ساۋلە ەسەمبەكقىزىنىڭ «جۋرناليستيكا جانە شەشەندىك ونەر», «باق ءتىلى مەن ءستيلى», «كىتاپ ىسىندەگى لوگيستيكا», «سپورتيۆنايا جۋرناليستيكا» اتتى ەڭبەكتەرىنىڭ بىرقاتارى جوعارى وقۋ ورنىندا مىندەتتى جانە تاڭداۋ پاندەرى قاتارىنا ەنگىزىلۋى – ۇلكەن جەتىستىك. بۇگىندە مەرەيلى جاسقا كەلگەن ۇستاز وسىناۋ جەتىستىگىمەن اتا-اناسى بەرگەن تاربيەسى مەن تاعىلىمىن اقتادىم دەپ شۇكىر ەتەدى.
«اتا-انامنىڭ «ۇلكەنگە – قۇرمەت, كىشىگە – ىزەت» جاساۋدى جادىڭدا ۇستا, اداسپايسىڭ. ورتاڭ ۇلكەن, سىيلاسارىڭ كوپ بولادى» دەگەن تاربيەسى ەس بىلگەننەن جادىمدا. وتباسىندا جالعىز اعام بالتاباي جانە ءۇش ءسىڭلىم زاۋرە, قىمبات, انار بەسەۋمىز وتە تاتۋ وستىك. اعام ەكەۋمىز تەتە وستىك. وتكەن جىلدارداعى ىندەت كەسەلى اعاتايىمدى ارامىزدان الىپ كەتتى. شانا, شاڭعى, ۆەلوسيپەد, دويبى, كۇرەس, دوپپەن جارىسۋدا الدىنا جان سالمايتىن ەدى. مەن ۆولەيبول, باسكەتبولدى ەرەكشە ۇناتتىم. مەكتەپتە سپورتتىڭ وسى ەكى تۇرىنەن توپ كاپيتانى بولدىم. 2020 جىلعا دەيىن فاكۋلتەتتىڭ سپورت جانكۇيەرلەرى قۇرامىندا بولىپ, فاكۋلتەتارالىق جارىستارعا قاتىستىم. كۇنى بۇگىنگە دەيىن ايىنا ەكى رەت فيتنەسكە بارامىن. انام كەنەش, جەڭگەم رىسكەن ءانشى بولدى. مەنىڭ دە ءان ايتىپ, اسابا بولىپ جۇرەتىنىم بار», دەدى كەيىپكەرىمىز بالا كەزىن ەسكە الىپ.
ساۋلە رامازان ەسىمدى ازاماتتىڭ ەتەگىنەن ۇستاپ, تۇرمىس قۇردى. جۇبايى – بۇگىندە ىشكى ىستەر قىزمەتىنىڭ ارداگەرى. ۇلى – رۋسلان قۇقىقتانۋ عىلىمدارىنىڭ كانديداتى, جوعارعى سوت اكادەمياسىنىڭ دوتسەنتى. ال ساعىنىشى «استانا بالەت» اكادەمياسىندا تاربيە ءبولىمىن باسقارادى. كىشى قىزى سالتانات – كاسىپكەر. بۇگىندە قاريالار وسى بالالارىنان راقات كورىپ, توعىز نەمەرە مەن ءبىر جيەن شوبەرەنىڭ ورتاسىندا باقىتتى عۇمىر كەشىپ جاتىر. ولاردىڭ ۇلكەن نەمەرەسى – تۇركيادا, ەكى نەمەرەسى – زياتكەرلىك مەكتەپتە, تورتەۋى اعىلشىن مەكتەبىندە وقيدى. توعىزىنشى سىنىپتا وقيتىن ساميرا نەمەرەسى فانتاستيكالىق اڭگىمە جازۋدان جۇلدەلى ورىن الىپ, ارناۋلى جيناققا ەندى. ءاسليما بوكسپەن, راسۋل باسكەتبولمەن, مانسۇر, بەيبارىس فۋتبولمەن شۇعىلدانادى. ايعانىم سۋرەت سالادى. بارلىعى دا انا تىلىندە وقيدى, جازادى.
