فوتو: ن.بايبۋلين.
پرەزيدەنت قاسىم-جومارت توقاەۆتىڭ باستاماسىمەن ىسكە اسىرىلىپ جاتقان رەفورمالاردى زاڭنامالىق تۇرعىدا قامتاماسىز ەتۋ سەنات پەن ءماسليحاتتاردىڭ بىرلەسكەن جۇمىسىنىڭ ماڭىزدى مىندەتى ەكەنىن اتاپ وتكەن ماۋلەن اشىمباەۆ مەملەكەت باسشىسى جولداۋدا بەلگىلەپ بەرگەن باسىم باعىتتارعا نازار اۋدارىپ, ولاردى ىسكە اسىرۋ جولىندا ارىپتەستەرىن بىرلەسىپ جۇمىس ىستەۋگە شاقىردى.
«وڭىرلەردى دامىتۋ جانە ماسليحاتتارمەن بىرلەسىپ وزەكتى ماسەلەلەردى شەشۋ سەنات قىزمەتىندەگى نەگىزگى باسىمدىقتاردىڭ ءبىرى. قازىرگى تاڭدا وبلىستاردا وزەكتى پروبلەمالار از ەمەس. ولاردىڭ باسىم كوپشىلىگى ينفراقۇرىلىمعا, الەۋمەتتىك نىساندارعا, مەملەكەتتىك باعدارلامالاردىڭ ىسكە اسىرىلۋىنا قاتىستى. وسىعان بايلانىستى اباي وبلىسىنىڭ 2027 جىلعا دەيىنگى الەۋمەتتىك-ەكونوميكالىق دامۋىنىڭ كەشەندى جوسپارى بەكىتىلدى. سەنات وسى جانە باسقا دا باستامالاردىڭ ناتيجەلى ىسكە اسىرىلۋىنا جان-جاقتى قولداۋ كورسەتۋگە دايىن», دەدى سەنات سپيكەرى.
سونداي-اق سەنات توراعاسى بارلىق دەڭگەيدەگى دەپۋتاتتاردىڭ جۇيەلى تۇردە ءوزارا ءىس-قيمىل جاساسۋى ماڭىزدى ەكەنىن ايتىپ, ءماسليحات دەپۋتاتتارىن زاڭ شىعارۋ جۇمىسىنا تارتۋ قاجەتتىگىن تىلگە تيەك ەتتى. پالاتا سپيكەرى وڭىرلەردە زاڭدار مەن باسقا دا نورماتيۆتىك قۇقىقتىق اكتىلەردىڭ ورىندالۋىنا مونيتورينگ جۇرگىزۋ ماسەلەسىنە دە ەرەكشە نازار اۋداردى.
«مەملەكەت باسشىسىنىڭ جولداۋدا بەرگەن تاپسىرمالارىنا سايكەس پارلامەنت الداعى ۋاقىتتا بىرقاتار زاڭ قابىلداۋى قاجەت. ولاردىڭ قاتارىندا جاڭا سالىق, بيۋدجەت, قالا قۇرىلىسى, سۋ كودەكستەرى بار. جالپى, جىل باسىنان بەرى ازاماتتاردىڭ ءومىر ءسۇرۋ ساپاسىن ارتتىرۋعا ارنالعان كوپتەگەن زاڭ قابىلداندى. بۇل رەتتە الەۋمەتتىك كودەكستى ەرەكشە اتاپ وتۋگە بولادى. سول ارقىلى حالىقتىڭ ءال-اۋقاتىن ارتتىرۋعا ارنالعان جاڭا الەۋمەتتىك تەتىكتەر انىقتالدى. بۇگىندە ەلىمىزدە پرەزيدەنتىمىز بەكىتكەن ۇلتتىق جوبالار ىسكە اسىرىلىپ جاتىر. ولار وڭىرلەرگە تىكەلەي قاتىسى بار قۇجاتتار. وسى ورايدا زاڭدار مەن ۇلتتىق جوبالاردىڭ ورىندالۋ بارىسىن پارلامەنت جانە ءماسليحاتتار دەپۋتاتتارى تاراپىنان جۇيەلى باقىلاۋدى جولعا قويۋ اسا ماڭىزدى», دەگەن ماۋلەن اشىمباەۆ سەنات جانىنداعى جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەس پەن ء«وڭىر» دەپۋتاتتىق توبىنىڭ جۇمىسىنا توقتالدى.
