قازاقستان حالقى اسسامبلەياسى رەسپۋبليكالىق انالار كەڭەسىنىڭ كەڭەيتىلگەن وتىرىسىندا اسسامبلەيا توراعاسىنىڭ ورىنباسارى اۋريكا دياك, پارلامەنت سەناتىنىڭ دەپۋتاتى نۇريا نيازوۆا, باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ, قازاقستان حالقى اسسامبلەياسى رەسپۋبليكالىق انالار كەڭەسىنىڭ ءتورايىمى ءنازيپا شاناي جانە انالار كەڭەسىنىڭ مۇشەلەرى, پسيحولوگتەر, قوعامدىق ۇيىمداردىڭ مۇشەلەرى قاتىستى.
ءىس-شارانى باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ اشىپ, رەسپۋبليكالىق فورۋمعا قاتىسۋشىلاردى قۇتتىقتاپ, جيىن جۇمىسىنا ساتتىلىك تىلەدى.
سونداي-اق ءىس-شارادا باتىس قازاقستان وبلىسى انالار كەڭەسىنىڭ ءتورايىمى شالقىما حايروللاقىزى «مادەنيەتتى انا – مادەنيەتتى ۇلت» تۇجىرىمداماسىن ىسكە اسىرۋ جولىندا ورىندالىپ جاتقان 4 باعىت بويىنشا ەسەپ بەرىپ, وتباسىنداعى تاربيە, انانىڭ ءرولى تاقىرىپتارىن كەڭىنەن تالقىلادى.
ودان كەيىن قازاقستان حالقى اسسامبلەياسى رەسپۋبليكالىق انالار كەڭەسىنىڭ ءتورايىمى, قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسىنىڭ مۇشەسى ءنازيپا ىدىرىسقىزى ءسوز الىپ, بىرقاتار كەڭەس مۇشەسىن العىسحاتپەن ماراپاتتاپ, «ەل اناسى», «ايالى الاقان» اتتى سىيلىقتاردى تاپسىردى.
ەكى كۇنگە سوزىلعان ءىس-شارا اياسىندا قاتىسۋشىلار بىرنەشە سەسسياعا ءبولىنىپ, ءتۇرلى پراكتيكالىق ويىنعا, ترەنينگتەرگە قاتىستى. سالتانات سارايىندا كوپبالالى انالارمەن كەزدەسىپ, «بەسىككە سالۋ», «تۇساۋ كەسۋ» سەكىلدى قازاقتىڭ سالت-ءداستۇرىن ورىندادى. وقۋشىلار سارايىندا «دوستىق», «جاس سارباز», «ايبىن» ۇيىرمەلەرىنىڭ وقۋشىلارىمەن كەزدەسىپ, ەلەكتروندى ۆەيپكە قارسى اكتسيا وتكىزدى. سەسسيادا قازىرگى قوعامنىڭ جامان ادەتتەرى, ولارمەن كۇرەسۋ ادىستەرى, ناشاقورلىق پەن بۋللينگتىڭ الدىن الۋ ماسەلەلەرى تالقىلاندى. مىسالى, سولتۇستىك قازاقستان وبلىسىنان كەلگەن «دەمەۋ» بالالىق شاق ماسەلەلەرى بويىنشا كوورديناتسيالىق ورتالىعىنىڭ پسيحولوگ مامانى ەمير دۋلاتوۆ ويىنقۇمارلىققا تاۋەلدىلىكتىڭ پسيحولوگيالىق اسپەكتىلەرى تۋرالى قىزىقتى بايانداما جاسادى. «تەمەكىسىز» قوعامدىق قورىنىڭ اتقارۋشى ديرەكتورى, «تەمەكى تۇتىنىنەن تازا قازاقستان ءۇشىن» ۇلتتىق كواليتسياسىنىڭ كوشباسشىسى, دسم قوعامدىق كەڭەسىنىڭ مۇشەسى, دۇنيەجۇزىلىك دەنساۋلىق ساقتاۋ ۇيىمىنىڭ 2023 جىلعى «تەمەكىمەن كۇرەستە قوسقان زور ۇلەسى ءۇشىن» سىيلىعىنىڭ لاۋرەاتى ءجاميلا سادىقوۆا «زاماناۋي جامان