بۇل تۇرعىدا سوعىس ارداگەرلەرىنىڭ ەرلىگى تەك باسپاسوزدە جازىلىپ قويماي, ولار تۋرالى شاعىن فيلمدەر تۇسىرىلسە جانە قازاقستان تاريحى كافەدرالارىنىڭ ماگيستر, دوكتورلىق ديپلومدىق جۇمىستارى قانداستارىمىزدىڭ جانقيارلىق ەرلىگىنە ارنالسا دەگەن تىلەگىمىز بار. ارينە بۇل ىسكە قالتالى ازاماتتار دا ۇلەس قوسىپ, ۆولونتەرلەرگە قارجىلاي كومەك قولىن سوزعانى ءجون بولار ەدى. ويتكەنى وسى ايتىلعان تىلەكتەردىڭ بارلىعى قازاق حالقىنىڭ قانىنا سىڭگەن وتانسۇيگىشتىك قاسيەتتەردى جالعاستىرۋ, جاس ۇرپاققا اتا-بابا رۋحىنا ادالدىقتى قالىپتاستىرۋدىڭ جولى بولماق.
وسى ورايدا ومبى قازاقتارىنىڭ اراسىنان شىعىپ, سول وڭىردەگى ۇلت رۋحانياتىنىڭ ورىستەۋىنە ۇلەس قوسىپ جۇرگەن ءبىر ازامات تۋرالى ايتا كەتسەم بە دەيمىن. ونىڭ اتى-ءجونى – مۇرات سارسەنباەۆ. قوعام قايراتكەرى, كاسىپكەر, مادەنيەت پەن ونەر مەتسەناتى دەڭگەيىنە ەڭبەگىمەن كوتەرىلگەن ول – ومبى وبلىسى شارباقكول اۋدانىنىڭ تۋماسى, وسىنداعى تومار مەكتەبىنىڭ تۇلەگى. تۋعان اۋىلى ورتاقشىل سەلوسىندا مونۋمەنتالدى مادەني ەسكەرتكىشتەر سالۋعا بارىنشا قولۇشىن سوزعان ازاماتتىڭ وسى باعىتتاعى يگى ىستەردى قولداۋشى رەتىندەگى قىزمەتىن ايرىقشا ايتقان ءجون. جەڭىستىڭ 70 جىلدىعى قارساڭىندا ورتاقشىل مەكتەبىنىڭ الدىندا بيىكتىگى ءۇش مەترلىك «جەڭىمپاز جاۋىنگەر» ەسكەرتكىشىن ورناتىپ, 204 ادامنىڭ ەسىمىن تۇعىرتاسقا جازدىرعان. بۇل ەسكەرتكىشتىڭ اۆتورى – ومبى سۋرەتشىسى ۆ.ي.كوستەنكو. مۇنان بولەك مۇرات سارسەنباەۆ كىندىك قانى تامعان اۋىلىندا وڭىرگە ەڭبەگىمەن تانىلعان اكەسىنە, سوعىستا شەيىت بولعان 3 اعاسىنا ەسكەرتكىش ورناتتى.
1937 جىلدىڭ قۇربانى بولعان قوشكە كەمەڭگەر ۇلى بۇل اۋىلدا جەرلەنبەسە دە, تۋعان جەرىنەن توپىراق الدىرىپ, تۋىستارىنىڭ قولداۋىمەن ەسكەرتكىش ورناتتى. سونىمەن قاتار مۇرات سارسەنباەۆ قازاقستان كومپارتياسىنىڭ ءبىرىنشى حاتشىسى بولعان جۇمابەك شاياحمەتوۆتىڭ ءومىرى مەن قىزمەتى تۋرالى ەستەلىكتەر جيناعىنىڭ ءۇش تومدىعىن ءوز قارجىسىنا شىعارىپ بەردى. ومبىنىڭ بۇگىنگى تاريحىندا توقتالاتىن, ساياسي ماڭىزى بار, ۇلتتىق رۋحىمىزدى كوتەرەتىن ءبىر ءىسى بار. ول – ومبىدا تۇرعان قازاق سۋرەتشىسى امانگەلدى شاكەنوۆ قايتىس بولعاننان كەيىن وعان قالانىڭ ناعىز ورتالىعى لەنين كوشەسىندە ءوز قارجىسىمەن ەسكەرتكىش ورناتۋى. سونداي-اق سۋرەتشىنىڭ كوزى ءتىرى كەزىندە ەڭبەكتەرىنىڭ تولىق كاتالوگىن شىعارۋعا دەمەۋشىلىك جاساعانىن يگىلىكتى ءىس دەپ بىلەمىز.
ءادىلحان قۇدايبەرگەنوۆ,
تاريح عىلىمدارىنىڭ دوكتورى, پروفەسسور