سەنات سپيكەرى ءماسليحات دەپۋتاتتارىمەن جانە ءوڭىر جۇرتشىلىعىمەن كەزدەسۋ كەزىندە سەمەيدىڭ ەلىمىز ءۇشىن تاريحي ءرولى مەن ماڭىزىنا دا توقتالدى. ول وبلىستىڭ الەۋەتىن تولىق اشۋ ءۇشىن بىرلەسىپ ارەكەت ەتۋدىڭ بەرەرى مول بولارىن ايتتى.
«قاسيەتتى سەمەي – حالقىمىز ءۇشىن قاشاندا ورنى بولەك, قاستەرلى مەكەن. بۇل شاھار وتاندىق ءبىلىم مەن عىلىمنىڭ جانە ونەر مەن مادەنيەتتىڭ تاريحي ورتالىعى. وسى جەردە قازاق مەملەكەتتىلىگىنىڭ قالىپتاسۋىنا ۇلكەن ۇلەس قوسقان الاش ارىستارىنىڭ ءىزى مەن مول مۇراسى قالدى. سوندىقتان پرەزيدەنتىمىزدىڭ اباي وبلىسىن قۇرۋ تۋرالى ماڭىزدى شەشىمى دەر كەزىندە جاسالعان جانە ءوڭىردىڭ دامۋىنا تىڭ سەرپىن بەرگەن قادام بولدى. الداعى ۋاقىتتا وبلىس جاڭا قارقىنمەن داميتىنىنا سەنەمىز», دەدى ماۋلەن اشىمباەۆ.
سونىمەن قاتار سەنات توراعاسى ويشىل شاكارىم قۇدايبەردى ۇلىنىڭ 165 جىلدىعىنا ارنالعان «شاكارىم وقۋلارى-2023» اتتى عىلىمي-تاجىريبەلىك كونفەرەنتسياعا قاتىستى. ءىس-شارادا ەل دامۋىنىڭ جاڭا پاراديگماسى كەڭىنەن تالقىلاندى. ماۋلەن اشىمباەۆ اباي مەن شاكارىم مۇرالارى ەشقاشان وزەكتىلىگىن جوعالتپايتىنىن, جاس ۇرپاقتى تاربيەلەۋ جانە ۇلتتىق قۇندىلىقتاردى دارىپتەۋ ىسىندە ەكى ويشىلدىڭ وسيەتتەرى قاشاندا ماڭىزدى ەكەنىن ايتتى.
«پرەزيدەنتىمىز قاسىم-جومارت كەمەل ۇلى توقاەۆ اتاپ وتكەندەي, ۇلتتىڭ جاڭا ساپاسىن قالىپتاستىرۋ جولىندا كۇندەلىكتى ومىرلىك كوزقاراستارىمىز وزگەرۋى قاجەت. قوعامدا جاڭا قاعيداتتار مەن باعدارلار ورنىعۋعا ءتيىس. وسىنداي رۋحاني-يدەولوگيالىق مىندەتتى ىسكە اسىرۋ اياسىندا ءبىز شاكارىمنىڭ مۇراسىنا ءاردايىم ورالۋعا جانە ونى زەردەلەۋگە مىندەتتىمىز», دەدى ماۋلەن اشىمباەۆ.
سەنات سپيكەرى ساپارى اياسىندا ءوڭىردىڭ بەلسەندى جاستارىمەن, مۇگەدەكتىگى بار ادامدارعا ارنالعان ابيليتاتسيا جانە وڭالتۋ ورتالىعىنىڭ ۇجىمىمەن, سونداي-اق, شاكارىم اتىنداعى ۋنيۆەرسيتەت پەن Alikhan Bokeihan University-ءدىڭ وقىتۋشىلارىمەن كەزدەستى.
«جىلۋكوممۋنەنەرگو» كاسىپورنىنىڭ قىزمەتىمەن جانە قالا بيلىگىنىڭ شاھار ورتالىعىن اباتتاندىرۋ جوسپارىمەن دە تانىستى. ودان بولەك, ماۋلەن اشىمباەۆ باستاعان ءبىر توپ سەناتور ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىنا باردى, سونداي-اق, حاكىمنىڭ ەسكەرتكىشىنە گۇل شوقتارىن قويدى.
