جاھاندىق جارىسقا الەمنىڭ تۇكپىر-تۇكپىرىنەن 32 ەلدىڭ وكىلدەرى قاتىستى. 25 جاسقا دەيىنگى 600 جاس مامان باق سىناعان چەمپيونات پولشانىڭ گدانسك قالاسىندا ۇيىمداستىرىلدى. ۇلتتىق قۇراماعا 28 قاتىسۋشى جانە 25 حالىقارالىق ساراپشى كىرىپ, 25 باعىت بويىنشا سىنعا ءتۇستى. ورال اقپاراتتىق تەحنولوگيالار كوللەدجىنىڭ ستۋدەنتى رۋسلان يۋسۋپوۆ «ۆەب-تەحنولوگيالار» باعىتى بويىنشا كۇمىس مەدال يەلەندى. ال قوستاناي اۆتوموبيل كولىگى كوللەدجىنىڭ وكىلدەرى اندرەي ستەپانيۋك پەن ستانيسلاۆ گوريتسين «جەلىلىك جانە جۇيەلىك اكىمشىلەندىرۋ» باعىتى بويىنشا قولا جۇلدەنى قورجىنعا سالدى.
حالىقارالىق جارىسقا ستۋدەنتتەردىڭ بارلىعى قاتىسا الادى. ول ءۇشىن وڭىرلىك, رەسپۋبليكالىق ىرىكتەۋ جارىستارىنان سۇرىنبەي ءوتۋ قاجەت. وسى جولى جۇلدەمەن ورالعان جاستارعا جوعارى وقۋ ورىندارىندا تەگىن ءبىلىم الۋ مۇمكىندىگىمەن قاتار, باسقا دا باعالى سىيلىقتار بەرىلەدى.
– بۇل جەڭىس – پەداگوگتەر مەن وندىرىستىك وقىتۋ شەبەرلەرىنىڭ كاسىبي قىزمەتىنىڭ جەمىسى. قاجىرلى ەڭبەكپەن كەلگەن جەتىستىك وزگە جاستارعا دا ۇلگى بولادى. ۇزدىك ناتيجەمەن ورالعان بالالار ەلىمىزدىڭ بارلىق ايماعىن ارالاپ, ستۋدەنتتەرگە شەبەرلىك ساباعىن وتكىزەدى. ولار قاتارلاستارىنا حالىقارالىق ءبىلىم جارىستارىندا قالاي جەتىستىككە جەتۋگە بولاتىنىن تۇسىندىرەدى, – دەدى وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى سەرىك جارتىباەۆ.
EuroSkills چەمپيوناتى – ەۋروپاداعى كاسىپتىك ءبىلىم بەرۋ جانە بىلىكتىلىكتى ارتتىرۋ سالاسىنداعى ماڭىزدى ءىس-شارا. ەڭ ءىرى حالىقارالىق كاسىبي شەبەرلىك دوداسى WorldSkills Europe-گە قاتىسۋشى ەلدەردىڭ بىرىندە ەكى جىل سايىن وتكىزىلەدى. چەمپيوناتتى ۇيىمداستىرعان WorldSkills International قاۋىمداستىعى تەحنيكالىق ماماندىقتاردى كاسىبي دايارلاۋدىڭ مارتەبەسى مەن ستاندارتتارىن ارتتىرۋ ماقساتىندا جۇمىس ىستەيدى. بۇگىندە قاۋىمداستىققا 72 ەل مۇشە بولىپ وتىر. قازاقستان بۇل قاتارعا 2014 جىلى قوسىلدى.
وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتى ديرەكتورىنىڭ ورىنباسارى اقزيرا قاسىموۆا بۇگىندە WorldSkills International ۇيىمىنا مۇشە ەلدەردە كادرلاردى كاسىبي دايارلاۋ ستاندارتتارى جەتىلدىرىلىپ جاتقانىن ايتتى. «بۇل تىزىمدە ءبىز دە بارمىز. قازىر WorldSkills چەمپيوناتتارىنا قاتىسۋشىلاردى دايىنداۋ, ولاردىڭ بىلىكتىلىكتەرىن ارتتىرۋ ماقساتىندا ءتيىستى جۇمىستار جۇرگىزىلىپ جاتىر. بۇل جولعى جارىسقا بارماس بۇرىن دا 28 قاتىسۋشى دايىندىقتان ءوتتى», دەدى ول.
ەسكە سالا كەتەيىك, مەملەكەت باسشىسىنىڭ تاپسىرماسىنا سايكەس, 2025 جىلى 9-سىنىپتان كەيىن وقۋشىلاردى 100 پايىز قاجەتتى ماماندىقتارمەن دايارلاۋ كوزدەلىپ وتىر. قازىر بۇل تاپسىرما 80 پايىزعا ورىندالدى.
