فوتو: ۇكىمەتتىڭ ءباسپاسوز قىزمەتى
شىعىس قازاقستان وبلىسىنا ينۆەستيتسيا تارتۋ جونىندەگى ءىس-شارالار جوسپارى شەڭبەرىندە كوتەرمە-تاراتۋ ورتالىعىن ىسكە قوسۋ جونىندەگى ءىرى ينۆەستيتسيالىق جوبا جۇزەگە اسىرىلىپ جاتىر. بۇل ازىق-ت ۇلىك ونىمدەرىنىڭ باعاسىن تۇراقتاندىرۋعا ايتارلىقتاي ۇلەس قوسىپ, اۋىل شارۋاشىلىعى سالاسىنداعى شاعىن جانە ورتا كاسىپكەرلىكتى دامىتۋعا سەرپىن بەرەدى.
قازىرگى ۋاقىتتا مۇندا جالپى اۋدانى 20 مىڭ شارشى مەتردى قۇرايتىن, 45 مىڭ تونناعا دەيىن ءونىم قابىلداي الاتىن 2 كوكونىس ساقتاۋ قويماسىنىڭ قۇرىلىسى اياقتالۋعا جاقىن. ەكىنشى كەزەڭ اياسىندا 2024 جىلى كتو قۇرىلىسى اياقتالۋى ءتيىس, وندا تاۋار ءتۇسىرۋ ءۇي-جايلارى, ەت, بالىق, جەمىس-جيدەك, كوكونىس, ءسۇت جانە نان ونىمدەرىن ساتۋعا ارنالعان الاڭدار ورنالاسادى. سونىمەن قاتار شاعىن ناۋبايحانا, ءدامحانا جانە جارمەڭكە وتكىزۋگە ارنالعان الاڭ اشۋ جوسپارلانىپ وتىر.
پرەمەر-مينيستر اتالعان جوبانىڭ ءوڭىر ءۇشىن ماڭىزدى ەكەنىن اتاپ ءوتتى.
«ەڭ اۋەلى, بۇل ىشكى نارىقتى قاجەتتى ونىمدەرمەن, ونىڭ ىشىندە كوكونىستەرمەن جانە باسقا دا ازىق-ت ۇلىكپەن تۇراقتى تۇردە قامتاماسىز ەتۋگە مۇمكىندىك بەرەدى. باعانى تۇراقتاندىرۋعا ىقپال ەتەدى. ەڭ باستىسى, ءونىم تاپشىلىعى ءجيى تۋىندايتىن ماۋسىمارالىق كەزەڭدە ءونىم ساقتاۋ ارقىلى كوكونىستەر مەن جەمىستەردى بازارلار مەن دۇكەندەرگە جەتكىزۋ مۇمكىندىگى بولادى», دەدى ءاليحان سمايىلوۆ.
ونىڭ ايتۋىنشا, كتو كورشى ەلدەر اراسىنداعى ءترانزيتتى قامتاماسىز ەتە الادى, بۇل ونىڭ كولىك-لوگيستيكالىق الەۋەتىن تولىق اشادى.
مۇندا شارۋا قوجالىقتارىنىڭ ءبىرىنىڭ باسشىسى ۆالەري قاسىمباەۆ ۇكىمەت باسشىسىنا بال وڭدەۋ زاۋىتىن سالۋ تۋرالى ۇسىنىس جاسادى. دايىن ءونىمدى ىشكى نارىققا دا, ەكسپورتقا دا جىبەرۋگە بولادى.
«بۇل - وتە قاجەت جوبا. مەنىڭ ويىمشا, ءبىز قارجىلاندىرۋ ماسەلەسىنىڭ شەشىمىن تابامىز», دەدى پرەمەر-مينيستر.
كەلەسى كەزەكتە ءاليحان سمايىلوۆ الەمدىك ستاندارتتارعا سايكەس سالىنىپ جاتقان گەماتولوگيالىق ورتالىقتىڭ قۇرىلىس بارىسىمەن تانىستى. مۇندا حيميوتەراپيانىڭ كۇندىزگى ستاتسيونارى, بالالار اۋرۋحاناسى, سوماتيكا, ەرەسەكتەر گەماتولوگياسى, كارديولوگيا جانە كارديوحيرۋرگيا, سۇيەك كەمىگىن ترانسپلانتاتسيالاۋ جانە باسقا دا بولىمشەلەر قاراستىرىلعان. ورتالىق بازاسىندا ازاماتتار دياگنوستيكادان باستاپ وڭالتۋعا دەيىنگى قىزمەت تۇرلەرىن الا الادى. عيمارات 2024 جىلدىڭ سوڭىندا اشىلادى.
پرەمەر-مينيستر بۇل ورتالىقتىڭ وبلىس ءۇشىن عانا ەمەس, جالپى رەسپۋبليكا ءۇشىن دە ماڭىزى زور ەكەنىن, ونىڭ قاتەرلى ىسىكتەر, قان اينالىمى جۇيەسى اۋرۋلارى جانە باسقا دا سىرقاتتارى بار ناۋقاستارعا كەشەندى مەديتسينالىق كومەك كورسەتەتىنىن اتاپ ءوتتى.