«ومىرگە كەلگەننەن كەيىن, ادامنىڭ جان-دۇنيە الەمىنىڭ بايلىعى وتباسىمەن بولادى ەكەن. وتباسىنىڭ جىلۋى – اكە مەن شەشە مەيىرىمى. ءوز شاڭىراعىڭدى كوتەرۋ – ۇلكەن باقىت. ودان كەيىن ءومىرىڭنىڭ, تاربيە مەن ءتالىمىڭنىڭ جالعاسى – ۇرپاعىڭ. ۇلكەن-كىشى وتباسى ءومىردىڭ ۇزىلمەيتىن ءجىبى ەكەن. اقىن كاكىمبەك سالىقوۆ اعامىز ايتقانداي, «بىرەۋ ەرتە, بىرەۋ كەش, ءبىر قۇلايدى». ءومىر كوشى ۇرپاعىڭمەن جالعاسا بەرەدى. قازاعىمىزدىڭ جەتى اتا تۋرالى تەرەڭ عيبراتى – كەمەڭگەرلىك. كەمەل جاستىڭ بيىگىنەن ءوسۋ جولىمدى ويمەن شولسام, قيىندىعى مەن قىزىعى مول ومىرلىك ۇلكەن مەكتەپ ەكەن», دەيدى س.تاپانوۆا.
ساۋلە قىرىق جىلداي ۇستاز, باسشى قىزمەتىندە ءجۇرىپ, اۋىلدىق كەڭەستىڭ جەتەكشىسى قىزمەتىن ابىرويمەن اتقارعان, جاڭاارقا اۋدانىنىڭ قۇرمەتتى ازاماتى اتانعان ەسەمبەكتەي اكەنىڭ, كەنەشتەي انانىڭ جولىن قۋىپ, مەكتەپتەن كەيىن ۇستازدىق جولدى تاڭدادى. ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ فيلولوگيا فاكۋلتەتىن جاقسى ءتامامداپ, ەڭبەك جولىن جۋرناليستىك سالادا باستادى.
«1975 جىلى جاڭادان اشىلعان وبلىستىق «جەزقازعان تۋى» گازەتىندە كوررەكتور بولىپ ەڭبەك جولىمدى باستادىم. مەكتەپتەن جۇمىس تاپپادىم دەمەيمىن. وقۋشى كەزىمدە-اق جازۋ-سىزۋعا قابىلەتىمنىڭ بارىن بايقادىم. وبلىستىق گازەت اشىلدى دەگەندە ەلەڭ ەتە قالدىم. ءوز قارىم-قابىلەتىمدى جۋرناليستىك ورتادا بايقاعىم كەلدى. سول كەزدەن-اق پەداگوگيكا مەن جۋرناليستيكا سالاسى ەگىز ۇعىمداي بولدى. بۇل ەكى ماماندىق ادام پسيحولوگياسىمەن, حالىق ومىرىمەن تىكەلەي بايلانىستى. مەنىڭ بازالىق پەداگوگيكالىق ءبىلىمىم جۋرناليستىك سالاداعى تاجىريبەمەن تولىعا ءتۇستى. ءو.ا.بايقوڭىروۆ اتىنداعى جەزقازعان ۋنيۆەرسيتەتىنىڭ قازاق ءتىلى مەن ادەبيەتى كافەدراسىندا وقىتۋشى, اعا وقىتۋشى, دوتسەنت, پروفەسسور, كافەدرا مەڭگەرۋشىسى قىزمەتتەرىندە پەداگوگيكالىق ءبىلىم مەن جۋرناليستىك جۇمىستىڭ ءبىر-بىرىمەن تىعىز بايلانىستى ەكەنىن ءتۇسىندىم. 2010 جىلى استاناعا قونىس اۋدارىپ, جۋرناليستيكانى تاڭدادىم. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتى ءباسپاسوز جانە باسپا ءىسى كافەدراسىنىڭ پروفەسسورى قىزمەتىندە مامان جۋرناليستەر دايارلاۋ ىسىنە تۇبەگەيلى بەت بۇردىم», دەدى كەيىپكەرىمىز.
ساۋلە ەسەمبەكقىزىنىڭ 2010 جىلدان كۇنى بۇگىنگە دەيىن وسى ۋنيۆەرسيتەتتە ەڭبەك ەتىپ جۇرگەنىن ەل بىلەدى. «ەڭبەگىڭ جانسىن!» دەگەن العىس يەسىنىڭ ءبىرى. «جوو-نىڭ ۇزدىك وقىتۋشىسى», ء«بىلىم بەرۋ ءىسىنىڭ ۇزدىگى», ء«بىلىم بەرۋ ءىسىنىڭ قۇرمەتتى قىزمەتكەرى», «جەزقازعان ۋنيۆەرسيتەتىنىڭ قۇرمەتتى پروفەسسورى» سياقتى ماراپاتتارى – جەمىستى ەڭبەگىنىڭ ناتيجەسى. ەندەشە, وسىناۋ ەسەلى ەڭبەكتىڭ قىزىعى ۇرپاق قۋانىشىنا جالعاسا بەرسىن دەگەن تىلەك قوسامىز.
سايراش ابىشقىزى,
قازاقستاننىڭ ەڭبەك سىڭىرگەن قايراتكەرى
