سۋرەتتەردى تۇسىرگەن – اۆتور
كەشەلى-بۇگىن الەۋمەتتىك جەلىلەر مەن اقپاراتتىق سايتتاردا «شاڭىراق» مەكتەبى جابىلدى» دەگەندەي الىپقاشپا اقپارات تارادى. اقپاراتتىڭ شىندىققا جاناسپايتىندىعىن ريددەر قالاسىنىڭ بەلسەندى ازاماتتارى دا راستاپ وتىر. ال شىعىس قازاقستان وبلىستىق ءبىلىم باسقارماسىنىڭ باسشىسى ي.چەرنىشەۆا جوندەۋ جۇمىستارى تولىق اياقتالعانىن ايتتى. تەك ازدى-كوپتى قوسىمشا قاجەتتىلىك بار كورىنەدى. ايتا كەتسەك, ناۋرىز ايىندا وبلىستىق بيۋدجەتتەن 50 ملن تەڭگە قارجى ءبولىنىپ, مەكتەپ عيماراتىنا جاپسارلاس سالىنعان شاعىن سپورت زالى بۇزىلدى. سەبەبى ول اپاتتىق جاعدايدا تۇرعان. سونىمەن قاتار مەكتەپ ماڭايى اباتتاندىرىلىپ, قازىرگى سپورت زالدىڭ ەسىك-تەرەزەلەرى اۋىستىرىلدى.
– بيىلعى وقۋ جىلىندا بىردە-ءبىر مەكتەپ جابىلعان جوق. سونىڭ ىشىندە «شاڭىراق» مەكتەپ-گيمنازياسى دا ءبىلىم بەرۋ جۇمىسىن جالعاستىرىپ جاتىر. تەك عيماراتقا كۇردەلى جوندەۋ جۇمىستارى جۇرگىزىلەتىندىكتەن, وقۋشىلار باسقا مەكتەپكە كوشىرىلدى. ول ءۇشىن جوبالىق سمەتالىق قۇجات دايىندالىپ جاتىر, – دەدى باسقارما باسشىسى.
سونداي-اق ينەسسا چەرنىشەۆا «جايلى مەكتەپ» باعدارلاماسى اياسىندا قۇرىلىسى باستالعان 600 ورىندىق مەكتەپتىڭ قازاق بالالارىنىڭ يگىلىگىنە بەرىلەتىنىن ايتىپ قۋانتتى. دەمەك, قۇرىلىس سوزبالاڭعا سالىنباي ۋاقىتىلى اياقتالسا, 2024 جىلى «شاڭىراق» قازاق ورتا مەكتەپ-گيمنازياسى جاڭا مەكتەپكە كوشۋى بەك مۇمكىن. ال ەسكى عيماراتتا كۇردەلى جوندەۋ جۇمىستارى قاشان باستالىپ, قاشان اياقتالارى بەلگىسىز. «شاڭىراق» مەكتەپ-گيمنازياسىنىڭ ديرەكتورى دا بەيحابار ەكەنىن ايتتى. ەڭ باستىسى, وقۋشىلار №11 جاڭا مەكتەپتە تۇسكە دەيىن ءبىلىم الىپ ءجۇر.
– «شاڭىراق» مەكتەبىنە بولىنگەن 50 ملن تەڭگەگە اپاتتىق جاعدايدا تۇرعان شاعىن سپورت زالدى بۇزدىق. باستاۋىش سىنىپ وقيتىن كورپۋستىڭ جىلۋ جۇيەسىن, تەرەزەلەرىن اۋىستىردىق. ەدەنىن قايتا تارتتىق. ەندى جالپى مەكتەپتىڭ عيماراتى كۇردەلى جوندەۋدەن وتەدى. جوبالىق قۇجاتتارى قاشان جاسالادى, حابارىم جوق, – دەيدى اتالعان ءبىلىم مەكەمەسىنىڭ ديرەكتورى لاۋرا ابرايموۆا.
«شاڭىراق» مەكتەبىنىڭ ەسكى عيماراتىن التىنمەن اپتاپ, كۇمىسپەن قاپتاسا دا, تيپتىك مەكتەپ بولا المايدى. سول ءۇشىن دە شىعىس قازاقستان وبلىستىق ءبىلىم باسقارماسىنىڭ باسشىسى ايتقانداي, جاڭادان بوي كوتەرەتىن «جايلى مەكتەپ» قازاق مەكتەبىنە بەرىلۋگە ءتيىس. اتا-انالاردىڭ دا ارمان-تىلەگى سول.
– قازاق بالالارىنا جانىمىز اشىعاندىقتان, استاناعا ارنايى بارىپ, وقۋ-اعارتۋ مينيسترلىگىنە, پرەزيدەنت اكىمشىلىگىنە, «اmanat» پارتياسىنا جانە باس پروكۋراتۋراعا كىرىپ, ارىز-ارمانىمىزدى ايتتىق, تۇسىندىردىك. قازاق بالالارىنا جايلى قازاق مەكتەبى كەرەك دەپ ماسەلەنى ورتاعا سالدىق. ءبارى ءبىر اۋىزدان قولدادى. ءبىلىم مينيسترلىگىنىڭ وكىلدەرى «جايلى مەكتەپ» باعدارلاماسى اياسىندا سالىنىپ جاتقان مەكتەپتى 2024 جىلى قازاق مەكتەبىنە بەرۋگە ىقپال ەتەتىندىكتەرىن جەتكىزدى. قازىر «شاڭىراق» مەكتەبىنىڭ وقۋشىلارى №11 مەكتەپتە ءبىلىم الىپ جاتىر. ەشكىم ەشكىمدى قۋعان جوق. ءبارى ويداعىداي, – دەيدى قوعام بەلسەندىسى قۇرالاي سادىقوۆا.
«جايلى مەكتەپ» باعدارلاماسى اياسىندا قالانىڭ ورتالىعىنداعى 600 ورىندىق مەكتەپتىڭ «سامۇرىق قازىنا» قورىنىڭ قولداۋىمەن قۇرىلىسى باستالدى. اياقتالۋ مەرزىمى – 2024 جىلدىڭ جەلتوقسانى. باسشىلاردىڭ ايتقانى راس بولسا, كەلەسى جىلى قازاق مەكتەبىنىڭ وقۋشىلارى ونداعان جىل ارمانداعان جاڭا دا جايلى مەكتەپكە كىرەدى.
شىعىس قازاقستان وبلىسى,
ريددەر قالاسى
