استانادا ءوتىپ جاتقان مەديتسينالىق-سانيتاريالىق العاشقى كومەك جونىندەگى جاھاندىق كونفەرەنتسيا اياسىنداعى كەزدەسۋ بارىسىندا دۇنيەجۇزىلىك دەنساۋلىق ساقتاۋ ۇيىمىمەن ءوزارا ىنتىماقتاستىق ماسەلەلەرى تالقىلاندى.
مەملەكەت باسشىسى قوناقتارعا ءىلتيپات بىلدىرە وتىرىپ, ەلىمىز ەڭ ماڭىزدى ۇيىمنىڭ ءبىرى سانالاتىن ددۇ-مەن حالىقارالىق دەڭگەيدە ناتيجەلى قارىم-قاتىناس جاساپ وتىرعانىن اتاپ ءوتتى.
«ەلىمىز ارقاشان ءسىزدىڭ قىزمەتىڭىزدىڭ تابىستى بولۋىنا سەپتىگىن تيگىزەدى. قازىرگىدەي كۇردەلى جاعدايدا ددۇ-نى باسقارۋ وتە قيىن ەكەنىن بىلەمىن. بۇل – ناعىز سىناق. سىزگە الەمدەگى كوپتەگەن ەل مەن دەلەگاتتاردىڭ ءتۇرلى پىكىرلەرىنە قۇلاق اسىپ, ءتيىمدى شەشىم تابۋعا جانە مامىلە جاساۋعا تۋرا كەلەدى. سىزگە تابىس تىلەيمىن. ءبىز ءوز تاراپىمىزدان سىزگە ءاردايىم كومەكتەسەمىز جانە قولداۋ كورسەتەمىز», دەدى مەملەكەت باسشىسى.
قاسىم-جومارت توقاەۆ پاندەميادان كەيىن اتالعان سالانى قالىپقا كەلتىرۋ, حالىق دەنساۋلىعىن ساقتاۋ ىسىندەگى نەگىزگى ماقساتتارعا قول جەتكىزۋ ۇشىن دەنساۋلىق ساقتاۋ جۇيەسىن نىعايتۋعا قازاقستاننىڭ بەلسەندى تۇردە كىرىسكەنىنە نازار اۋداردى.
پرەزيدەنت ددۇ جەتەكشىلىگىمەن جۇزەگە اسىرىلىپ جاتقان ءتيىستى باستامالارعا تولىق قولداۋ كورسەتۋگە ەلىمىزدىڭ دايىن ەكەنىن ناقتىلادى.
مەملەكەت باسشىسىنىڭ ايتۋىنشا, قازاقستان بۇۇ-نىڭ 2030 جىلعا دەيىنگى ورنىقتى دامۋ ماقساتتارىنا قول جەتكىزۋگە, سونىڭ ىشىندە حالىقتى دەنساۋلىق ساقتاۋ قىزمەتىمەن تولىق قامتۋعا, انا مەن بالا ءولىمىنىڭ دەڭگەيىن تومەندەتۋگە, سونداي-اق تۋبەركۋلەز ەپيدەمياسىن تولىقتاي جويۋعا نيەتتى.
ددۇ باس ديرەكتورى الماتى جانە استانا دەكلاراتسيالارىنىڭ قابىلدانۋى ۇيىم مەن جەكە ءوزى ءۇشىن ەرەكشە ماڭىزدى ەكەنىن اتاپ ءوتتى. ويتكەنى ول دەنساۋلىق ساقتاۋ ءمينيسترى قىزمەتىن اتقارعان كەزىندە, مەديتسينالىق-سانيتاريالىق العاشقى كومەكتى دامىتۋ ماسەلەسىمەن ماقساتتى تۇردە اينالىسقان.
بۇدان بولەك, كەزدەسۋدە دۇنيەجۇزىلىك دەنساۋلىق ساقتاۋ ۇيىمىمەن شىۇ اياسىنداعى ىنتىماقتاستىق, ورتالىق ازياداعى دەنساۋلىق پەن ءال-اۋقاتتى قولداۋ جونىندەگى 2022-2025 جىلدارعا ارنالعان جول كارتاسىن جۇزەگە اسىرۋ ماسەلەلەرى تالقىلاندى.
كەزدەسۋ سوڭىندا قاسىم-جومارت توقاەۆ جاھاندىق كونفەرەنتسيانى ۇيىمداستىرۋعا اتسالىسقانى جانە وسى ماڭىزدى شاراعا قاتىسقانى ءۇشىن تەدروس ادحانوم گەبرەيەسۋس پەن حانس كليۋگەگە العىس ايتتى.
