سەنبىلىككە وبلىس ورتالىعىنداعى مەكەمە, كاسىپورىن قىزمەتكەرلەرى مەن ەرىكتىلەر, قالا تۇرعىندارى بەلسەنە قاتىسىپ, تۋعان قالاسىنىڭ كوركەيىپ كوگالدانۋى ءۇشىن بار ۇلەسىن قوسۋعا تىرىستى. ءار ۇجىم وزدەرىنە جۇكتەلگەن اۋماقتى كۇل-قوقىستان تازارتتى. سونداي-اق الەۋمەتتىك نىسانداردىڭ اۋماعى, اۆتوموبيل جولدارىنىڭ جاعالاۋى تازالانىپ, كورىكتى ورتا قالىپتاستىرۋعا ۇلەس قوستى. سەنبىلىك باستالماس بۇرىن ۇيىمداستىرىلعان شاعىن جيىندا قالا اكىمى ەرنات ءبازىل جانە وزگە دە ەكوبەلسەندىلەر مەن بەلسەندى ازاماتتار سەنبىلىكتىڭ ماڭىزى مەن ءمانىن كوپشىلىككە جەتكىزدى.
قالاداعى مەملەكەتتىك مەكەمەلەر, قالالىق ءماسليحات, كاسىپورىندار مەن ونەر, مادەنيەت ۇجىمدارىنىڭ وكىلدەرى وزدەرىنە بەلگىلەپ بەرىلگەن اۋماقتاعى كۇل-قوقىستى تازالاپ, شاشىلىپ جاتقان قاتتى قالدىقتاردى تەرىپ, قۋراعان شوپتەردى جيناپ, تەحنيكالارعا تيەپ, بەلگىلەنگەن ورىنعا توگۋگە جونەلتىپ جاتتى. قاراتال وزەنىنىڭ بويىنداعى ورمان القابىندا وتكەن سەنبىلىك «جاسىل ىنتىماقتاستىق», «جەتىسۋ وبلىسىنىڭ Kaz Eco Patrol», «التىن ادام جەتىسۋ شەبەرلەر ورتالىعى», «جاس ۇلان» قوعامدىق بىرلەستىكتەرى ەكوبەلسەندىلەرىنىڭ قاتىسۋىمەن ءوتتى. بۇل جەرگە تالدىقورعان قالاسىنىڭ اكىمدىگى, قالالىق تۇرعىن ءۇي-كوممۋنالدىق شارۋاشىلىعى ءبولىمى, جەتىسۋ وبلىسىنىڭ ەكولوگيا دەپارتامەنتىنىڭ قولداۋىمەن 100-دەن اسا ەكوەرىكتى جينالىپ, قاراتال وزەنىنىڭ بويىن قوقىستان تازالاپ شىقتى.
– ءبىزدىڭ ورتاق ماقساتىمىز – قورشاعان ورتانىڭ لاستانۋ ماسەلەسىنە نازار اۋدارۋ, تۇرعىنداردىڭ, مەملەكەتتىڭ قوقىسپەن كۇرەسۋ جونىندەگى كۇش-جىگەرىن بىرىكتىرۋ. تۇرعىندار جازدا وزەن سۋىنا شومىلادى, مال جايىلادى, جانۋارلار سۋ ىشەدى, ال وزەننىڭ سۋىن لاستاپ جاتقان قوقىستار ولارعا ۇلكەن قاۋىپ توندىرەدى. سونداي-اق جىل سايىن «قىزىل تاس» ساياجايىنا كەلەتىن دەمالۋشىلاردىڭ قاتارى كوبەيىپ وتىر. ال جول بويىندا شاشىلىپ, تاۋ-تاۋ بولىپ ءۇيىلىپ جاتقان قوقىستار ولاردىڭ كوڭىل كۇيىنە تەرىس اسەر ەتەدى. سوندىقتان قاراتال وزەنىنىڭ جاعاسىن تازا ۇستاۋ, پوليەتيلەن پاكەتتەر مەن باسقا دا قوقىستاردى جيناۋ اسا ماڭىزدى. سەنبىلىكتە قوقىس تازالاۋمەن قاتار وسىنداي ماڭىزدى ماسەلەنى تۇرعىنداردىڭ ەسىنە سالۋعا تىرىستىق, – دەيدى «التىن ادام» جەتىسۋ شەبەرلەرى ورتالىعى» قب-نىڭ ديرەكتورى دينارا باكىروۆا.
ءبىز ۇرپاقتارىمىزدىڭ جارقىن بولاشاعى ءۇشىن تۋعان ولكەمىزدى تازا ۇستاۋعا ءتيىسپىز. بۇل ماسەلە وبلىستا وتكىر قويىلا باستادى. ويتكەنى وبلىستىڭ بۇگىنگى تاڭداعى الەۋەتىن تۋريزم سالاسى ەسەلەي تۇسەتىندىكتەن وسى باعىتپەن ارنايى اينالىسۋدى ماقسات ەتكەن «جاسىل نيەتتەستىك» قوعامدىق بىرلەستىگىنىڭ وكىلدەرى دە سول جەردەن تابىلدى.
– وبلىستا بارلىعى 332 تۋريستىك نىسان بار. ونىڭ باسىم بولىگى تابيعي دەمالىس ايماعى. ءبىزدىڭ جوبا تۋريستىك ايماقتاردا ەكوبەلسەندىلەر جەلىسىن قالىپتاستىرۋعا جانە ىشكى تۋريزم سالاسىنا باعىتتالعان. سوندىقتان ەكولوگيالىق بەلسەندىلىك داعدىسىن قالىپتاستىرۋعا قاتىستى ءىس-شارالارعا دا اتسالىسامىز, – دەيدى «جاسىل نيەتتەستىك» قب جەتەكشىسى ءاليا احمەديەۆا.
اتالعان ءىس-شاراعا قالاداعى ءى.جانسۇگىروۆ اتىنداعى جەتىسۋ ۋنيۆەرسيتەتى جانە كوللەدج ستۋدەنتتەرى, ىنتالى مەكتەپ وقۋشىلارى قاتىستى.
– ءبىز تازالىقپەن كۇندە اينالىسامىز. ءۇيىمىزدى جينايمىز, اۋلامىزدى تازالايمىز. ادەمى بولىپ جۇرگىمىز كەلەدى. بىراق جەكە تازالىعىمىزعا كوڭىل ءبولىپ, اۋلامىزدى تازا ۇستاعانىمىزبەن اينالامىزداعى قورشاعان ورتا قوقىسقا تولى بولىپ جاتسا, ونىڭ ەشقانداي دا ماڭىزى بولمايدى. سوندىقتان وسىنداي ەكولوگيالىق ءىس-شارالارعا بەلسەندى قاتىسامىن, – دەيدى ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ 1-كۋرس ستۋدەنتى اياجان قابىلماجىنوۆا.
جەتىسۋ وبلىسى
