ورتالىق كوممۋنيكاتسيالار قىزمەتىنىڭ الاڭىنداعى ءباسپاسوز ءماسليحاتىندا قر قورعانىس مينيسترلىگى اپپاراتىنىڭ باسشىسى ەربول قۇماربەك ۇلى جوبا تۋرالى ايتىپ بەردى.
«وسىدان ءبىر جىل بۇرىن قورعانىس ءمينيسترى جەتپىسكە جۋىق جوعارى وقۋ ورىندارىنىڭ باسشىلارىمەن مەموراندۋمعا قول قويىپ, اسكەري قىزمەتىن ۇزدىك وتكەرگەن ساربازدار ءۇشىن جوعارعى وقۋ ورىندارى ەسەبىنەن تەگىن ءبىلىم الۋ مۇمكىندىگىن بەرۋگە كەلىسكەن بولاتىن. بۇل مۇمكىندىكتى قارۋلى كۇشتەردىڭ عانا ەمەس, باسقا دا اسكەري كۇشتەردىڭ ساربازدارىنا دا بەرۋدى تاپسىردى. ارينە باستاپقى كەزەڭدە بۇل جوبانىڭ ىسكە اسۋىنا كۇماندانۋشىلار از بولعان جوق», - دەپ ءمالىم ەتتى سپيكەر.
ونىڭ ايتۋىنشا, سەبەبى جوعارى وقۋ ورنىندا تەگىن وقۋ ءۇشىن جولداما العان ساربازدا ۇلتتىق بىرىڭعاي تەستىلەۋدى تاپسىرماي, اۆتوماتتى تۇردە ءوتۋى جوسپارلانعان.
«دەگەنمەن بۇل جوبانىڭ اسكەري قىزمەتتىڭ بەدەلىن ارتتىرۋعا باعىتتالعانىن ەسكەرە وتىرىپ, عىلىم جانە جوعارى ءبىلىم مينيسترلىگى ونى قولداپ, بيىلعى جىلى كوكتەمدە اسكەري بورىشىن ءتامامداپ ساربازدار اراسىندا ىرىكتەۋ ءوتىپ, ۇبت تاپسىرماستان ەڭ ۇزدىك ساربازدار قولدارىنا جولدامالارىن الىپ, 1 قىركۇيەك كۇنى ستۋدەنتتەر قاتارىنا قوسىلدى», - دەپ حابارلادى ەربول قۇماربەك ۇلى.
وسىلايشا, بيىلعى جىلى وتان الدىندا اسكەري بورىشىن وتەگەن 3 مىڭ ازاماتقا قورعانىس مينيسترلىگى جوعارى وقۋ ورىندارىنا تەگىن ءتۇسۋ ءۇشىن جولداما بەردى.
قر قورعانىس مينيسترلىگى اپپارات باسشىسىنىڭ ايتۋىنشا, 2024 جىلدان باستاپ مەرزىمدى اسكەري قىزمەت ەتكەن ازاماتتارعا جوعارى وقۋ ورىندارىنا ءتۇسۋ ءۇشىن مەملەكەتتىك گرانتتار بولىنەتىن بولادى.
«بۇل ماقساتتا قازىرگى ۋاقىتتا ءتيىستى مەملەكەتتىك ورگاندارمەن جۇمىس جۇرگىزىلۋ ۇستىندە», - دەدى ول.
