«اشىق اكىمدىككە» ءوز ماسەلەسى مەن ءوتىنىشىن ايتۋعا كەلەتىندەر كوپ. ەندى «اشىق اكىمدىك» تەك قىزمەتتىك ەمەس, مادەني-رۋحاني باعىتتاعى جۇمىستاردى جۇرگىزۋگە دە لايىقتالعان ورىن بولادى. باستامانى جۇزەگە اسىرعان – «فاراب» كىتاپحاناسىنىڭ ۇجىمى. «اشىق اكىمدىككە» ءوتىنىش ايتىپ كەلۋشىلەر مەن سول اۋماقتاعى تۇرعىندار تۇراقتى تۇردە قالاعان كىتابىن وقۋعا مۇمكىندىك الدى. سونداي-اق قانداي كىتاپ قاجەت ەكەنىن جازىپ, قالدىرا الادى. كىتاپ بۇرىشتارى اۋدان, قالا اكىمدىكتەرىندە دە اشىلعان. جىلجىمالى كىتاپ پۋنكتى ەكى بولىمنەن تۇرادى. ءبىرىنشى باعىت «اشىق قور» دەپ اتالادى. ال سونىڭ جانىنداعى «نەگىزگى قور» بولمەسىندە وقىرماننىڭ كىتاپ وقۋى ءۇشىن جاعداي جاسالعان. «فاراب» امبەباپ عىلىمي كىتاپحاناسىنىڭ ديرەكتورى جانات شارداربەكوۆانىڭ ايتۋىنا قاراعاندا, وبلىستاعى «اشىق اكىمدىك» كەڭسەسىنىڭ ىشىنەن اشىلعان كىتاپ سورەسىندە قازىرگى تاڭدا مىڭعا جۋىق كىتاپ قورى جاساقتالعان. ونىڭ ىشىندە ءتۇرلى باعىتتا, اتاپ ايتقاندا, موتيۆاتسيالىق, كوركەم ادەبيەت, پسيحولوگيالىق, تاريح, ءدىنتانۋ تاقىرىبىنداعى كىتاپتار جانە مەرزىمدى باسىلىمدار بار. سونىمەن قاتار وقىرمان سۇرانىسىنا قاراي قاجەتتى كىتاپتاردى وبلىستىق كىتاپحانادان قىسقا مەرزىمدە جەتكىزۋ مۇمكىندىگى قاراستىرىلعان.
وسىنداي يگى باستامالاردى ىسكە اسىرۋ ارقىلى وقىرمان قاتارىن كوبەيتە تۇسكەن تۇركىستان وبلىستىق «فاراب» امبەباپ عىلىمي كىتاپحاناسى جۋىردا مادەنيەت جانە اقپارات مينيسترلىگىنىڭ قولداۋىمەن ۇلتتىق اكادەميالىق كىتاپحاناسى ۇيىمداستىرعان «Kitap Time» جالپى رەسپۋبليكالىق كىتاپ فەستيۆالى اياسىندا ءىس-شارالاردى جوعارى دەڭگەيدە وتكىزگەنى ءۇشىن ۇزدىك دەپ تانىلدى. اقتاۋ قالاسىندا قازاقستاندىق كىتاپحانالىق وداقتىڭ كوشپەلى جۇمىس وتىرىسى جانە ق.سىديىق ۇلى اتىنداعى ماڭعىستاۋ وبلىستىق امبەباپ كىتاپحاناسىنىڭ 50 جىلدىعىنا ارنالعان «كىتاپحانا ءىسىن دامىتۋداعى زاماناۋي الەمدىك ۇدەرىستەر» تاقىرىبىندا رەسپۋبليكالىق كونفەرەنتسيا وتكەن بولاتىن. كونفەرەنتسيا بارىسىندا ۇلتتىق اكادەميالىق كىتاپحاناسىنىڭ ديرەكتورى عازيزا قۇدايبەرگەنقىزى «فاراب» امبەباپ عىلىمي كىتاپحاناسىنىڭ ديرەكتورى جانات شارداربەكوۆاعا ۇزدىك كىتاپحانا سەرتيفيكاتىن تابىس ەتتى. ايتا كەتەيىك, كىتاپحانا ديرەكتورى بىلتىر «جىل كىتاپحاناشىسى-2022» اتانعان بولاتىن.
تۇركىستان وبلىسى
