فوتو: اباي وبلىسى اكىمدىگى
ايتا كەتسەك, پرەزيدەنت جارلىعىمەن قۇرىلعان ءۇش وبلىستا ارداگەرلەر ۇيىمىنىڭ فيليالدارى قۇرىلىپ, بۇعان دەيىن ەكى وبلىس ورتالىعىندا – قوناەۆ جانە جەزقازعان قالالارىندا ارنايى ارداگەرلەر ورتالىعى عيماراتى اشىلعان ەدى.
ءماجىلىس دەپۋتاتى وسىنداي ورتالىقتىڭ سەمەي قالاسىنان اشىلۋىنا ارنايى عيمارات ءبولىپ, كومەك كورسەتكەنى ءۇشىن وبلىس اكىمىنە ريزاشىلىعىن ءبىلدىردى.
ب.ىزمۇحامبەتوۆ ءىس-ساپار بارىسىندا اباي, شاكارىم, مۇحتار اۋەزوۆ ەسكەرتكىشتەرىنە گۇل شوقتارىن قويىپ, تاريحي-مادەني ورىنداردى ارالادى. مۇنان سوڭ وبلىستىق ارداگەرلەر كەڭەسى ورتالىعىنىڭ اشىلۋ سالتاناتىنا قاتىسىپ, وبلىس ارداگەرلەرىمەن جۇزدەستى.
ارداگەرلەر ورتالىعىنىڭ اشىلۋىنداعى سويلەگەن سوزىندە باقتىقوجا ىزمۇحامبەتوۆ: «الدىمەن قازاققا اباي مەن شاكارىمدى جانە مۇحتار اۋەزوۆتى تارتۋ ەتكەن ۇلىلار مەكەنىنىڭ بۇرىنعى مارتەبەسىن قايتارىپ, اباي وبلىسى بولىپ قايتا قۇرىلۋىمەن قۇتتىقتايمىن», دەدى.
ءماجىلىس دەپۋتاتى ارداگەرلەرگە مەملەكەت تاراپىنان بارلىق جاعداي جاسالىپ جاتقانىن اتاپ ءوتتى.
«ەلدىك ىستەردە اعا بۋىنعا تۇسەر جۇك سالماقتى. ارداگەرلەرىمىزدەن ەلدىڭ تىنىشتىعى مەن ىنتىماعى جولىندا, مەملەكەت باسشىسىنىڭ باستامالارىن تۇرعىندارعا تۇسىندىرۋدە قوعامدىق جۇمىستارعا بەلسەندى ارالاسۋىن سۇرايمىن. قازىرگى عالامتوردىڭ دامىعان ۋاقىتىندا, تەرىس پيعىلداعى اعىمدار كوبەيىپ كەتتى. وسى جاعىنان ساق بولىپ, جاستارعا دۇرىس باعىت-باعدار كورسەتۋىمىز كەرەك. اقش-تا وتكەن بۇۇ باس اسسامبلەياسىنىڭ 78-سەسسياسىنداعى جالپى دەباتتا, ياعني, ەڭ بيىك حالىقارالىق مىنبەردە ءسوز العان پرەزيدەنتىمىز كوتەرگەن ۇسىنىستارىمەن ءوزىنىڭ مىقتى ديپلومات ەكەنىن الەم ەلدەرىنىڭ الدىندا تاعى ءبىر دالەلدەدى. الدىمىزدا ارداگەرلەردىڭ ارالاسۋىن قاجەت ەتەتىن ماسەلەلەر كوپ. قوعامدا بولىپ جاتقان وزگەرىستەردى ەلدىڭ اراسىندا ءتۇسىندىرىپ جۇرۋىمىز كەرەك», دەدى ءماجىلىس دەپۋتاتى, رەسپۋبليكالىق «ارداگەرلەر ۇيىمى» قوعامدىق بىرلەستىگىنىڭ توراعاسى باقتىقوجا ىزمۇحامبەتوۆ.
كەزدەسۋ سوڭىندا ارداگەرلەردى حالىقارالىق قارتتار كۇنىمەن قۇتتىقتاپ, قوعامدىق جۇمىستارعا بەلسەندى ارالاسىپ جۇرگەن ءبىراز ارداگەرلەرگە «ارداگەرلەر ۇيىمىنىڭ» «قۇرمەتتى ارداگەر» توسبەلگىسى مەن «قۇرمەت گراموتالارىن» تابىستادى.
