فوتو: اشىق دەرەككوز
جالپى العاندا كەز-كەلگەن قوعام, ۇلت وزدەرىنىڭ رۋحاني قۇندىلىقتارى مەن ءداستۇرلى سەنىمدەرىنسىز بولمايدى. ال وسى قۇندىلىقتاردىڭ ماقساتى ومىرشەڭ, بەيبىت قوعام قۇرۋ. ادامنىڭ ار-وجدانىن ساقتاي وتىرىپ, تاتۋ-ءتاتتى ءومىر ءسۇرۋ ەكەنى بارشامىزعا ءمالىم. بىراق ءبىلۋ باسقا, بىلگەنگە امال ەتۋ باسقا دەمەكشى دىنارالىق تاتۋلىق پەن كەلىسىم سەزى وسى قاعيداتتاردى جۇزەگە اسىرۋعا سەرپىن بەرەتىن باستاما.
مايقى بي:
«التاۋ الا بولسا, اۋىزداعى كەتەدى,
تورتەۋ تۇگەل بولسا, توبەدەگى كەلەدى», دەپ تەك ءبىر وتباسىلىق قارىم قاتىناسقا قاتىستى عانا ەمەس, سونىمەن قاتار جەر جۇزىنە پاش ەتكەن ناقىل ءسوزى بارشامىزعا ونەگە بولۋ كەرەك.
قۇران كارىمدە دە اللا تاعالا قايتا-قايتا «بولىنبەڭدەر» دەپ ايتۋى دا بەكەر ەمەس. قازىرگى كەزدە وسى ءبىر-اق جاراتۋشىمىزدىڭ بۇيرىعىن ەلەمەي كەلەمىز. ەگەر وسىلاي جالعاسا بەرەتىن بولسا, تولە بي بابامىز ايتقانداي, «بىرلىك بولماي, تىرلىك بولماس». ياعني بىرلىك بولماي, كەز-كەلگەن تىرلىككە قاجەتتى نارسەگە قول جەتكىزۋ مۇمكىن ەمەس. مەيلى ول وركەنيەت بوسىن, مادەنيەت بولسىن, ەكانوميكالىق-ساياسي جەتىستىك بولسىن. وسىنىڭ بارشاسى تەك تاتۋلىق پەن بىرلىك ارقىلى شەشىلەتىن ماسەلەلەر. دەمەك رۋحاني كەلىسىم, ۇلتتار مەن ءداستۇرلى دىندەر اراسىنداعى بىرلىك باعا جەتپەس بايلىق. وسىناۋ الماعايىپ زاماندا اتالعان قۇندىلىقتاردى ساقتاپ قالۋ بارشامىزدىڭ مىندەتىمىز. سول ءۇشىن دە الەمدىك جانە ءداستۇرلى ءدىن كوشباسشىلارى سەزىندە باس قوسىپ, وسى ماسەلەنىڭ شەشۋ جولدارىن قاراستىرۋى بىزگە اۋاداي قاجەت. قاي ءدىننىڭ وكىلى بولسىن ءوز تىرشىلىگىنىڭ تۇراقتىلىعى مەن تىنىشتىعىن قولداي وتىرىپ, الەمدىك جانە ءداستۇرلى ءدىن كوشباسشىلارى سەزىنە كەلىپ, اتسالىسادى دەگەن ويدامىز.
الەمدىك جانە ءداستۇرلى ءدىن كوشباسشىلارى سەزى قوعامدا تىنىشتىقتى, ادىلدىك بولۋىن, ادامزاتتى سوعان تاربيەلەۋ جولدارىن قاراستىراتىن يگى باستاما. ولاي بولسا, ءبىز تازا ءدىني ىستەردەن وزگە وسىنداي ۇلى مۇراتتاردى دا نىسانا ەتۋىمىز كەرەك. ويتكەنى ادام بالاسى قايىرلى دا ىزگى امالدارىمەن عانا جاراتۋشىعا جاقىندايدى. قاسيەتتى قۇراندا:ء «بىر-بىرلەرىڭە ىزگى ىستەردە, تاقۋالىقتا كومەكتەسىڭدەر. كۇنا جاساۋعا, دۇشپاندىققا جاردەمشى بولماڭدار...» دەلىنگەن. («مايدا» سۇرەسى, 2-ايات).
اللا تاعالا حالقىمىزدىڭ بىرلىگى مەن بەرەكەسىن ارتتىرىپ, تاۋەلسىزدىگىمىزدى باياندى ەتكەي! تىلەگىمىز قابىل, مۇراتىمىز اسىل بولعاي!
ناۋرىز يبات ۇلى,
ار-راحمان مەشىتىنىڭ نايب يمامى
