فوتو: https://polisia.kz/
ۇلان اۋدانىنداعى شارۋا قوجالىق يەسى جايىلىمداعى 54 جاس جىلقىسىنان كوز جازىپ قالعانى تۋرالى اۋداندىق پوليتسيا بولىمىنە ارىزدانعان. جىلقىسىنىڭ ىشىندە ءبىر بيەنىڭ موينىندا GPS ترەكەرى بولعانىن ايتقان. ارنايى قۇرىلعى GPS ترەكەر اجىراتىلعانىن انىقتاعان. ءتارتىپ ساقشىلارى دەرەۋ ىزدەۋ جۇمىستارىنا كىرىسىپ, تىكۇشاق جانە درون ارقىلى اۋماقتى باقىلاۋعا الدى.
«جەدەل-تەرگەۋ شارالارىنىڭ ناتيجەسىندە GPS ترەكەرى بار بيەنى اتىپ ولتىرگەن اباي وبلىسىنىڭ بۇرىن سوتتالعان 46 جاستاعى تۇرعىنى انىقتالدى. كۇدىكتى تۇراتىن ءۇيدى تەكسەرۋ جانە ءتىنتۋ جۇرگىزۋ كەزىندە قۇقىق قورعاۋ ورگاندارى مال قوراسىنان زاتتاي دالەلدەمەلەردى تاركىلەدى. اتالعان فاكتى بويىنشا شقو پد قر قك-ءنىڭ 188-1-بابى 4-بولىگى (مال ۇرلاۋ) بويىنشا سوتقا دەيىنگى تەرگەۋ باستادى. قازىرگى ۋاقىتتا سوت ساراپتامالارى تاعايىندالدى, تەرگەۋ ءىس-شارالارى جۇرگىزىلىپ جاتىر», دەپ جازىلعان حابارلامادا.
