ال ءتيىستى ورىندار وكىلدەرى مۇنىڭ ءبارى «قازگەرمۇناي» كومپانياسىنىڭ گاز قوندىرعىسىنداعى اقاۋعا بايلانىستى ەكەنىن ايتادى. نەگىزى وبلىستىڭ ءبىر ايداعى ءليميتى – 7,5 مىڭ توننا. گاز وڭدەۋ زاۋىتتارىنىڭ مۇمكىندىگىنە قاراي وعان قوسىمشا تاعى قوسىلىپ, ءار ايدا وبلىس 8 مىڭ تونناعا جۋىق سۇيىق گاز تۇتىنادى.
وبلىس اكىمىنىڭ ءبىرىنشى ورىنباسارى سەرىك قوجانيازوۆ وبلىسقا ورتا ەسەپپەن 5,5-6 مىڭ تونناعا دەيىن گاز بەرىپ كەلگەن «قازگەرمۇناي» كومپانياسىنان وسى قازان ايىندا 4 800 توننا عانا كەلگەنىن ايتادى.
– گاز جەتكىزۋ جوسپارى 529 تونناعا قىسقارعاندىقتان ءبىز مينيسترلىككە شىعىپ, «سنپس اقتوبەمۇنايگاز» كومپانياسىنان قوسىمشا 504 توننا بولىنۋىنە قول جەتكىزدىك. قازىر وسىنىڭ 288 تونناسى تيەلگەن 8 ۆاگون بىزگە قاراي جولعا شىقتى, – دەيدى وبلىس اكىمىنىڭ ءبىرىنشى ورىنباسارى.
سالىستىرۋ ءۇشىن ايتا كەتەيىك, بىلتىر قازان ايىندا 7 590 توننا گاز بولىنگەن ەكەن. بيىلعى كولەم ودان 1 300 تونناعا از بولىپ تۇر. وسىدان دا وبلىستاعى 25 وپەراتور گازدى تالون ارقىلى بەرىپ, ساتىلاتىن ليميت بەلگىلەۋگە ءماجبۇر بولعان. سوندا دا اي سوڭىنا جەتپەي ورتايا باستاعان قور كولەمىن, گازدىڭ وبلىسقا كەلۋىنەن باستاپ ساتىلۋىنا دەيىنگى جاعدايىن ارنايى قۇرىلعان جۇمىسشى توبى باقىلايدى.
وبلىس ورتالىعىنىڭ كىرەبەرىس تۇستارىندا بەكەتتەر قويىلىپ, گاز تولتىرۋ ستانسالارىندا كەزەكشىلىك ۇيىمداستىرىلعان. جىل سوڭىنا دەيىن ءوستىپ امالداۋدان باسقا جول كورىنبەي تۇر.
گاز تاپشىلىعى بايقالعالى بەرى «ساۋتس ويل» كومپانياسىنان 104 توننا گاز ءبولىنىپ, «قىزىلوردا مۇناي ونىمدەرى» مەن «بايقوڭىر گاز» مەكەمەلەرىنە جەتتى. الدا وسى كومپانيامەن قوسىمشا 140 توننا گاز ءبولۋ جونىندە كەلىسىم جاسالىپ وتىر. وسى ۋاقىتقا دەيىن وپەراتورلار «قازگەرمۇناي» كومپانياسى وندىرگەن 4 122 توننا گازدى الدى. قالعان 776 توننا كەستەگە سايكەس قازان ايىنىڭ سوڭىنا دەيىن جەتكىزىلەدى.
– قاراشا ايىنا 7,5 مىڭ توننا ءبولىنىپ وتىر. ونىڭ 4 740 تونناسىن «قازگەرمۇنايدان» الساق, قالعان 2 718 تونناسى اتىراۋ مۇناي وڭدەۋ زاۋىتىنان كەلەدى. ارينە, جەر موينى قاشىق بولعاندىقتان اتىراۋ گازى ءبىزدىڭ وپەراتورلار ءۇشىن 2 ەسە قىمباتقا ءتۇسىپ, كورەر پايداسى از بولاتىنى ايدان انىق. دەگەنمەن دە جۇمىس توبى ولاردىڭ باعانى بۇرىنعىدان كوتەرمەۋىن قاداعالايدى, – دەيدى سەرىك سالاۋات ۇلى.
مامانداردىڭ ايتۋىنشا, «قازگەرمۇناي» كومپانياسىنداعى ايىنا 6 مىڭ تونناعا دەيىن سۇيىق گاز وندىرەتىن ۋپگ-1 قوندىرعىسىنداعى اقاۋ كەلەر جىلدىڭ ءبىرىنشى توقسانىندا قالىپقا كەلتىرىلەدى.
قىزىلوردا
