اپات ايتىپ كەلمەيتىنى بارشاعا ايان. ەكى كۇنگە سوزىلعان جاۋىن-شاشىن تاۋ ەتەگىندە ەلدى مەكەندەردى ابىگەرگە سالدى. ەڭ وكىنىشتىسى, اۋىلداعى اعايىن جىلى ۇيىنەن ايىرىلىپ قالعان ەدى. ءسويتىپ, ەسكەلدى اۋدانىنا قاراستى اباي, ەشكىولمەس, قارابۇلاق اۋىلدارىنداعى قاتتى نوسەر سالدارىنان اۋلا-اۋماقتارى مەن تۇرعىن ۇيلەردى سۋ باسۋدان كەلگەن شىعىندى وتەۋگە ساراپتاما جۇرگىزىلگەن. سونىڭ ناتيجەسىندە, ءارى سمەتالىق ەسەپتەردىڭ قورىتىندىسىنا ساي بيۋدجەتتەن 403,5 ملن تەڭگە ءبولىندى. ءوڭىر اكىمى ءباسپاسوز قىزمەتىنىڭ مالىمەتىنشە, 22 ءۇي ساتىپ الۋعا – 216,8 ملن تەڭگە, 83 ۇيگە اعىمداعى جانە كۇردەلى جوندەۋ جۇرگىزۋگە 186,7 ملن تەڭگە قاراستىرىلعان.
ەسكەلدى اۋدانى اكىمدىگىنىڭ دەرەكتەرىنە قاراعاندا, جوبالىق-ساراپتامالىق جانە سمەتالىق ۇيىممەن بىرلەسىپ سۋ باسۋ سالدارىنان كەلتىرىلگەن زالالدى باعالاۋ جۇمىستارى جۇرگىزىلگەن. جالپى اۋداننىڭ اۋىلدىق ەلدى مەكەندەرىندە – 105 ءۇي, سونىڭ ىشىندە اباي اۋىلىندا – 11, ەشكىولمەس اۋىلىندا – 28, قارابۇلاق اۋىلىندا 66 ءۇي زارداپ شەككەنى انىقتالدى. زارداپ شەككەن ۇيلەردىڭ 22-ءسى بۇزىلادى, 83-ءى اعىمداعى جانە كۇردەلى جوندەۋدەن وتەدى.
«بۇگىنگى تاڭدا اۋدان اكىمدىگى 7 ءۇي ساتىپ الدى, ۇيلەرى ب ۇلىنگەن تۇرعىندار وسى ساتىپ الىنعان ۇيلەرگە قونىستانىپ جاتىر, قالعان 15 ءۇيدى ساتىپ الۋ راسىمدەرى جۇرگىزىلۋ ۇستىندە. سونداي-اق قالپىنا كەلتىرۋ قاجەت دەپ تاپقان 83 ءۇي يەلەرىنە تولەم جاسالۋدا. 21 قىركۇيەكتەگى مالىمەتكە سايكەس, قالپىنا كەلتىرۋ جۇمىستارىن جۇرگىزۋ ءۇشىن 76 ءۇيدىڭ يەلەرىنە 173,1 ملن تەڭگە تولەندى. بۇل باعىتتاعى جۇمىستار ءالى دە جالعاسىپ جاتىر», دەدى اۋدان اكىمدىگىنىڭ قىزمەتكەرلەرى.
سونىمەن قاتار قىركۇيەك ايىنىڭ سوڭىنا دەيىن جالپى ۇزىندىعى 12,7 كم بولاتىن 7 كوشەگە جالپى سوماسى 688,1 ملن تەڭگەگە ورتاشا جوندەۋ جۇمىستارىن اياقتاۋ جوسپارلانعان. بۇگىندە ەشكىولمەس, قارابۇلاق, باقتىباي اۋىلدارىنداعى 4 كوشەدە جۇمىس اياقتالىپ, ەشكىولمەس, قاراتال, قارابۇلاق اۋىلدارىنداعى 3 كوشەدە جۇمىس جالعاسىپ جاتىر.
سونداي-اق جالپى سوماسى 8,7 ملن تەڭگەگە اباي اۋىلىنداعى باقتىباي كوشەسى مەن ەشكىولمەس اۋىلىنداعى م.تىنىشباەۆ كوشەسىنە جارىق ورناتىلۋدا. كوشەلەردىڭ جالپى ۇزىندىعى – 3 شاقىرىم.
قازىر تۇرعىنداردىڭ كوڭىلى ورنىنا تۇسكەن. قىتىمىر قىس تا جاقىنداپ كەلەدى, سەلدە قالعانداردىڭ ۋايىمى وسى ەدى. اكىمدىك تاراپى بۇل جايت ءالى دە باقىلاۋدا بولاتىنىن ايتىپ وتىر.
جەتىسۋ وبلىسى
