– ءبىز وسىنداي باستاما كوتەردىك, بىراق ەشكىمدى مىندەتتەمەيمىز. كىمگە ۇنامدى, كيسىن. كيگىسى كەلمەسە, مەكتەپتىڭ بەكىتىلگەن فورماسىمەن كەلە بەرەدى. كەيبىر وتباسىلارىنىڭ قولدارى قىسقا بولۋى سەبەپتى ۇلتتىق ۇلگىدەگى كيىمدەردى تىكتىرە الماۋى دا مۇمكىن. سونىڭ ءبارىن ەسكەرە كەلە مىندەتتەۋدى ارتىق كوردىك. بىراق باستاما اتا-انالار تاراپىنان جاقسى قولداۋ تاپتى. ۇلتتىق كيىم كيۋ وقۋشىلارعا عانا ەمەس, مۇعالىمدەرگە دە, تەحنيكالىق قىزمەتكەرلەرگە دە قاتىستى, – دەگەن مەكتەپ باسشىسى دانا باقتىبايقىزى باستاما تۇسىنىستىكپەن جۇزەگە اسىپ جاتقانىن جەتكىزدى.
بىرنەشە سىنىپتاردى ارالاپ كوردىك. بالالارمەن دە, مۇعالىمدەرمەن دە پىكىرلەستىك.
– سىنىپ بولىپ ءبارىمىز بىرتۇستەس كيىم تىكتىرۋگە كەلىستىك. اتا-انالارىمىز قۋانا كەلىسىپ جاتىر. تىگىنشى دە ءوز ارامىزدان تابىلدى. ايدانا كەڭبەيىلوۆا ەسىمدى اپامىزدىڭ قولى شەبەر ەكەن. بارلىق بالاعا سول كىسى ءوزى تىگىپ بەرىپ جاتىر, – دەيدى 4 «ا» سىنىبىنىڭ جەتەكشىسى التىناي بەكتاسوۆا.
بۇل شارۋا مەكتەپ ديرەكتورىنىڭ تاربيە ءىسى جونىندەگى ورىنباسارى اينۇر بايانبەكوۆانىڭ تىكەلەي باقىلاۋىندا كورىنەدى.
– ءبارى بىردەن بولا قالمايدى عوي. بۇرىن ناۋرىز, تاۋەلسىزدىك مەرەكەسى كەزىندە قازاقى ناقىشتا كيىنەتىن بولساق, ەندى اپتا سايىن ءبىر كۇندى وسىلاي بەلگىلەپ وتىرمىز. مۇمكىن, سويتە-سويتە مەكتەپ فورماسىن ۇلتتىق ناقىشقا وزگەرتەرمىز. مۇنى كەلەشەك كورسەتەدى. اسىرەسە تومەنگى سىنىپ وقۋشىلارىنىڭ قىزىعۋشىلىعى باسىم ەكەنى بايقالادى, – دەگەن ول ۇلتتىق كيىمدى ناسيحاتتاۋدان جالىقپاۋ كەرەكتىگىن ايتادى.
عۇلاما قانىش اتىنداعى قالانىڭ باتىر باۋكەڭنىڭ ەسىمىن يەلەنگەن مەكتەپ-گيمنازياسىنىڭ بۇل باستاماسى بارشاعا جۇعىستى بولعاي!
ۇلىتاۋ وبلىسى,
ساتباەۆ قالاسى
