ءبىلىم الۋعا جاسالعان قولايلى ينفراقۇرىلىمدى باعالاي وتىرىپ, ستۋدەنتتەردىڭ وقۋ عيماراتتارى مەن ۇيلەرىن قاراپ شىقتى. سالا باسشىسى بيوتەحنولوگيا جانە ەكولوگيا عىلىمي-زەرتتەۋ ينستيتۋتىندا بولىپ, مەكەمەنىڭ عىلىمي قىزمەتكەرلەرىمەن كەزدەستى. ديالوگ بارىسىندا وزەكتى جوبالار مەن ولاردىڭ دامۋ الەۋەتى, اتاپ ايتقاندا, اۋىل شارۋاشىلىعى سالاسىنداعى ازىرلەمەلەرگە شوعىرلانعان مولەكۋلالىق گەنەتيكا جانە گەنوميكا زەرتحاناسىنىڭ جۇمىسى تالقىلاندى. ونداعى زەرتتەۋدىڭ ماڭىزدى باعىتى – داقىلداردىڭ يكەمدىلىگى مەن ءارتۇرلى سترەسس فاكتورعا توزىمدىلىگىن ارتتىرۋ.
ودان كەيىن مينيستر ۋنيۆەرسيتەتكە جينالعان وبلىس جۇرتشىلىعى وكىلدەرىمەن ديدارلاستى. جيىنعا تۇرعىنداردان بولەك مەملەكەتتىك جانە جەرگىلىكتى اتقارۋشى ورگانداردىڭ وكىلدەرى, پروفەسسور-وقىتۋشىلار قۇرامى مەن جوعارى وقۋ ورىندارىنىڭ ستۋدەنتتەرى قاتىستى. جيىندا ەلىمىز بەن ءوڭىرىمىزدىڭ عىلىم جانە جوعارى ءبىلىم جۇيەسىن دامىتۋدىڭ نەگىزگى ماسەلەلەرى تالقىلاندى. مينيستر ءوز سوزىندە ەلىمىزدەگى عىلىم, جوعارى ءبىلىم جانە جوعارى وقۋ ورنىنان كەيىنگى ءبىلىم سالاسىنداعى نەگىزگى جەتىستىكتەر مەن ناتيجەلەرگە شولۋ جاسادى. ول ەل بولاشاعى ءۇشىن ءبىلىم مەن عىلىمدى دامىتۋدىڭ ماڭىزدىلىعىن اتاپ ءوتىپ, مينيسترلىكتىڭ ستراتەگيالىق ماقساتتارى مەن باسىمدىقتارى تۋرالى ايتتى. ءبىلىم بەرۋ ساپاسىن جاقسارتۋعا جانە عىلىمي زەرتتەۋلەردى قولداۋعا باعىتتالعان جوسپارلار مەن مىندەتتەرگە ەرەكشە نازار اۋدارىلدى.
سونداي-اق ساياسات نۇربەك قازىرگى عىلىم مەن جوعارى ءبىلىم بەرۋ جۇيەسى الدىندا تۇرعان نەگىزگى ۇردىستەر مەن سىن-تەگەۋرىندەرگە تالداۋ جاسادى. ول جاڭا تەحنولوگيالىق جانە الەۋمەتتىك وزگەرىستەرگە بەيىمدەلۋ قاجەتىن اتاپ ءوتىپ, ءىس-شاراعا قاتىسۋشىلارعا بەلسەندى قاتىسقانى جانە پىكىر الماسقانى ءۇشىن العىسىن ءبىلدىردى.
