سۋرەتتى تۇسىرگەن – تىلەۋبەك شاياحمەت
سەنبىنىڭ تاڭىندا وسكەمەندىكتەر سوناۋ كاتونقاراعايدان بال مەن قىمىز كەلدى دەپ, اۋىلشارۋاشىلىق جارمەڭكەسىنە اسىقتى. ءبىر كۇن بۇرىن انشىلەرى مەن بيشىلەرى, قازىنالى قارتتارى ۇلكەن ساحنادا ونەر كورسەتىپ, وسكەمەن ءوڭىرىن ءان-كۇيگە بولەگەن. ەسترادا اندەرىن ەرەكشە سارىندا قۇبىلتا شىرقاپ جۇرگەن «مۇزتاۋ» ەتنوتوبى بۇل جولى دا كوپشىلىكتىڭ قوشەمەتىنە يە بولدى. ەتنواۋەن تاۋلى جەرگە ءتان بە, كومەي ءانشىسى ەدىل قۇسايىنوۆ تا سىبىزعىسىن اڭىراتىپ, ساحنا تورىنە شىقتى. از با, كوپ پە, ايتەۋىر 700 ورىندىق «ەرتىس» كونتسەرت زالىندا ينە شانشىر ورىن بولمادى. كونتسەرت بويى ونەرپازدارعا قيقۋ قوسىپ, قول سوعۋدان جالىقپاعان ەل اۋەلدە كاتونقاراعايدىڭ برەند ونىمدەرىنەن قويىلعان كورمەنى تاماشالاعان. مۇندا قىلقالام شەبەرلەرىنىڭ كارتينالارىنا دا كەلۋشىلەردىڭ نازارى اۋدى.
– كاتونقاراعاي بالىمەن, بۇعىسىمەن, قىمىزىمەن مۇقىم قازاق ەلىنە بەلگىلى اۋدان. تابيعاتى قانداي؟ تابيعاتىنا قاراي ازاماتتارى دا ەرەكشە ونەرلى. ونى دۇركىرەپ وتە شىققان كونتسەرتتە بايقاعان شىعارسىزدار, – دەپ لەبىزىن ءبىلدىردى وسكەمەن تۇرعىنى ءلاززات قاناتقىزى.
سەنبىلىك جارمەڭكە دە باسقا وڭىرلەرمەن سالىستىرعاندا وزگەشە ءوتتى. ۇلتتىق سپورت ويىندارىنان بولەك مىقتىلار بال كوتەرۋدەن, قىمىز ىشۋدەن سايىسقا ءتۇستى. وتىز كەلى بالدى 40 رەت سۇلتان امانتاي كوتەرىپ, تۇعىردان كورىنسە, ەكى ليترلىك قىمىزدى ۇزبەي ءىشىپ, ءبىر ۋاقىتتا تاۋىسقان مەرەي مەن رۋستام ءبىرىنشى ورىندى ءبولىسىپ الدى. مۇنداي سايىستار ەرتىس جاعاسىنداعى امفيتەاتردا دا ءوتىپ جاتقان. ايتا كەتەرلىگى, كاتونقاراعايلىقتار وسكەمەنگە 200 ءتۇپ سامىرسىن كوشەتىن سىيعا تارتتى.
شىعىس قازاقستان وبلىسى
