فوتو: اشىق دەرەككوز
مەملەكەت باسشىسى بيىلعى جولداۋدا: «...كامەلەتكە تولماعاندارعا جاسالعان زورلىق-زومبىلىقتىڭ كەز كەلگەن تۇرىنە قاتىستى جازانى كۇشەيتۋدى تالاپ ەتەمىن», دەپ ناقتى ايتقان ەدى. پرەزيدەنتتىڭ بۇل ماسەلەگە قايتا توقتالۋى قوعام ءۇشىن ۇلكەن دابىل دەي كەلە, دەپۋتات بۇل ماسەلەنى سوڭىنا دەيىن جەتكىزۋ ءۇشىن پارتيا بار كۇش-جىگەرىن سالاتىنىن ايتتى.
بالالار كورگەن ءزابىر مەن جانتۇرشىگەرلىك قىلمىس كوبەيگەنىن ايتقان ول حالىقتىڭ ەتى مۇنداي قىلمىستارعا ۇيرەنىپ كەتپەۋى كەرەك ەكەنىن باسا ايتتى.
وعان قوسا, دەپۋتات جىل سايىن ەلىمىزدە بالالارعا قارسى 2000-عا جۋىق قىلمىس جاسالاتىنىن, بۇل وتە قورقىنىشتى ستاتيستيكا ەكەنىن جەتكىزدى. جىل سايىن 4 مىڭنان استام بالا بەيىمدەۋ جانە وڭالتۋ ورتالىقتارىنا جەتكىزىلەتىنى, سونداي-اق 150-گە جۋىق ءسابي قاراۋسىز قالىپ, كوپقاباتتى ۇيلەردىڭ تەرەزەسىنەن قۇلاپ كەتەتىنى دە ايتىلدى.
«ماسەلەنىڭ پرەزيدەنت دەڭگەيىنە دەيىن كوتەرىلۋى – جاعدايدىڭ راسىمەن دە ۋشىعىپ كەتكەنىن كورسەتەدى», دەدى ول.
ەلنۇر بەيسەنباەۆ سوڭعى كەزدەرى وقۋشىلاردى زورلاۋ وقيعالارى جيىلەپ كەتكەنىن ايتىپ دابىل قاقتى. ونىڭ ايتۋىنشا, مۇنداي قىلمىس جاساعاندارعا «بوستاندىعىن شەكتەۋ» دەگەن جازا قولدانۋ ءتيىمسىز.
«قىلمىسكەردى بوستاندىققا جىبەرىپ, ونىڭ تاعى باسقا قىلمىس جاساۋىنا ءوزىمىز جاعداي جاساپ بەرەمىز. سارىاعاشتىڭ جىبەك جولى اۋىلىنداعى كىشكەنتاي ەركەجاننىڭ ءولىمى وسى سوزىمە دالەل بولا الادى. سونداي-اق اتا-انا قامقورلىعىنسىز قالعان بالالاردىڭ كوبىرەك ءزابىر كورەتىنى دە ءمالىم. وگەي اكە-شەشە تاراپىنان زورلىق-زومبىلىقتىڭ ءجيى بولۋى – الەۋمەتتىك قورعاۋدا جۇيەلى جۇمىستىڭ جوقتىعىن كورسەتەدى. ۋچاسكەلىك ينسپەكتورلاردىڭ, كامەلەتكە تولماعان بالالارمەن اينالىساتىن مامانداردىڭ جۇمىسىنا سىن كوپ», دەدى ءماجىلىس دەپۋتاتى.
دەپۋتاتتىڭ سوزىنشە, بۇل ماسەلەنىڭ ءبىر ۇشى قوعامنىڭ سالعىرتتىعىنا دا كەلىپ تيەدى.
«قوعام دا بەي-جاي قاراماۋى كەرەك. ماسەلەن, الماتىدا وگەي اناسىنىڭ قولىنان قايتىس بولعان 7 جاسار كارينانىڭ جانۇشىرا ايقايلاعان داۋىسىن كورشىلەرى ەستىسە دە, ەشبىرى ارا تۇسپەگەن. كەشە عانا الماتى قالاسىندا 44 جاسار اكەسى 2 جىل بويى ءوز قىزىنا كورسەتكەن زورلىعى ءۇشىن 20 جىلعا عانا سوتتالدى. مۇنداي قىلمىسكەرلەر ءومىر بويىنا باس بوستاندىعىنان ايرىلۋى كەرەك جانە ولارعا مەديتسينالىق كاستراتسيا جاسالۋعا ءتيىس. بۇل – اكسيوما», دەدى دەپۋتات.
زاڭ بار, بىراق ورىندالۋى ءالسىز ەكەنىن ايتقان ەلنۇر بەيسەنباەۆ ۇكىمەت پەن اكىمدىك تاراپىنان اتقارىلۋى كەرەك جۇمىستاردى دا تىزبەكتەپ ءوتتى.
«قوعامداعى بۇل قىلمىستىڭ ءبارى ءبىزدىڭ بالالارعا قارسى جاسالىپ جاتىر. AMANAT پارتياسىنىڭ فراكتسياسى بۇل ماسەلەنى ءوز نازارىندا ءجىتى ۇستايتىن بولادى. وسى رەتتە, ءبىزدىڭ فراكتسيا زاڭ جوباسىنا قاجەتتى وزگەرىستەرتى ەنگىزىپ, تاعى دا قاتاڭداتانىن جەتكىزەمىز. دەگەنمەن, ۇكىمەت پەن اكىمدىك تاراپىنان الدىن-الا جاسالاتىن جۇمىستار بار. ناقتى ايتقاندا, بالالاردىڭ تەرەزەدەن قۇلاۋ فاكتىلەرىنە بايلانىستى اكىمدىكتەر, كسك تاراپىنان ءتۇسىندىرۋ جۇمىستارى كۇشەيتىلۋى ءتيىس. وتباسىنداعى ىشىمدىككە نەمەسە ەسىرتكىگە سالىنعان ازاماتتاردىڭ بارلىعى قاتاڭ باقىلاۋعا الىنۋى ءتيىس. ولارمەن پروباتسيالىق جۇمىستاردى جۇيەلى دەڭگەيدە وتكىزۋ ماڭىزدى. بالا قاۋىپسىزدىگىن ساقتاۋدا بارلىق مەملەكەتتىك ورگاندار بىرلەسىپ, جۇيەلى ءارى جىلدام جۇمىس جاساۋى قاجەت», دەپ تۇيىندەدى ەلنۇر بەيسەمباەۆ.