كەزدەسۋ بارىسىندا سالا باسشىسى تۇرعىنداردىڭ سۇراقتارىنا جاۋاپ بەردى. گۋمانيتارلىق عىلىمدار جوعارى مەكتەبىنىڭ وقىتۋشى-لەكتورى 2030 جىلدان كەيىن ەلىمىزدە جوعارى ءبىلىم الۋعا ارنالعان گرانتتاردىڭ ساقتالۋىنا قاتىستى سۇراق قويدى. بۇل ماسەلە «كەلەشەك» بولاشاق ستۋدەنتتەردى وقىتۋ ءۇشىن بىرىڭعاي بىرلەسكەن جيناقتاۋ جۇيەسىن قۇرۋمەن بايلانىستى تۋىنداپ وتىر. مينيستر «مەملەكەتتىك گرانتتاردى ءبولۋ ساقتالادى, ال جوسپارلانعان «كەلەشەك» باعدارلاماسى گرانتتىڭ بولىنۋىنە ەشقانداي اسەر ەتپەيدى», دەپ جاۋاپ بەردى. بالانىڭ شوتىنداعى اقشا ونىڭ گرانتقا ءتۇسۋ-تۇسپەۋىنە قاراماستان ساقتالادى دەپ ناقتىلادى.
ءىس-شارا سوڭىندا ساياسات نۇربەك وبلىس ازاماتتارىن جەكە قابىلداپ, ولارعا جوعارى ءبىلىم مەن عىلىم بويىنشا ءوز ماسەلەلەرى مەن پىكىرلەرىن بىلدىرۋگە مۇمكىندىك بەردى. ازاماتتار وڭىردەگى ءبىلىم بەرۋ مەن عىلىمي سالانى دامىتۋعا بايلانىستى ءتۇرلى تاقىرىپتى تالقىلاۋعا بەلسەندى قاتىستى. مينيستر كەزدەسۋگە قاتىسۋشىلاردى تىڭداپ, ماڭىزدى ماسەلەلەردى بەلسەندى تالقىلاعانى ءۇشىن ريزاشىلىعىن ءبىلدىرىپ, حالىقپەن اشىق ديالوگتىڭ ماڭىزدىلىعىن اتاپ ءوتتى جانە جەتىسۋ وبلىسىنداعى ءبىلىم مەن عىلىمدى دامىتۋ ستراتەگياسىن ازىرلەۋ كەزىندە الىنعان بارلىق پىكىردى ەسكەرۋگە ۋادە بەردى.
تۇستەن كەيىن س.نۇربەك تالدىقورعان قالاسىنىڭ مەكتەپ وقۋشىلارىمەن جانە مەنتورلارمەن كەزدەسىپ, مەملەكەت باسشىسىنىڭ بيىلعى جولداۋىندا ايتىلعان جاس ۇرپاقتىڭ قاۋىپسىزدىگى, پسيحيكالىق ساۋلىعى, زورلىق-زومبىلىققا قارسى ءىس-شارالار جانە ءبىلىم ساپاسى تاقىرىبىندا ءدارىسىن وتكىزدى. ەسكە سالا كەتەيىك, تالدىقورعان قالاسىندا وبلىس اكىمى ب.يساباەۆتىڭ تاپسىرماسى بويىنشا قاناتقاقتى رەجىمدە 1 قىركۇيەكتەن باستاپ جەتىسۋ وبلىسىنىڭ قوعامدىق دامۋ باسقارماسى جانىنان «ادەپ-تاربيە جونىندەگى مەنتور» جوبالىق كەڭسەسى قۇرىلعان ەدى. ونداعى ماقسات – وقۋشىلاردىڭ تۇلعالىق دامۋىن مەنتورلىق سۇيەمەلدەۋ جانە قۇقىققا قايشى مىنەز-ق ۇلىقتىڭ بارلىق ءتۇرىنىڭ الدىن الۋ ارقىلى بىرىڭعاي تاربيە كەڭىستىگىن قالىپتاستىرۋ. جوبانىڭ مازمۇنىمەن تانىسقان مينيستر ونىڭ ماڭىزدىلىعىن اتاپ ءوتىپ, وقۋشىلاردىڭ ساۋاتتى ءومىر سۇرۋىنە, ءوز جولىن وڭاي تابۋىنا جاردەمدەسەتىنىنە سەنىم ءبىلدىردى.
جەتىسۋ وبلىسى
