فوتو: JORYQ
ون ءتورتىنشى كۇننىڭ قورىتىندىسى بويىنشا كوماندالاردىڭ جالپى ۋاقىتى:
جەتىسۋ وبلىسى – 93 ساعات 47 مينۋت 43 سەكۋند;
اقتوبە وبلىسى – 95 ساعات 06 مينۋت 37 سەكۋند;
الماتى قالاسى – 104 ساعات 23 مينۋت 57 سەكۋند;
اباي وبلىسى – 112 ساعات 12 مينۋت 46 سەكۋند.
جەڭىمپازداردى ماراپاتتاۋ سالتاناتىنا تۋريزم جانە سپورت ۆيتسە-ءمينيسترى سارسەن قۇرانبەك, «AMANAT» پارتياسىنىڭ اتقارۋشى حاتشىسى داۋلەت كارىبەك, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, تۇركىستان وبلىسى اكىمى اپپاراتىنىڭ باسشىسى ەركەعالي الىمقۇلوۆ پەن «JORYQ» ات سپورتى فەدەراتسياسىنىڭ پرەزيدەنتى باقىتجان تۇرلىبەكوۆ ارنايى قاتىستى.
« ۇلى دالا جورىعى» الەمدە جوق رەسپۋبليكالىق مارافون بايگە. بىلتىر باستالعان بۇل جوبانىڭ اۋقىمى كەڭەيىپ, ەل ىشىندە كەڭىنەن قولداۋ تاۋىپ كەلەدى.
كەلەر ۇرپاققا قاسيەتتى ات ۇستاۋ مەن بايگە ونەرىن جەتكىزۋ اسا جاۋاپتى بورىش. بۇگىنگى ءىس-شارا وسى جولدا اتقارىلىپ جاتقان ناقتى ءىستىڭ ءبىرى. ويتكەنى ول قازىرگى جاھاندانۋ داۋىرىندەگى ۇلتتىق بولمىسىمىزدى ساقتاۋدىڭ ءبىر جولى.
سول سەبەپتەن دە ۇلتتىق سپورت قاۋىمداستىعى 2 جىل قاتارىنان « ۇلى دالا جورىعى» جوباسىنا سەرىكتەس بولىپ, قولداپ كەلەدى.
بۇگىندە پرەزيدەنت قاسىم-جومارت كەمەل ۇلى توقاەۆتىڭ تىكەلەي نازارىنىڭ ارقاسىندا ۇلتتىق سپورتقا ەرەكشە كوڭىل ءبولىنىپ جاتىر. مەملەكەت باسشىسى كەلەر جىلى استانادا وتەتىن V دۇنيەجۇزىلىك كوشپەندىلەر ويىنىنا دا ايرىقشا نازار سالىپ وتىر.
« ۇلى دالا جورىعىنا» قاتىسقان شاباندوزدار كوشپەندىلەر ويىنىندا ولجا سالادى دەگەن سەنىمدەمىن», دەپ ايتتى ءوز قۇتتىقتاۋ سوزىندە ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.
سوڭعى مەجە – تۇركىستان قالاسىنا دەيىن ەڭ قىسقا ۋاقىت ىشىندە جەتكەن جەتىسۋ وبلىسىنىڭ كومانداسى باس جۇلدە – 18 000 000 تەڭگە (رەگلامەنتكە ساي) كولەمىندەگى جۇلدەمەن ماراپاتتالدى. اقتوبە وبلىسى كومانداسى 2-ءشى ورىن ءۇشىن – 16 000 000 تەڭگە, ال 3-ءشى ورىن يەگەرى الماتى قالاسىنىڭ كومانداسى 9 000 000 تەڭگەنى قانجىعاسىنا بايلادى. تورەشىلەر شەشىمىمەن, مارەگە 4-ءشى بولىپ كەلگەن اباي وبلىسىنىڭ كومانداسىنا 5 000 000 تەڭگە بەرىلدى.
سونىمەن قاتار بۇل كەزەڭدە ماڭعىستاۋ وبلىسىنىڭ اداي جىلقىسى رەكورد جاسادى. «رەكورد» كومانداسىنداعى 21 جاستاعى ماعجان ابدول ۇلى 1300 شاقىرىمنىڭ سوڭعى 50 شاقىرىمىن باعىندىرۋعا تاڭعى ساعات 7:10-دا اتتانىپ, تۇركىستانداعى مارە سىزىعىن 08 ساعات 44 مينۋت 09 سەكۋندتا ءبىرىنشى بولىپ كەستى. استانادان تۇركىستانعا دەيىنگى 1300 شاقىرىمدى باستان-اياق 1 اتپەن ەڭسەرۋدى ماقسات ەتكەن «رەكورد» كومانداسىنىڭ قۇرامى استانا قالاسى, ماڭعىستاۋ مەن جەتىسۋ وبلىستارىنىڭ شاباندوزدارىنان قۇرالعان.
