جۋىقتا مەتاللۋرگتەر ديناستياسىنان رينات ەربولوۆپەن از-كەم اڭگىمەلەسكەن ەدىك. ايتۋىنشا, «كازتسينك» جشس ريددەر مەتاللۋرگيالىق كەشەنىندە جۇمىس ىستەپ جۇرگەنىنە بيىل 13 جىل بولىپتى. ءا, دەپ جۇمىسقا ورنالاسقاندا №1 كۇكىرت قىشقىلى تسەحىندا اپپاراتشى بولعان. كەيىنگى 3 جىلدا ۆەلتسپەش تسەحىنا اۋىسقان.
– ناعاشى اتام مالىك اۋشينوۆ وسى زاۋىتتا 1973 جىلى جۇمىسقا تۇرىپ, سول جەردەن زەينەتكە شىقتى. انامنىڭ تۋعان اعالارى دا وسى زاۋىتقا جۇمىس ىستەگەن. بولەلەرىم دە مەتاللۋرگيا سالاسىندا جۇمىس ىستەپ ءجۇر. ورايى كەلگەندە ناعاشى جەزدەم ورازقۇل ەسەنوۆتىڭ ەسەلى ەڭبەگىن اتاپ وتەيىن. زاۋىتتا شەبەر بولعان ول كوپتەگەن ازاماتتى جۇمىسقا باۋلىپ, جاستارعا ۇيرەتۋدەن ايانبادى. مالىك اتامىزدىڭ 10 بالاسى بولدى. بۇگىندە ونىڭ جولىن جالعاپ جۇرگەنىمىزدى ماقتان ەتەمىز, – دەيدى رينات ەربولوۆ.
ريناتتىڭ نەگىزگى ماماندىعى – العاشقى اسكەري دايىندىق جانە دەنە شىنىقتىرۋ ءپانىنىڭ مۇعالىمى. مۇعالىم بولىپ, بار-جوعى ءبىر جىل عانا ەڭبەك ەتكەن. ەڭبەك جولىن باستاي سالا اسكەر ساپىنا الىنىپ, اقتاۋداعى تەڭىز جاياۋ اسكەرىندە بورىشىن وتەگەن. كەيىن كەلگەننەن كەيىن بىردەن زاۋىتقا جۇمىسقا ورنالاسقان. باسىندا جۇمىستىڭ قيىن بولعانىن دا جاسىرمايدى.
– زاۋىتتىڭ اتى – زاۋىت. جۇمىس وڭاي ەمەس. فارحاد ەسىمدى بولەم ەكەۋىمىز ءبىر تسەحتا ىستەدىك. ول مەنىڭ تالىمگەرىم بولدى. سوسىن مەن ۆەلتسپەش تسەحىنا اۋىسىپ كەتتىم. زاۋىتتاعى بۇكىل پەشتىڭ جۇيەلى جۇمىس ىستەۋىنە جاۋاپتىمىز. كورسەتىلگەن تەمپەراتۋرالىق رەجىمدى ۇستاپ وتىرۋىمىز كەرەك. ءۇش كۇن ىستەپ, ەكى كۇن دەمالامىز, – دەيدى ول اڭگىمەسىندە.
ىستىق پەشتىڭ جانىندا سەگىز ساعات وت كوسەپ, پەش تازالاۋ وڭاي شارۋا ەمەس ەكەنى بەلگىلى. ونىڭ ۇستىنە لاپىلداپ جانىپ تۇرعان پەشتىڭ تەمپەراتۋراسى +900 گرادۋسقا دەيىن جەتەدى. رينات ءجاسوسپىرىم كەزىندە ەركىن كۇرەسكە قاتىسىپ, سپورت شەبەرلىگىنە ۇمىتكەر اتانعانى بار. سول كەزدەگى جاتتىعۋدىڭ دا پايداسى بولار, از ۋاقىت ىشىندە زاۋىت جۇمىسىنا توسەلىپ كەتكەن.
وقۋدى جاڭا بىتىرگەن جاستاردىڭ كەيبىرەۋى مۇنداي جۇمىستى اۋىرسىنسا, ەندى ءبىرى ۇيرەنىپ كەتىپ جاتادى. رينات ەربولوۆ سەكىلدى اككى ماماندار ولارعا بىلگەنىن ۇيرەتەدى, جول نۇسقايدى. اسىرەسە قاۋىپسىزدىك ەرەجەلەرىن قايتا-قايتا ەسىنە سالىپ وتىرادى. سەبەبى تسەح ىشىندەگى قاتە قادام كەشىرىلمەيدى.
– مالىك اتامىز كەڭەس ۇكىمەتى تۇسىندا جۇمىس ىستەدى. ول ۋاقىتتا اۋىر جۇمىستاعىلار زەينەتكە ەرتە شىعاتىن. قىزمەتىنە قاراي قوسىمشا اقى دا تولەندى. زاۋىتتا قاۋىپسىزدىك تالاپتارى 100 پايىز ساقتالادى دەگەنىمىزبەن, جۇمىسشىلاردىڭ دەنساۋلىعىنا زيانى تيەدى. سول ءۇشىن زاۋىتتا ىستەيتىن ەر ادامدار زەينەتكە – 60, ايەلدەر – 55 جاستان شىققانى دۇرىس پا دەپ ويلايمىن. ايتپەسە, جۇمىس وتە اۋىر, – دەگەن ۇسىنىسىن دا ءبىلدىردى.
بۇل جالعىز ر.ەربولوۆتىڭ ۇسىنىسى ەمەس شىعار, بالكىم. زەينەتكەرلىك جاسىن قاراستىرۋدى قولىنان كۇرەك تۇسپەي جۇرگەن بۇكىل زاۋىت قىزمەتكەرلەرى قولداسا كەرەك. بۇل – ەندى ۋاقىت ەنشىسىندە. ال اتا جولىنان جاڭىلماي كەلە جاتقان رينات ەكى قىز تاربيەلەپ وتىر. جارى – دۇكەندە قاراپايىم ساتۋشى. جۇمىستان بوس ۋاقىتتا وتباسىسىمەن باتىس التايدىڭ كورىكتى جەرلەرىن ارالاپ, تابيعات اياسىندا تىنىققاندى ۇناتادى. اڭگىمە اراسىندا رينات بالالارى بولاشاقتا زاۋىتتا ەڭبەك ەتسە, جول كورسەتىپ, بەلىن بۋامىن دەگەن پىكىرىن دە ءبىلدىردى.
شىعىس قازاقستان وبلىسى,
ريددەر قالاسى
