ونداعى قۇجاتتىڭ ماقساتى – جوبانىڭ قازىرگى مارتەبەسى مەن وسى جىلدىڭ سوڭىنا دەيىن كۇتىلەتىن ناتيجەلەرى تۋرالى مالىمەتتەر ەنگىزىلگەن. تسيفرلىق ۆاليۋتالاردى ىسكە اسىرۋ سالاسىنداعى وزگە دە مەملەكەتتەردىڭ تاجىريبەسىنە شولۋ جاساي كەلىپ, اتالعان تەڭگە 2025 جىلدىڭ سوڭىنا دەيىن 3 فازادا ەنگىزىلەتىندىگى, جوبانى جۇزەگە اسىرۋ جول كارتاسىنا سايكەس, بيىلعى جىلى ءبىرىنشى كەزەڭى ىسكە قوسىلاتىنى ايتىلعان. تسيفرلىق تەڭگە پلاتفورماسىنىڭ – تاجىريبەلى-ونەركاسىپتىك جانە زەرتتەۋ (R&D) اتتى ەكى كونتۋرى (دامۋ باعىتى) قۇرىلىپتى.
«تاجىريبەلى-ونەركاسىپتىك پايدالانۋدا تسيفرلىق تەڭگەنى تولەم قۇرالى رەتىندە قولدانۋ ءۇشىن بارلىق بازالىق ستسەناري ىسكە اسىرىلىپ, قارجى نارىعىنا قاتىسۋشىلارمەن جانە قارجى ينفراقۇرىلىمىنىڭ پروۆايدەرلەرىمەن ينتەگراتسيالىق بايلانىس ورناتىلعان. سونداي-اق سمارت-كەلىسىمشارتتاردى پايدالانۋ ارقىلى باعدارلاناتىن تولەم تەتىگى ەنگىزىلەدى. بۇل كونتۋر تست جۇيەسىنىڭ نەگىزگى مىندەتى مەن ونىڭ كەيىنگى جۇمىسىن جۇزەگە اسىرۋعا ارنالعان.
زەرتتەۋ كونتۋرى – ورتالىق بانكتەردىڭ تسيفرلىق ۆاليۋتالارىندا ترانسشەكارالىق ەسەپ ايىرىسۋلار تەستىلەۋدەن ءوتىپ, تسيفرلىق اكتيۆتەر يندۋسترياسىنىڭ نارىعىنا قاتىسۋشىلارمەن ءوزارا بايلانىس ورناتۋ قاراستىرىلعان», دەيدى بانك وكىلدەرى.
جوبانىڭ ءبىرىنشى فازاسىن ىسكە اسىرۋ قورىتىندىسى وسى جىلى ۇلتتىق ۆاليۋتانىڭ 30 جىلدىعىنا وراي, قازاقستان قارجىگەرلەرىنىڭ كونگرەسى اياسىندا شىعارىلاتىن بولدى.
ايتا كەتەرلىگى, تسيفرلىق تەڭگە قولما-قول جانە قولما-قولسىز اقشالاردىڭ ورنىن اۋىستىرۋعا باعىتتالماعان, باسقا ۆاليۋتالار سەكىلدى قولدانىستا قاتار جۇرە بەرەدى. اتالعان تەڭگە قارجىلىق قىزمەتتەردىڭ قولجەتىمدىلىگىن ارتتىرىپ, يننوۆاتسيالىق قارجى ونىمدەرىن جاساۋ ءۇشىن جاڭا مۇمكىندىكتەر اشاتىندىعى جانە مەملەكەتتىك شىعىستاردىڭ تيىمدىلىگىن ەسەلەپ, ترانسشەكارالىق تولەمدەر شىعىندارىن ازايتاتىن بولادى.
بۇل شەشىمدى قابىلداۋدان بۇرىن ۇلتتىق بانك قارجى نارىعىنا قاتىسۋشىلارمەن, ساراپشىلار قاۋىمداستىعىمەن جانە حالىقارالىق سەرىكتەستەرمەن بىرلەسىپ ارتىقشىلىقتار مەن تاۋەكەلدەرگە كەشەندى زەرتتەۋلەر جۇرگىزگەن.
وسىدان ءبىراز جىل بۇرىن قازىرگى تسيفرلىق دامۋ, يننوۆاتسيالار جانە اەروعارىش ونەركاسىبىنىڭ ءمينيسترى باعدات مۋسين تسيفرلىق فورماتقا كوشىرۋدى جانە مەملەكەتتىك بيۋدجەتتەن ۆاليۋتا قوزعالىسىن قاداعالاۋدى ۇسىنعان بولاتىن. بۇل – جەمقورلىقپەن كۇرەسۋدىڭ ەڭ ءتيىمدى جولى. تەك زاڭ جۇزىندە جۇمىس ىستەلۋ قاجەتتىلىگىن ايتقانى بار ەدى.
بىلتىر ۇلتتىق بانك وكىلدەرى رەسپۋبليكانىڭ جوعارى ەسەپ پالاتاسىندا تسيفرلىق تەڭگە جوباسىنىڭ تۇساۋكەسەرىن وتكىزدى. ولار تسيفرلىق تەڭگەنىڭ كادىمگى قولما-قول اقشاسىز بانكتىك تولەمدەردەن ايىرماشىلىعىن, حالىقتىڭ تولەم جانە قارجى قىزمەتتەرىنە دەگەن قولجەتىمدىلىگىن ارتتىرۋدى, ەلىمىزدىڭ ۇلتتىق تولەم جۇيەسىن ودان ءارى دامىتۋ جانە جاڭعىرتۋ مەن جاڭا سىرتقى سىن-قاتەرلەرگە بەيىمدەۋ كەرەكتىگىن تۇسىندىرگەن ەدى. جالپى, تسيفرلىق ۆاليۋتانى ەنگىزۋ بىرقاتار بىرەگەي تەحنولوگيالىق سيپاتتامالارعا بايلانىستى ەلىمىزدەگى ۇلتتىق تولەم جۇيەسىنىڭ ودان ءارى دامۋىن قامتاماسىز ەتىپ, سونىڭ ىشىندە ينتەرنەتسىز تولەم جاساۋ مۇمكىندىگى دە قاراستىرىلعان. ۇلتتىق ۆاليۋتانىڭ ءۇشىنشى ۇلگىسى رەتىندە تسيفرلىق تەڭگە سول زاڭدى تولەم قۇرالى ەكەندىگىن جانە ونىڭ باعاسى تەڭگە باعامىنا تەڭ ءارى قولما-قول نەمەسە قولما-قول ەمەس اقشاعا وڭاي ايىرباستاۋعا بولادى.
2021 جىلى ۇلتتىق بانك تسيفرلىق ۆاليۋتا تۇجىرىمداماسىنىڭ ومىرشەڭدىگىن تەكسەرۋ ءۇشىن «تسيفرلىق تەڭگە» قاناتقاقتى جوباسىن ىسكە قوستى. 2022 جىلى قارجىلىق رەتتەۋشى تسيفرلىق تەڭگەنى ەنگىزۋدىڭ پايداسى مەن شىعىندارىن زەرتتەدى. تسيفرلىق تەڭگە پلاتفورماسى – ناقتى تۇتىنۋشىلار مەن ساۋدا جانە قىزمەت كورسەتۋ كاسىپورىندارىمەن سىناقتان وتكەننەن سوڭ تسيفرلىق تەڭگەنى ەنگىزۋدىڭ 2023-2025 جىلدارعا ارنالعان جول كارتاسى دايىندالدى.
