سۋرەتتەردى تۇسىرگەن – رۋسلان كادىروۆ
تەاتر ۇجىمى گاسترولدىك ساپارلارعا پايدالانۋ ءۇشىن ىڭعايلى اۆتوبۋستى كوپتەن بەرى قاجەتسىنىپ جۇرگەن ەدى. مىنە, ەندى ءىستىڭ ورايى كەلىپ, مەرەيتوي اياسىندا 41 ورىنعا ارنالعان «King long» ماركالى زاماناۋي اۆتوبۋس ساتىپ الۋعا وبلىستىق بيۋدجەتتەن 65 ملن تەڭگە ءبولىندى. تەاتردىڭ گاسترولدىك ساپارلارعا ءجيى شىعاتىنىن ەسكەرسەك, جاڭا اۆتوبۋس ارتىستەردىڭ الىس-جاقىن جول جۇرۋلەرى ءۇشىن قولايلى بولسا, سول سياقتى كوستيۋمدەرىن, رەكۆيزيتتەرىن, دەكوراتسيالارىن تاسىمالداۋدى ايتارلىقتاي جەڭىلدەتەدى.
ماسەلەن, جاقىن ارادا تەاتر ۇجىمى قاراعاندىدا وتكەن قاليبەك قۋانىشباەۆتىڭ 130 جىلدىعىنا ارنالعان «سىن شىن بولسىن» اتتى رەسپۋبليكالىق تەاتر فەستيۆالىنە قاتىسىپ, م.سەباستياننىڭ «اتى جوق جۇلدىز» ليريكالىق دراماسىن ۇسىنىپ, ءىى ورىنعا يە بولدى. بۇل دا وبلىس ءۇشىن ۇلكەن مارتەبە.
شىعارماشىلىق ۇجىم مۇشەلەرىمەن اڭگىمەلەسكەن ءوڭىر باسشىسى بەيبىت يساباەۆ تەاتردىڭ قوعامنىڭ ادامگەرشىلىك رۋحىنداعى تاربيەسىنە جانە جالپى مادەني دامۋىنداعى رولىنە توقتالىپ ءوتتى.
«ادام تەاترعا كەلگەندە, جانى دەمالىپ, رۋحاني جاڭعىرىپ قايتادى. قازىر كوپ ۋاقىتىن الەۋمەتتىك جەلىلەردە وتكىزەتىن جاس ۇرپاق ءۇشىن تەاترداعى شەكسىز ەموتسيا, ساۋاتتى سويلەۋ مانەرىنىڭ تاربيەسى اسا ماڭىزدى. تەاتر جانە كينو اكتريساسى بيكەن ريموۆانىڭ 100 جىلدىق مەرەيتويى اياسىندا وتەتىن «BIKEN» ءى حالىقارالىق تەاتر فەستيۆالىن سىزدەرمەن بىرگە لايىقتى دەڭگەيدە وتكىزەمىز دەپ ويلايمىن, بۇل ءىس-شارا ۇلتتىق داستۇرلەر مەن قۇندىلىقتاردى ساقتاۋعا, قازاق تەاترى مەن ونەرىن دامىتۋعا ماڭىزدى ۇلەس قوسادى, ەڭ باستىسى, تەاترعا كورەرمەن تارتۋعا زور ىقپال ەتەدى», دەدى ول.
مۇنان كەيىن ءىس-شارا الماتى قالاسىنان كەلگەن «سازگەن سازى» فولكلورلىق-ەتنوگرافيالىق ءانسامبلىنىڭ كونتسەرتىمەن جالعاستى. كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى باعدات تىلەگەنوۆ. بەلگىلى مۋزىكالىق ۇجىم جەتىسۋ تۇرعىندارىنا فولكلورلىق سازعا تولى «عاسىر سازى» دەپ اتالاتىن جاندى كونتسەرتتىك باعدارلاما ۇسىندى. ءىس-شاراعا «جەتىسۋ سازى» فەا دا قاتىستى.
جەتىسۋ وبلىسى