ادەتتەر جانە ولارمەن قالاي كۇرەسەمىز؟» اتتى بايانداماسىن ونلاين وتكىزسە, «ەسىرتكىسىز بولاشاق» كورپوراتيۆتىك قورىنىڭ جەتەكشىسى جاندوس اقتاەۆ ناشاقورلىقتىڭ الدىن الۋدى وڭىرلىك دەڭگەيدە جەتىلدىرۋ ماسەلەسىن كوتەردى. «سەنىمەن بولاشاق» رەسپۋبليكالىق اتا-انالار بىرلەستىگىنىڭ باتىس قازاقستان وبلىستىق فيليالىنىڭ پسيحولوگى, پەداگوگيكا عىلىمدارىنىڭ ماگيسترى قۇرالاي شامۇراتقىزى قازىر وتە وزەكتى بولىپ تۇرعان بۋللينگ ماسەلەسىن قوزعاپ, بۋللينگ قۇربانى بولماۋ ءۇشىن نە ىستەۋ كەرەگىن ورتاعا سالدى. باتىس قازاقستان وبلىستىق پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىندا ايەلدەردى زورلىقزومبىلىقتان قورعاۋ جونىندەگى اعا ينسپەكتور, پوليتسيا مايورى ديليارا ساتاروۆا تۇرمىستىق زورلىق-زومبىلىق, ونىڭ سەبەپ-سالدارى تۋرالى مىسالدارمەن ايتىپ بەردى. قازاقستان رەسپۋبليكاسى ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, حالىق قاھارمانى, گەنەرال-مايور قايرات ۇمبەتوۆتىڭ دە اڭگىمەسى اسەرلى بولدى.
ايتپاقشى, حالىق قاھارمانى قايرات ۇمبەتوۆ ورالدىقتارعا جاقسى تانىس. ول 2014-2016 جىلدارى وسىنداعى اسكەري ءبولىمنىڭ شتاب باستىعى بولىپ قىزمەت ەتكەن بولاتىن. بۇگىندە قۇقىقتىق ءتارتىپ اسكەرىنىڭ باس تاربيەشىسى بولىپ جۇرگەن باتىردى باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ قابىلداپ, رەسپۋبليكالىق انالار كەڭەسىنە قاتىسقانى ءۇشىن العىس ايتتى. باتىسقازاقستاندىقتار قايرات جارىلقاسىن ۇلىنىڭ وبلىستاعى قىزمەتىن جانە جاستار اراسىنداعى ءپاتريوتيزمدى نىعايتۋعا قوسقان جۇمىستارىن ءالى ۇمىتقان جوق. حالىق قاھارمانى بولاشاقتا باتىس قازاقستان وبلىسىندا زاماناۋي ۇلگىدەگى اسكەري مەكتەپ-ينتەرنات سالۋ جوسپارىمەن ءبولىستى.
ايتا كەتەيىك, قازاقستان حالقى اسسامبلەياسىنىڭ انالار كەڭەسى 2013 جىلى قۇرىلعان. قازىردە ەلدىڭ بارلىق وڭىرىندە 1 712 كەڭەس جۇمىس ىستەيدى. ونىڭ 1 78-ءى اۋداندىق, 1 302-ءسى اۋىلدىق دەڭگەيدە. انالار كەڭەسى تۇركىستان (204), اقتوبە (176), باتىس قازاقستان (161) جانە الماتى وبلىستارىندا (146) ەڭ كوپ شوعىرلانعان.
ەلىمىزدەگى وتباسى ينستيتۋتىن ساقتاۋ مەن نىعايتۋدا, وسكەلەڭ ۇرپاقتى تاربيەلەۋدە, اجىراسۋلاردىڭ سانىن ازايتۋدا, جاسوسپىرىمدەر اراسىنداعى قىلمىس پەن قۇقىق بۇزۋشىلىقتىڭ الدىن الۋدا ماڭىزدى ءرول اتقارىپ كەلە جاتقان انالار كەڭەسىنىڭ ورالداعى باسقوسۋى قاتىسۋشىلار ءۇشىن ەرەكشە پايدالى بولعانى انىق.
باتىس قازاقستان وبلىسى
