ەلىمىزدىڭ الەۋمەتتىك-ەكونوميكالىق ءال-اۋقاتىن كوتەرۋگە باعىتتالعان جولداۋدا دا حالىق كوكەيىنەن شىعاتىن اقجولتاي مالىمەتتەر از بولعان جوق. پرەزيدەنت ەل ازاماتتارىنىڭ تابىسىن ارتتىرۋ ءۇشىن 2024 جىلدىڭ 1 قاڭتارىنان باستاپ ەڭ تومەنگى جالاقى مولشەرىن 85 مىڭ تەڭگەگە كوتەرۋدى ۇكىمەتكە تاپسىردى. بۇل شارا 1 ميلليون 800 مىڭ ادامنىڭ, ونىڭ ىشىندە بيۋدجەت سالاسىندا ەڭبەك ەتەتىن 350 مىڭ ازاماتتىڭ ءال-اۋقاتىن ارتتىرۋعا وڭ سەپتىگىن تيگىزەتىنى انىق. جالپى, كەيىنگى بەس جىلداعى پرەزيدەنت جولداۋلارى ءبىر-بىرىمەن بىتەقايناسىپ جاتىر. وتكەن جىلى باستاۋ العان ساياسي جاڭعىرۋ جۇمىستارى ۇلكەن ەكونوميكالىق وزگەرىسكە ۇلاستى.
وسى ورايدا «Amanat» پارتياسى مەملەكەت باسشىسىنىڭ ءاربىر جولداۋدا ءار سالاعا قاتىستى ايتىلعان تاپسىرمالارىن نەگىزگە الا وتىرىپ, قوعامنىڭ, ەلدىڭ دامۋى ءۇشىن اۋقىمدى جوبالار ۇسىنىپ, سونىڭ نەگىزىندە قىرۋار جۇمىس اتقارىپ كەلەدى. جولداۋدا پارتيالىق جوبالار دا قولداۋ تاۋىپ وتىر. ماسەلەن, «جەر اماناتى» جوباسى اياسىندا يگەرىلمەي جاتقان نەمەسە زاڭسىز بەرىلگەن 8 ميلليون گەكتار جەر مەملەكەت مەنشىگىنە قايتارىلدى. بۇل – «جەر اماناتى» كوميسسياسى جۇمىسىنىڭ ناقتى جەمىسى. وبلىستا اتالعان كوميسسيانىڭ كۇشىمەن وتكەن جىلى 113 مىڭنان اسا گەكتار جەر مەملەكەت مەنشىگىنە قايتارىلسا, جىل باسىنان بەرى 68 مىڭ گەكتار جەر قايتارىلدى. الداعى بەس جىلدا يگەرۋسىز جاتقان تاعى 190 مىڭ گەكتار جەر قايتارىلادى.
وبلىستا اۋىلدى دامىتۋعا ارنالعان جاڭا تۇجىرىمداماعا ارقاۋ بولىپ جاتقان جوبا جايلى ايتار بولساق, بۇگىندە وبلىستا باعدارلاما بويىنشا وڭىردەگى اۋىل تۇرعىندارىنىڭ تابىسىن ارتتىرۋعا 8,3 ملرد تەڭگە كولەمىندە قاراجات ءبولىندى. جوبا اياسىندا بۇگىنگى تاڭدا وبلىس بويىنشا جالپى سوماسى 2 ملرد 668 ملن تەڭگەگە ءوتىنىم ماقۇلداندى. بۇگىنگى كۇنگە اۋىل تۇرعىندارىنا 664 ملن تەڭگەدەن اسا سومادا 98 شاعىن نەسيە بەرىلدى.
