فوتو: https://web.telegram.org/
مەملەكەت باسشىسى قاسىم-جومارت توقاەۆ ورتالىق ازيا ەلدەرىنىڭ بىرلىگى جاندانا تۇسكەنىنە توقتالدى.
«وزدەرىڭىزگە ءمالىم, سوڭعى جىلدارى «ورتالىق ازيا +» فورماتى اياسىنداعى ىنتىماقتاستىق ايتارلىقتاي جاندانا ءتۇستى. اتالعان فورماتتار بارىنشا ءتيىمدى بولۋى ءۇشىن ۇلتتىق مۇددەلەرىمىزدى ەسكەرە وتىرىپ, ولاردىڭ ساپالى مازمۇنىن بىرلەسە بايىتا ءتۇسۋىمىز قاجەت. ءبىزدىڭ ويىمىزشا, ورتاق نەمەسە بارىنشا ۇقساس ۇستانىمعا كەلىپ, الەمدىك قوعامداستىققا ىنتىماعىمىز بەن بىرلىگىمىزدى كورسەتۋ ماڭىزدى», دەدى پرەزيدەنت.
گەوساياسي جاعداي قۇبىلىپ تۇرعان قازىرگى كەزەڭدە بەس ەلدىڭ تىنىشتىعىن شىتىناتۋدى كوزدەيتىندەردىڭ تالپىنىسى بار ەكەنىن دە ەسكەرتتى.
«الەمدەگى ءتارتىپ تەز وزگەرىپ, ءبىزدىڭ ءوڭىردىڭ تۇراقتىلىعىن بۇزۋعا تالپىنىستار جاسالىپ جاتقان جاعدايدا ەلدەرىمىزدىڭ قاۋىپسىزدىك سالاسىنداعى ءوزارا ءىس-قيمىل تەتىكتەرىن جەتىلدىرۋدىڭ ماڭىزى ارتا ءتۇستى. قۇرمەتتى پرەزيدەنتتەر, اتالعان ماڭىزدى سالادا تۇراقتى كونسۋلتاتسيالار مەحانيزمىن ىسكە قوسۋ جونىندەگى قازاقستاننىڭ باستاماسىنا قولداۋ بىلدىرگەندەرىڭىز ءۇشىن سىزدەرگە العىس ايتامىن», دەدى مەملەكەت باسشىسى.
كەزدەسۋ بارىسىندا قاسىم-جومارت كەمەل ۇلى ورتالىق ازياداعى قاۋىپسىزدىك جانە ىنتىماقتاستىق جونىندەگى ديالوگتى كەلەسى جىلى قازاقستاندا وتكىزۋدى ۇسىندى.
