ساۋالداماعا ەلىمىزدىڭ ءار وڭىرىنەن ماكروەكونوميكالىق كورسەتكىشتەردى تالداۋ جانە بولجاۋمەن اينالىساتىن AERC, Halyk Finance, Jusan Invest, NAC Analytica, ازيا دامۋ بانكى, اكرا, ەۋرازيالىق دامۋ بانكى, ەۋرازيالىق ەكونوميكالىق كوميسسيا, رەنەسسانس كاپيتال, فريدوم فينانس جانە ەكونوميكالىق زەرتتەۋلەر ينستيتۋتى جالپى 11 ۇيىمنىڭ اراسىندا حالىقارالىق ۇيىمدار مەن رەيتينگتىك اگەنتتىكتەر قاتىسقان.
ماكروەكونوميكالىق شولۋ – ۇلتتىق بانكتىڭ نارىقتاعى كاسىبي قاتىسۋشىلارىمەن كوممۋنيكاتسيالارىن جاقسارتۋعا جانە ساراپشىلار قاۋىمداستىعىمەن ديالوگ ورناتۋدا رەتتەۋشى ءارى نارىق اراسىنداعى اقپاراتتىق اسسيمەتريانى ازايتۋعا باعىتتالىپ وتىر.
اتالعان ساۋالداماعا باس بانكتىڭ بولجامدارى قامتىلىپ, وندا ىشكى جانە الەمدىك نارىقتاعى احۋال, ونىڭ دامۋ بارىسىنا قاتىستى كاسىبي قاتىسۋشىلاردىڭ پىكىرلەرى, باعالاۋلارى مەن كۇتۋلەرىنە شولۋ جاسالعان. بيىلعى جىلدىڭ قىركۇيەك ايىندا رەسپوندەنتتەر بولجامنىڭ تۇگەلگە جۋىعى مۇناي باعاسىنىڭ ستسەناري شارتىنا قاراي ءوسۋ جاعىن قايتا قاراستىردى.
2023-2024 جىلدارى ەل ەكونوميكاسىنىڭ وسىمىنە جاسالعان بولجامدار الدىڭعى ماندە (سايكەسىنشە 4,4% جانە 4,3%) ساقتالىپ, 2025 جىلعا بولجام 4,4%-دان 4,5%-عا ۇلعاياتىندىعىن ايتادى.
تالداۋشىلار 2023 جىلعا ارنالعان ينفلياتسيا بولجامىن 12%-دان 11,5%-عا دەيىن, 2024 جىلعا – 8,5%-دان 8,3%-عا دەيىن جاقساراتىندىعىن, 2025 جىلعا بولجام –7% دەڭگەيىندە ساقتالاتىندىعىن اتاپ وتكەن. ساراپشىلاردىڭ وسى جىلعا ينفلياتسيالىق كۇتۋلەرى ءارتۇرلى باعىتتا وزگەرىپ, تامىز ايىندا ناقتى ينفلياتسيا 13,1% دەڭگەيىندە بولعانىنا قاراماستان, جىل سوڭىندا 8,3% بەن 15% ارالىعىندا قالىپتاسۋى مۇمكىندىگىن ايتىپ بەردى.
وسىلايشا, بيۋدجەتتىك شىعىستاردىڭ ءوسۋى مەن ىشكى تۇراقتى سۇرانىسقا بايلانىستى كەيبىر رەسپوندەنتتەردىڭ ينفلياتسيالىق كۇتۋلەرى جوعارى دەڭگەيدە ساقتالعان.
2023-2025 جىلدار ارالىعىندا بازالىق مولشەرلەمە جونىندەگى كۇتۋلەر جىلىنا ورتا ەسەپپەن سايكەسىنشە 16,5% جانە 10% دەڭگەيىندە وزگەرىسسىز قالعاندىعىن جەتكىزدى.
الداعى ۋاقىتتا بازالىق مولشەرلەمە بويىنشا شەشىمدەر جىلىنا كەم دەگەندە 4 رەت تۇراقتى تۇردە جۇرگىزۋ جوسپارلاندى.
سونىمەن شولۋ ناتيجەلەرىنە قاراعاندا Brent ماركالى مۇناي باعاسى باررەل ءۇشىن جىلىنا ورتا ەسەپپەن – 99,182 اقش دوللارى, ىشكى جالپى ءونىم – 3,2-4,4, بازالىق مولشەرلەمە جىلىنا ورتا ەسەپپەن – 13,9 تاۋارلار مەن قىزمەتتەر ەكسپورتى جىلىنا – 94,1 ملرد اقش دوللارى,تاۋارلار مەن قىزمەتتەر يمپورتى جىلىنا – 59,2 ملرد اقش دوللارى, USD/KZT كۋرسى جىلىنا ورتا ەسەپپەن – 460,5 بولدى.
وسىدان ءبىراز بۇرىن ۇلتتىق بانك شەتەلدىك ينۆەستورلاردىڭ ەلىمىزدەگى ماكروەكونوميكالىق جاعدايى مەن بىزدەگى كاپيتال نارىعىنا شولۋدى جۇرگىزىپ, ەسەبىن جاريالاۋدى باستاعان-دى.
ەسەپ الەمدىك قارجى نارىعىنداعى تەڭگە اكتيۆتەرىن جاھانداندىرۋ جانە باعالى قاعازداردىڭ حالىقارالىق يندەكستەرىنە كىرۋ ۇدەرىسىندە قازاقستاننىڭ پوزيتسياسىن نىعايتۋ شارالارى اياسىندا جۇرگىزىپ وتىر.
