فوتو: ايانا توعانبەك
دۇنيەنىڭ ءبىر تۇكپىرىنەن ەكىنشىسىنە دەيىن حات جولداۋ, حابارلاما, سالەمدەمە جەتكىزۋ - پوچتا مەكەمەسى اتقاراتىن مىندەتتەردىڭ ءبىرى. وسى مىندەتتەردى ءمىنسىز ورىنداعان, تالاي جىلدار بويى قاجىرلى ەڭبەك ەتىپ كەلگەن, قازىرگى كۇندە زەينەتكە شىققان پوشتانىڭ قۇرمەتتى قىزمەتكەرلەرى دە اتالعان جيىنعا قاتىستى.
ءىس-شارا باسىندا استانا فيليالىنىڭ بيزنەس جونىندەگى ديرەكتور ورىنباسارى اسەل سىزدىقوۆا بيىلعى جىلدىڭ 2-قازانىنان باستاپ 2024 جىلعا ارنالعان جازىلىم اشىلعانىن حابارلادى. سونداي-اق بارشا قاۋىمدى قازپوشتانىڭ 30 جىلدىعىمەن قۇتتىقتاپ ءوتتى.
جىل سايىن ءداستۇرلى تۇردە وتەتىن ناۋقاندا ءار باسىلىم ءوزىنىڭ العاشقى جازىلۋشىلارىنا سىيلىقتار تاراتتى. ال «قازپوشتا» اق ۇجىمى العاشتى 20 جازىلۋشىعا ارنايى سەرتيفيكاتتار تابىس ەتتى.
بۇگىنگى رەسمي جيىنعا بىرنەشە باسىلىمدار ءوز ونىمدەرىن الىپ كەلىپ وتىر. ونىڭ ىشىندە «قازاق گازەتتەرى» جشس, استانا اقشامى, ايقىن-ليتەر جشس, تۇركىستان گازەتى, «ەلوردالىق ءبىلىم» گازەتى مەن «استانالىق ادىستەمە» جۋرنالى, مادەني مۇرا جانە National Geographic جۋرنالدارى بار.
«جازىلىم قازپوشتانىڭ ءداستۇرلى قىزمەتىنە اينالعان. 1980 جىلدارى ەلەكتروندى اقپارات قۇرالدارى بولماعان كەزدە, بىردەن ءبىر اقپارات كوزى - گازەت بولاتىن. ءار وتباسى گازەت-جۋرنالدارعا جازىلاتىن. سول جىلدارى جازىلىم تيراجى 456 مىڭ دانانى قۇرادى. كەيىن مەملەكەتىمىز جاڭادان قۇرىلىپ جاتقان جىلدارى جازىلىم باسەڭسىپ, تۇپكى جازىلىم سانى نولگە دەيىن ءتۇسىپ كەتكەن كەزدەر دە بولعان. كەيىن, باس قالانى استاناعا كوشىرۋ جىلدارىندا جازىلىم بىرتە-بىرتە قالپىنا كەلىپ, تىڭ اقپاراتتار, ۋاقتىلى, قىزىقتى ۇسىنىلعان ماتەريالدار الۋ قاجەتتىلىگى قايتادان جاڭاردى.
پوشتاشىلاردىڭ ەڭبەكقورلىعىنىڭ ارقاسىندا پوشتا بولىمشەسى ارقاشان ءوز مىندەتتەرىن اتقارىپ كەلەدى. وسى ورايدا, بارشاڭىزعا زور دەنساۋلىق, زەينەتكەرللەرگە زەينەت ۋاقىتىندا قىزىقتى ءومىر تىلەيمىن. جازىلۋشىلار كۇنى قۇتتى بولسىن!», دەيدى پوشتا سالاسىنا ەڭبەگىن سىڭىرگەن زەينەتكەر ەۆگەنيا فەليكسوۆنا.
زەينەتكەر وتكەن عاسىردىڭ 80-جىلدارى گازەت كۇنىنە ەكى مەزگىل جەتكىزىلەتىنىن ەسكە سالدى.
«تاڭەرتەڭگى سەگىزدە جانە تۇستەن كەيىن جەتكىزىلەتىن. بۇگىندە ەلەكتروندى باق دامىعان زاماندا كوپتەگەن گازەتتەر تسيفرلىق فورماتقا كوشۋى جازىلىم ءبولىمى ءۇشىن اۋىر بولدى», دەدى ە.فەليكسوۆنا.
سونداي-اق جازىلۋشىلاردىڭ اراسىندا ەڭ العاشقى بولعان زەينەتكەر وقىرماندى ورتاعا شاقىرىپ, سەرتيفيكات تابىس ەتتى.
«بارشاڭىزدى باسپاسوزگە جازىلۋ ناۋقانىنىڭ باستالۋىمەن قۇتتىقتايمىن. بۇگىن قازپوشتا ۇجىمى ءباسپاسوز شىعارۋشىلاردى جانە وقىرمانداردى شاقىرىپ, ءىس-شارا وتكىزىپ جاتىر. جىل باسىندا قازاقستانداعى تانىمال مىقتى گازەتتەردىڭ باسىن بىرىكتىرىپ «قازاق گازەتتەرى» جشس قۇرىلعان ەدى. ونىڭ باسىندا ءبىر عاسىردان كوپ تاريحى بار Egemen Qazaqstan گازەتى مەن كازاحستانسكايا پراۆدا گازەتى تۇر. گازەتتەرىمىزدىڭ وقىرماندارى كوبەيە بەرسىن. ءدال قازىرگى اقپاراتتىڭ اقتارىلىپ جاتقان زامانىندا گازەت شىعارۋ, باسپاسوزبەن اينالىسۋ جانە ونى وقىرمانعا وقىتۋ وڭاي شارۋا ەمەس. دەگەنمەن, وسىنىڭ بارلىعىن ىسىرىپ قويىپ, گازەتكە جازىلىپ جاتقان بارلىق وقىرماندارىمىزعا العىس ايتامىز», دەدى «Egemen Qazaqstan» گازەتىنىڭ شەف-رەداكتورى امانگەلدى قياس.
«مەن Egemen Qazaqstan گازەتىنە 2000-جالدان باستاپ جازىلعانمىن. قىزىلوردا وبلىسىنىڭ تۋماسىمىن. جالپى, گازەتتى بارلىق جانۇيامىزبەن بىرگە وقىپ جۇرەمىز. بۇگىن باسپا مەن وقىرماندارعا ارنالعان ۇلكەن ناۋقان بولىپ جاتىر ەكەن, العىسىمدى بىلدىرەمىن. گازەتتەردىڭ وقىرماندارى كوبەيە بەرسىن. ءباسپاسوز دامي بەرسىن!», دەيدى ەلدىڭ باس گازەتىنىڭ تۇراقتى وقىرمانى.
گازەت - قۇندى دۇنيەلەردىڭ ءبىرى. ينتەرنەت جاريالاي بەرمەيتىن كوپ ساپالى دۇنيەلەردى گازەت ارقىلى ءبىلىپ وتىرامىز. گازەتكە جازىلعان اقپارات بولسىن, ماقالا بولسىن ءوزىنىڭ شىنايىلىعىمەن, ناقتىلىعىمەن ەرەكشەلەنەدى. گازەتىمىزدىڭ جازارى كوپ بولسىن.