نەسيە العانمەن ونى دۇرىس يگەرە الماي, ماقساتسىز جۇمساۋدىڭ سالدارىنان حالىق قارىزعا باتىپ جاتىر. قۇجاتتا بۇل ماسەلە دە پرەزيدەنتتىڭ نازارىنان تىس قالمادى. تابىستى ءومىر ءسۇرۋدىڭ كىلتى تەك اقشا تابۋدا ەمەس, ۇنەمدەي بىلۋدە. بۇل – بارشاعا ايان قاعيدات. قازىر بۇكىل الەم ۇنەمدەۋگە بەت بۇرىپ وتىر. ول سۋ رەسۋرستارىنان باستاپ, قاراپايىم وتباسى تابىسىن ۇنەمدەۋگە دە قاتىستى. ءبىز دە وسىنى ۇيرەنۋگە ءتيىسپىز. تۇرعىنداردىڭ كرەديتتى شامادان تىس الۋى دا پرەزيدەنتتى قاتتى الاڭداتىپ وتىر. بۇگىندە ميلليوننان استام وتانداسىمىز نەسيەسىن تولەي الماي ءجۇر. مەملەكەت باسشىسى بۇعان دا ناقتى جاۋاپ بەردى. وسى ورايدا ازاماتتاردى جاپپاي قارجىلىق ساۋاتتىلىققا وقىتۋدىڭ اۋقىمىن كەڭەيتۋدى تاپسىردى. «Amanat» پارتياسى بۇل جۇمىستى باستاپ كەتتى. «قارىزسىز قوعام» جوباسىنىڭ العاشقى ناتيجەلەرى كوڭىل كونشىتەرلىك. پرەزيدەنت بۇل جوبانى ۇكىمەتپەن بىرلەسىپ ىسكە اسىرۋدى تاپسىردى.
وسى ورايدا, اتالعان جوبا الماتى وبلىسىندا دا ءوز جۇمىسىن بەلسەندى جالعاستىرىپ جاتقانىن اتاپ وتكىم كەلەدى. العاشقى اپتانىڭ ناتيجەسىن كورىپ, حالىقتىڭ جوباعا دەگەن جوعارى قىزىعۋشىلىعىن بايقادىق. جىل سوڭىنا دەيىن وڭىردە 9 مىڭعا جۋىق ازاماتتىڭ قارجىلىق ساۋاتىن ارتتىرۋ جوسپارلانعان. جوبا اياسىندا قازىرگى تاڭدا 5 مىڭنان اسا تۇرعىن قارجىلىق ساۋاتىن ارتتىردى.
جولداۋدىڭ تاعى ءبىر جەتىستىگى, ەلىمىزدە سۋ رەسۋرستارى جانە يرريگاتسيا مينيسترلىگى قۇرىلدى. ويتكەنى, سۋ ماسەلەسى ەلىمىز ءۇشىن اسا وزەكتى. الماتى وبلىسىندا دا سۋدىڭ ساپاسى مەن حالىققا قولجەتىمدىلىگىنە قاتىستى ماسەلە كوپ. ەندى سۋعا قاتىستى بارلىق ماسەلەنى شەشۋ وسى ۆەدومستۆونىڭ موينىنا جۇكتەلەدى. ءوڭىردىڭ شارۋالارى جاڭادان قۇرىلعان مينيسترلىكتەن كوپ ءۇمىت كۇتەدى. جىل سايىن وڭىردە ەگىن القاپتارىن سۋارۋعا قاجەتتى مولشەردىڭ تەڭ جارتىسى ىسىراپ بولىپ جاتادى. ارىقتار مەن يرريگاتسيالىق جۇيەلەردىڭ توزىعى جەتكەن. سونداي-اق ەگىنشىلەر دە تامشىلاتىپ سۋارۋ ءادىسىن قولدانا بەرمەيدى. ال ىلە اۋدانىندا ورنالاسقان «سوربۇلاق» سۋ قويماسىنىڭ تەحنيكالىق مۇمكىندىگى تولىق يگەرىلمەي كەلەدى. قويماداعى سۋمەن 10 مىڭ گەكتاردان استام جەردى مولىنان سۋارۋعا مۇمكىندىك بار. الايدا, قازىر سۋارىلاتىن ەگىستىك كولەمى ءۇش مىڭ گەكتارعا دا جەتپەيدى. ال جاساندى كولگە 1 ملرد تەكشە مەتر سۋ سيادى.
جولداۋدان تۇيگەن باستى وي – تيىمدىلىك. ءبىز وسى تاپسىرمالاردىڭ ءبارىن جۇيەلى ءارى ءتيىمدى ورىنداساق قانا ناقتى ناتيجەگە قول جەتكىزەمىز. ءتيىمدى ەكونوميكا قالىپتاستىرىپ, يگىلىكتەرىمىزدىڭ ءبارىن – جەر, سۋ, تابيعي بايلىقتاردى ءادىل دە ءتيىمدى پايدالانۋىمىز كەرەك. سوندا عانا حالىقتىڭ ءال-اۋقاتى ارتىپ, مەملەكەتىمىز وركەندەيدى.
قۋات بايقوجاەۆ,
«Amanat» پارتياسى
الماتى وبلىستىق
فيليالىنىڭ توراعاسى