مارەگە جەتىسۋلىق شاباندوز ەكىنشى بولىپ كەلسە, ارتىنشا استانالىق شاباندوز جەتىپ, «رەكورد» كومانداسى دىتتەگەن ماقساتىن ورىندادى. 1300 شاقىرىمدى 1 اتپەن باعىندىرعان ازاماتتار 1-ورىن ءۇشىن 2,5 ميلليون تەڭگە, 2-ورىنعا - 2 ميلليون تەڭگە, 3-ورىنعا - 1,5 ميلليون تەڭگە كولەمىندەگى سىياقى الدى.
«رەكورد» كومانداسىنىڭ ناتيجەسىنە توقتالساق, ماڭعىستاۋ وبلىسىنىڭ جىلقىسى 1300 شاقىرىمدى 98 ساعات 44 مينۋت 47 سەكۋندتا باعىندىردى. ال جەتىسۋ وبلىسىنىڭ تۇلپارى 100 ساعات 04 مينۋت 34 سەكۋندتا ەڭسەردى. ءۇشىنشى, استانالىق سايگ ۇلىكتىڭ ۋاقىتى 104 ساعات 28 مينۋت 11 سەكۋندتى قۇرايدى.
سونىمەن بىرگە, كومانداسى جارىستان شىعىپ قالسا دا, جورىقتى ءوز ەركىمەن جالعاستىرىپ, 1300 شاقىرىمدى جەكە دارا باعىندىرعان 10 شاباندوزدىڭ ارقايسىسىنا تورەشىلەر شەشىمىمەن 1 ميلليون تەڭگە كولەمىندەگى قارجىلاي سىيلىق بەرىلدى.
ەكى اپتالىق الامانعا قاتىسىپ, اتتىلى شاباندوزدارمەن بىرگە 1 300 شاقىرىمدى باعىندىرعان بەينەۋ اۋدانىنىڭ تۋماسى, قازاقستاننىڭ قۇرمەتتى قۇرىلىسشىسى, ەلگە بەلگىلى ۆەلوشاباندوز راببيم بوراشوۆقا دا تورەشىلەر «ەڭ ۇزدىك جانكۇيەر» نوميناتسياسىن بەلگىلىپ, 1 000 000 تەڭگە كولەمىندە قارجىلاي سىيلىق تاعايىندالدى. ماڭعىستاۋدىڭ «كوكمويناق» كومانداسىنا جانكۇيەر ۆەلوشاباندوز بۇعان دەيىنگى مارافون-بايگەگە قاتىسىپ, تۇركىستانعا دەيىنگى 1 200 شاقىرىمدى باعىندىرعان ەدى.
جالپى 5-19 قىركۇيەك ارالىعىندا مارافونشىلار ەلوردادان تۇركىستان قالاسىنا دەيىن 1300 شاقىرىمنان اسا قاشىقتىقتى باسىپ ءوتتى. مارافون 14 ساتىعا ءبولىندى. ەلىمىزدىڭ 19 وڭىرىنەن مارافونعا 1 كوماندادان قاتىستى. مارافونعا قاتىسۋشىلارعا ۇلى دالا رۋحىن سەزىنۋگە جانە كيەلى جەرلەرىمىز – جوشى حان, الاشا حان كەسەنەلەرى, تۇركى رۋحانياتىنىڭ بەسىگى تۇركىستان قالاسى سياقتى تاريحي ورىندارعا زيارات جاساۋعا مۇمكىندىك تۋدى.
ايتا كەتەيىك, « ۇلى دالا جورىعى» مارافون-بايگەسى رەسپۋبليكالىق «JORYQ» ات سپورتى فەدەراتسياسىنىڭ, تۋريزم جانە سپورت مينيسترلىگىنىڭ ۇيىمداستىرۋىمەن, «اMANAT» پارتياسىنىڭ جانە ۇلتتىق سپورت قاۋىمداستىعىنىڭ قولداۋىمەن ءوتتى.
ال, مارافون-بايگەنىڭ باس سەرىكتەسى – «Sport Qory» تۋريزم يندۋسترياسى مەن سپورتتى قولداۋ قورى.
