اۋەلى ءسوز العان «قازپوشتا» فيليالىنىڭ ديرەكتورى گۇلجان راحىمباەۆا ارىپتەستەرىن ءتول مەرەكەلەرىمەن قۇتتىقتاپ, بۇقارالىق اقپارات قۇرالدارى وكىلدەرىمەن ىنتىماقتاسا جۇمىس ىستەۋگە شاقىردى.
– قۇرمەتتى ارىپتەستەر! سىزدەردى ءتول مەرەكەلەرىڭىزبەن شىن جۇرەكتەن قۇتتىقتايمىن! شاراعا جينالعان باق وكىلدەرىمەن قاناتتاسا جۇمىس ىستەۋگە ارقاشان دايىنبىز. ماقسات-مۇددەمىز ءبىر. جۋىقتا عانا پرەزيدەنت قاسىم-جومارت توقاەۆ «قازپوشتا» اق توراعاسى اسەل جاناسوۆانى قابىلداپ, اۋىل تۇرعىندارىنا كورسەتىلەتىن الەۋمەتتىك, مەملەكەتتىك قىزمەتتەردىڭ اياسىن ۇلعايتۋدى تاپسىرعان. سوندىقتان سىزدەردى قولداۋعا, ۇسىنىستارىڭىزدى قابىلداۋعا ارقاشان ءازىرمىز, – دەدى فيليال باسشىسى گۇلجان ورالبەكقىزى.
ءيا, گازەت-جۋرنالعا جازىلىم نەعۇرلىم كوپ بولسا, پوشتا قىزمەتىنىڭ دە الەۋەتى ارتا تۇسەدى. وكىنىشتىسى, ينتەرنەت جەلىسى مەن ۇيالى بايلانىس قىزمەتى دامىعان سايىن باسپاسوزگە جازىلۋ تومەندەپ بارادى. ال «قازپوشتا» قىزمەتىنە مەملەكەتتەن بولىنەتىن سۋبسيديا وتە از كورىنەدى. پوشتا باسشىلارىنىڭ سوزىنشە, ءۇش گازەت ءۇشىن 51 تەڭگەنىڭ اينالاسىندا عانا ەكەن.
ايتا كەتەرلىگى, شىعىس قازاقستان مەن اباي ءوڭىرى ەكى وبلىس بولىپ بولىنگەنىمەن, «قازپوشتا» قىزمەتىنىڭ باعىت-باعدارى باياعىداي. جاڭا جىلدان كەيىن عانا وزگەرۋى مۇمكىن. جيىندا باسپاسوزگە جازىلۋ ماسەلەسىنەن بولەك, وقىرماندارعا گازەت-جۋرنالدىڭ ۋاقىتىلى جەتپەۋى دە ءسوز بولدى. بۇل وتە وزەكتى ماسەلە ەدى. بىلەمىز, ءباسپاسوز ناۋقانى اياقتالا سالىسىمەن
اۋىل-اۋىلدان وقىرماندار تەلەفون سوعىپ, گازەتىنىڭ كەشىگىپ جاتقانىن ايتىپ, ارىزدانادى. ونداي جاعدايدا «قازپوشتا باسشىلىعى ناقتى فاكتىمەن جۇمىس ىستەيتىندەرىن جەتكىزدى. دەمەك, وقىرماننىڭ مەكەنجايىن ناقتىلاپ, وبلىستاعى فيليال باسشىلىعىنا ۇسىنۋىمىز كەرەك. ەگەر گازەت-جۋرنال پوشتاشىنىڭ كىناسىنەن جەتپەي جاتسا, بەلگىلى مولشەردە ايىپپۇل ارقالايدى ەكەن. الايدا پوشتاشى ءۇشىن دە قولايسىز جاعدايلار بار. ماسەلەن, گازەت-جۋرنال, حات-حابار تاراتىپ جۇرگەن پوشتا قىزمەتكەرىنە يەسىز يتتەردىڭ شابۋىلى ءجيى بولىپ تۇرادى ەكەن. جىلىنا جوق دەگەندە ەكى-ءۇش قىزمەتكەردى يت قاۋىپ الادى دەسەدى. سونداي-اق پوشتا جاشىگىنىڭ جوقتىعى دا قولايسىزدىق جاسايدى. اسىرەسە وسكەمەندە بوي كوتەرگەن جاڭا تۇرعىن ۇيلەردە پوشتا جاشىگى ويلاستىرىلماعان ەكەن. قالا دەگەندەي, پودەزدەرگە كىرۋ دە ۇلكەن پروبلەما كورىنەدى.
جيىندا جۋرناليستەر گازەتكە جازىلۋ ناۋقانىندا بىرلەسىپ, تىڭ جوبالار ۇيىمداستىرۋ سىندى ۇسىنىستارىن دا ايتتى.
– مەنىڭ ويىمشا گازەتكە, جۋرنالعا ءار ادام ءوزىنىڭ تانىم كوكجيەكتەرىن كەڭەيتۋ ءۇشىن جازىلۋى كەرەك. ينتەرنەتتەگى اقپارات شولاق. ارينە, قالتا تەلەفوننان جىلت ەتكەن جاڭالىقتى شولىپ شىعۋ ىڭعايلى. ال تۇشىنىپ وتىرىپ وقيتىن دۇنيەنىڭ دەنى گازەتتەردە. ەكىنشىدەن, بۇگىنگى وقيعانىڭ ءبارى تاسقا باسىلعانداي قاعاز بەتىندە قالۋعا ءتيىس. ەكراننىڭ بەتىندەگى دۇنيە ءسونىپ قالۋعا دا مۇمكىن. ايتپاعىم, گازەت-جۋرنالدىڭ عۇمىرلى بولۋى ءۇشىن ەڭبەك ەتۋىمىز كەرەك, – دەپ ءوز ويىن ايتتى «شىعىس جاڭالىقتارى» جشس باسشىسى ەربولات مۇقاجانوۆ.
«ەل بۇگىنشىل, مەنىكى ەرتەڭ ءۇشىن», دەپ احمەت بايتۇرسىن ۇلى ايتقانداي, بۇگىنگى بولىپ جاتقان ەلەۋلى دۇنيەلەردى قاعازعا باسىپ وتىرماساق, تاريحتى زەرتتەيتىن ەرتەڭگى ۇرپاق دەرەك تاپپاي شارق ۇرماي ما؟ ايتىپ وتكەندەي, جىلپ-جىلپ ەتكەن جەلىدەگى جاڭالىق بۇگىن بار, ەرتەڭ جوق. سول ءۇشىن دە تەلەفونعا تەلمىرمەي, گازەت وقۋ مادەنيەتىن قالىپتاستىرعانىمىز ءجون شىعار.
شىعىس قازاقستان وبلىسى
