرگە حالىق الدىنداعى ورتاق جاۋاپكەرشىلىگىمىز», دەدى ە.قوشانوۆ.
