بۇعان دەيىنگى چەمپيوناتتاردىڭ باسىم كوپشىلىگىندە جانكۇيەرلەر فينالدا جامبىل وبلىسىنىڭ «اۋليەاتا» كومانداسى مەن تۇركىستان وبلىسىنىڭ «قۇلاگەر» كومانداسىن ءجيى كورەتىن. التىن مەن كۇمىس جۇلدەنى كەزەكتەسىپ يەلەنىپ جۇرگەن قوس كوماندانىڭ جولى وسى چەمپيوناتتا جارتىلاي فينالدا ءتۇيىستى.
توپتىق كەزەڭدە ۇزدىك شىققان جامبىلدىقتار مەن تۇركىستاندىقتار جارتىلاي فينالعا دا القىنباي جەتتى. شىنى كەرەك, ۇلتتىق سپورتقا اڭسارى اۋعان جانكۇيەرلەر ءدال وسى ەكى ۇجىمدى فينالدا كورگىسى كەلگەن. الايدا فينالدىق جولدامانى ساراپقا سالعان تارتىستى كەزدەسۋدە ءوزارا مىقتىنى انىقتاعان ويىندا اۋليەاتالىقتار تۇركىستاندىقتاردان 3 سالىم ايىرماسىمەن ايلاسىن اسىرىپ, جەڭىسكە ءبىر تابان جاقىنداي ءتۇستى.
جالپى العاندا بۇل چەمپيوناتتىڭ باستى سەنساتسياسىن قوستاناي وبلىسىنىڭ كومانداسى تىركەدى. جارتىلاي فينالدا قىزىلوردالىقتاردان باسىم تۇسكەن ولار دودانىڭ كۇمىس جۇلدەگەرى اتاندى. جامبىل مەن تۇركىستان وبلىسىنىڭ ۇجىمدارى فينالعا وزگە كوماندالاردى وتكىزە بەرمەيتىنىن ەسكەرسەك, سولتۇستىك ءوڭىردىڭ كومانداسى ءۇشىن كۇمىس جۇلدە تولايىم تابىس ەكەنى داۋسىز.
قازاقستان چەمپيوناتىنىڭ قورىتىندىسىندا جامبىلدىق كوماندا 13 دۇركىن قازاقستان چەمپيونى اتانسا, جارتىلاي فينالدا قوستانايلىقتارعا ەسە جىبەرگەن قىزىلوردالىقتار مەن تۇركىستاندىق كوماندا جۇلدەلى ءۇشىنشى ورىندى قاناعات تۇتتى. ون ءۇشىنشى رەت چەمپيون اتانعان «اۋليەاتا» كوكپار كلۋبى قازاقستان رەسپۋبليكاسى كوكپار فەدەراتسياسى تاعايىنداعان 3 ملن تەڭگەگە يە بولسا, كۇمىس جۇلدە يەگەرى قوستانايلىقتار – 2 ملن تەڭگە, ۇزدىك ۇشتىكتى تۇيىندەگەن قىزىلوردالىقتار مەن تۇركىستاندىقتار 1 ملن تەڭگەدەن سىياقى الدى.
جامبىل وبلىسى
