قاراعاندى تسەلليۋلوزو-قاعاز كومبيناتى, پاۆلودار كارتون جانە رۋبەرويد زاۋىتى, «اقتوبە قاعازى», «Kagazy Recycling», «زاۆود گوفروتارا» جانە باسقالار تۇرمىستىق قاعاز شىعارسا, شىمكەنتتەگى – «Qagaz Ordasy», استاناداعى – «Goida.kz», پەتروپاۆلداعى – «رادۋگا» جشس جانە «ا ەند ك ەكسپو LTD» كەڭسە قاعازدارىن نارىققا شىعارىپ وتىر. الايدا «ەnergyprom» ساراپشىلارىنىڭ ايتۋىنشا, تەكسەرىس بارىسىندا «رادۋگانىڭ» شىن مانىندە تۇرمىستىق قاعازدار وندىرەتىنى بەلگىلى بولعان. «ا ەند ك ەكسپو LTD» كومپانياسىنىڭ دا رەسمي سايتىندا ولار شىعارىپ وتىرعان كەڭسە قاعازدارىنىڭ قازاقستاندا جاسالعاندىعى تۋرالى دەرەك جوق بولىپ شىعىپتى.
ۇلتتىق ستاتيستيكا بيۋروسىنىڭ اقپارىنشا, بىلتىر ەلىمىزدەگى كارتون جانە قاعاز ءوندىرىسى 60,1 مىڭنان 98,3 مىڭ تونناعا, 63,6 پايىزعا ارتتى. 2022 جىلعى كورسەتكىشتەر 2017 جىلمەن سالىستىرعاندا ءۇش ەسە وسكەن. بيىل قاڭتار-شىلدەدە وتكەن جىلدىڭ ۇقساس كەزەڭىندەگى كولەمدى اۋپىرىمدەپ ساقتاي العان. بۇل كاتەگوريا ستاتيستيكالىق ەسەپتەردە جالپىلاما بەرىلگەندىكتەن, ودان كەڭسە قاعازدارىنىڭ كولەمى تۋرالى اقپاراتتى ءبولىپ الۋ مۇمكىن ەمەس. ساناتتاعى ءوسىم گوفرلەنگەن كارتون ءوندىرىسى ەسەبىنەن تۋىنداعان بولۋى مۇمكىن.
«قاعاز ونەركاسىبىنىڭ كەيبىر ىشكى ساناتتارى دا سوڭعى جىلدارى ءوستى, بىراق سونشالىقتى كۇشتى ەمەس. ونەركاسىپتىك ءوندىرىس يندەكسى سوڭعى ءبىر جارىم جىلدا سالادا توقىراۋدىڭ بولعانىن كورسەتەدى. 2022 جىلى سەكتور بويىنشا ءوندىرىس كولەمى – 1,1 پايىزعا, بيىل قاڭتار-شىلدەدە 1,8 پايىزعا عانا ءوستى. وتكەن جىلى كاسىپورىندار 120,8 ملرد تەڭگەنىڭ ءونىمىن شىعاردى (2021 جىلى – 93 ملرد تەڭگە). فاكتىلەر ەلىمىزدەگى قاعاز جانە كورتون وندىرۋشىلەردىڭ تولىق جۇكتەمەمەن جۇمىس ىستەمەي وتىرعانىن ايعاقتايدى. بىلتىر جىلدىق ورتاشا قۋاتتىلىقتىڭ پايدالانىلۋ ۇلەسى 70 پايىز بولدى. بۇل سوڭعى جىلداردا تىركەلىپ وتىرعان ماكسيمالدى تسيفر. 2017 جىلى كورسەتكىش 43,2 پايىز ماڭايىندا بولعان», دەيدى ساراپشىلار.
وتاندىق كاسىپورىنداردىڭ قاعازى ءوتىپ, ساۋداسى ءجۇرۋى ءۇشىن دە مەملەكەت شەتتەن قاعاز ساتىپ الۋعا شەكتەۋ ەنگىزىپ وتىر. مىسالى, «ازاماتتارعا ارنالعان ۇكىمەت» مەملەكەتتىك كورپوراتسياسى» قاڭتاردا 701,4 ملن تەڭگەنىڭ كەڭسە قاعازىن ساتىپ الدى. وتكەن جىلى ەلىمىزگە شەتتەن 334,7 مىڭ توننا قاعاز بەن كورتون اكەلىنگەن. ەل تۇرعىندارىنىڭ قاعاز ءۇشىن شەتكە تولەگەن اقىسى 600 ملن دوللاردان اسادى. باستى جەتكىزۋشى – رەسەي. ولاردىڭ جالپى يمپورتتاعى ۇلەسى – 63,3 پايىز. ودان كەيىنگى ورىندا قىتاي تۇر (16,6 پايىز). كورشى ەكى ەلدەن بولەك, ءبىز شالعاي ورنالاسقان شري-لانكا, فيليپپين, وڭتۇستىك افريكا ەلدەرىنەن دە قاعاز ساتىپ الامىز.
