فوتو: primeminister.kz
شىعىس قازاقستان وبلىسى اكىمىنىڭ ورىنباسارى باقىتجان باياحمەتوۆتىڭ ايتۋىنشا, بۇگىندە ستانتسياداعى 6 قازاندىقتىڭ 2-ءۋى ىسكە قوسىلعان. جاقىن ارادا تاعى 1-ەۋى ىسكە قوسىلىپ, تۇرعىنداردىڭ جىلۋمەن تولىق قامتاماسىز ەتىلەتىنى كۇتىلىپ وتىر. سونىمەن قاتار قالعان اگرەگاتتار مەن قوسالقى جابدىقتاردى جوندەۋ-قالپىنا كەلتىرۋ جۇمىستارى جۇرگىزىلىپ جاتىر.
جالپى, بۇگىندە مازۋت سورعى ستانتسياسىن, وتىن بەرۋ تراكتىسىن, تۋربوگەنەراتور جانە بايلانىس ترانسفورماتورلارىن جوندەۋ, جىلۋ جەلىلەرىندە گيدراۆليكالىق رەجيمدى قامتاماسىز ەتۋ ءۇشىن سورعى ستانتسيالارىن ەلەكترمەن جابدىقتاۋدى قالپىنا كەلتىرۋ جۇمىستارى اياقتالعان. قازاندىق پەن تۋربينالىق تسەحتاردىڭ شاتىرى جوندەلدى. كومىر تاسىمالداناتىن تەمىرجولداردى جوندەۋ جۇمىستارى دا اياقتالۋعا جاقىن.
پرەمەر-مينيستر وتكەن جىلىتۋ ماۋسىمىندا ريددەر جەو اپاتتى جاعدايدا جۇمىس ىستەپ, ءجيى توقتاپ قالعانىن, ناتيجەسىندە تۇرعىندار قىستىڭ كوزى قىراۋدا جىلۋسىز قالعانىن اتاپ ءوتتى.
«بۇعان بۇرىنعى قوجايىنداردىڭ ستانتسيانى جاڭعىرتۋ مەن جوندەۋ جۇمىستارىنا قاراجات سالماعانى سەبەپ بولدى. وسىنىڭ بارلىعى جەو-نىڭ ابدەن توزۋىنا اكەپ سوقتى. رەسپۋبليكالىق بيۋدجەتتەن 8,4 ملرد تەڭگە بولۋگە ءماجبۇر بولدىق. وبلىس اكىمدىگى ءوز تاراپىنان 500 ملن تەڭگەگە جۋىق قارجى ءبولدى. وسى ۋاقىتقا دەيىن جوندەۋ جۇمىستارى توقتاۋسىز جۇرگىزىلدى. الداعى جىلىتۋ ماۋسىمىنىڭ دۇرىس ءوتۋى ءۇشىن ولاردىڭ ۋاقتىلى اياقتالۋى ماڭىزدى. مۇنى كۇنى-ءتۇنى قاداعالاپ وتىرۋىمىز كەرەك», دەدى ءاليحان سمايىلوۆ.
ول سونداي-اق جەو-نى كوممۋنالدىق مەنشىككە بەرۋ پروتسەسىن جەدەلدەتۋدى تاپسىردى.
نىساندا پرەمەر-مينيسترگە ايماقتىڭ جىلۋ بەرۋ ماۋسىمىنا دايىندىعى تۋرالى دا باياندالدى. بۇگىنگى تاڭدا بيۋدجەتتىك ۇيىمداردى (830-دان استام نىسان), تۇرعىن ۇيلەردى (3 مىڭنان استام), ينجەنەرلىك جەلىلەر مەن قازاندىقتاردى دايىنداۋ جۇمىستارى اياقتالعان. جەو مەن سۋ ەلەكتر ستانتسيالارىندا دا دايىندىق جۇمىستارى اياقتالۋعا جاقىن.
