سوڭعى وتكەن پارلامەنت سايلاۋىنا حالىق كوپ ءۇمىت ارتىپ ەدى. بىراق سول ءۇمىت اقتالدى ما؟ جەزقازعاندا سايلاۋ ناۋقانىندا سايلاۋشىلارىمەن كوپ كەزدەسپەگەن ۇمىتكەردىڭ دەپۋتات بولىپ كەتكەنى الەۋمەتتىك جەلىدە ءبىراز تالقىعا ءتۇستى. ول ساياسي ناۋقاننان ءسال بۇرىن عانا ءىرى كاسىپورىنعا تاعايىندالعان باسشى ەدى. ەگەر بۇرىننان ىستەپ كەلە جاتقان, ەلگە بەلگىلى ازامات بولسا ءبىر ءسارى. حالىق «وڭىرگە بەلگىلى ادام نەگە دەپۋتات بولا المايدى؟» دەستى. بىلاي قاراساڭ, قيسىنعا كەلەتىن ءۋاج.
ەكى جىلدان بەرى جەرگىلىكتى دەڭگەيدە ءوتىپ جاتقان اكىمدەر سايلاۋلارىندا دا كىمنىڭ جەڭەتىنى الدىن الا بەلگىلى بولىپ جاتادى. سايلاۋداعى كەلەڭسىزدىكتەر پرەزيدەنت باستامالارىنا كولەڭكە تۇسىرەدى. بىراق سىن نەگىزىنەن جەرگىلىكتى بيلىككە باعىتتالعانى اقيقات. سوندىقتان الداعى ۋاقىتتا وتكىزىلەتىن اۋدان جانە وبلىستىق دەڭگەيدەگى قالا اكىمدەرىن سايلاۋلاردىڭ ادىلەتتى ءوتۋى بارىمىزگە بايلانىستى. سايلاۋ ادىلەتتى بولماي ادىلەتتى قازاقستان دا ورنامايدى.
سايلاۋعا كوپشىلىكتىڭ سەنىمىن نىعايتۋ ءۇشىن, ەڭ الدىمەن, سايلاۋ كوميسسيالارىن تۇگەلدەي جاڭارتۋ كەرەك. «ەلىمىزدە تسيفرلاندىرۋ دامىعان, كورشى ەلدەردەن وزىقپىز» دەپ ايتىلادى. ەندەشە نەگە سايلاۋ كەزىندە تسيفرلاندىرۋ قىزمەتىن پايدالانباسقا؟ سايلاۋ كوميسسيالارىنىڭ مۇشەلەرىن قالاي تاعايىنداۋ كەرەك؟ كوميسسيا قۇرامىندا بارلىق پارتيالاردىڭ وكىلدەرى بولعانى ءجون. دەگەنمەن مۇندا دا ويلانتاتىن تۇستار بار. جەرگىلىكتى جەرلەردە پارتيالاردىڭ كۇش -قۋاتى قانداي؟ اتى بار دا زاتى جوق پارتيالاردىڭ وكىلدەرى سايلاۋ كوميسسيالارىنا قالاي مۇشە بولا الادى؟ ويتكەنى جەزقازعاندا ەلىمىزدەگى كەيبىر پارتيالاردىڭ فيليالدارى دا جوق.
سوندىقتان سايلاۋ كوميسسيالارىنىڭ مۇشەلەرىن ءارتۇرلى دەڭگەيدەگى قوعامدىق كەڭەستەر ارقىلى سايلاۋدى ۇسىنامىن. بيىلعى كۇزدە وبلىستا قاناتقاقتى جوبا رەتىندە ءبىر اۋداندا اكىم سايلاۋى وتەدى. قازىردىڭ وزىندە دايىندىق جۇمىستارى باستالىپ كەتتى. بىراق سايلاۋ كوميسسيالارى سول بۇرىنعى قالپىندا قالا بەرسە, ەشقانداي وزگەرىس بولمايدى. سايلاۋ سايقىمازاققا اينالماسىن دەسەك, وزگەرىستى سايلاۋ كوميسسيالارىن جاڭادان جاساقتاۋدان باستايىق.
بۇل ماسەلەنى پرەزيدەنت قاسىم-جومارت توقاەۆ بيىلعى جولداۋىندا دا كوتەردى. قۇجاتتا ايماقتاعى اتقارۋشى بيلىكتىڭ شەشىم قابىلداۋ ىسىنە ازاماتتاردىڭ تىكەلەي قاتىسۋ مۇمكىندىگىن بىرتىندەپ ارتتىرۋ ماسەلەسى ءسوز بولدى. «اۋىل, كەنت جانە اۋىلدىق وكرۋگ اكىمدەرىن تۇرعىندار وزدەرى سايلاي باستاعانىنا ەكى جىلدان استى. سودان بەرى اۋىلدىق دەڭگەيدەگى اكىمدەردىڭ تورتتەن ءۇشى سايلاندى. ەندى اۋدان جانە وبلىستىق دەڭگەيدەگى قالا اكىمدەرىن سايلاپ كورەمىز», دەگەن مەملەكەت باسشىسىنىڭ ەلىمىزدەگى ساياسي رەفورمالاردى ودان ءارى جالعاستىرۋعا مۇددەلى ەكەندىگىن بايقاتادى.
ابزالبەك مولاقوۆ,
جەزقازعان قالالىق قوعامدىق كەڭەس توراعاسى
