قاسىم-جومارت توقاەۆقا «QazaqGaz» ۇك» اكتسيونەرلىك قوعامى 2022 جىلدىڭ باسىنان باستاپ اتىراۋ, ماڭعىستاۋ وبلىستارى مەن الماتى قالاسىندا ءوز قاراجاتى ەسەبىنەن سوماسى 400 ميلليارد تەڭگە بولاتىن ينۆەستيتسيالىق جوبالاردى ىسكە اسىرعانى جونىندە باياندالدى.
بىلتىر جىل باسىنان بەرى ۇلتتىق كومپانيا حالىق پەن بيزنەس ءۇشىن گاز باعاسىن 389 ميلليارد تەڭگەگە سۋبسيديالادى. وسى كەزەڭدە 450 مىڭعا جۋىق قازاقستاندىق تابيعي گازعا قول جەتكىزدى.
مەملەكەت باسشىسىنا گاز تاپشىلىعى ماسەلەسىنىڭ شەشىلۋىنە قاتىستى مالىمەت بەرىلدى. سانجار جاركەشوۆتىڭ ايتۋىنشا, قابىلدانعان شارالار الداعى كۇزگى جانە قىسقى كەزەڭدە قازاقستاندا تابيعي گازبەن ارتىعىمەن قامتاماسىز ەتەدى.
سونىمەن قاتار قاسىم-جومارت توقاەۆقا بەينەۋ – بوزوي – شىمكەنت ماگيسترالدى گاز قۇبىرىنىڭ ەكىنشى جەلىسىنە قاتىستى جوبانىڭ جۇزەگە اسىرىلۋ بارىسى جانە قىتاي حالىق رەسپۋبليكاسىمەن جاڭا ەكسپورتتىق كەلىسىمشارتقا قول قويىلۋى جونىندە اقپارات بەرىلدى.
بۇدان بولەك, پرەزيدەنتكە گاز سالاسىنىڭ ورتا مەرزىمدى ستراتەگياسىن جۇزەگە اسىرۋ, گاز وڭدەۋ قۋاتىن ۇلعايتۋ جانە ەلىمىزدى ودان ءارى گازبەن قامتاماسىز ەتۋ پەرسپەكتيۆالارى جونىندە مالىمەت بەرىلدى.
مەملەكەت باسشىسىنا گازدىڭ رەسۋرستىق بازاسىن كەڭەيتۋ جۇمىستارى تۋرالى دا باياندالدى. «QazaqGaz» ۇك» اق توراعاسىنىڭ ايتۋىنشا, 2023 جىلدىڭ سوڭىنا دەيىن جاڭا اناباي گاز كەن ورنى ىسكە قوسىلادى, سونداي-اق پريدوروجنوە كەن ورنىن يگەرۋگە دايىندىق باستالدى.
كەزدەسۋ سوڭىندا قاسىم-جومارت توقاەۆ ىشكى نارىققا گاز جەتكىزۋدى تۇراقتى تۇردە قامتاماسىز ەتۋگە, جىلىتۋ ماۋسىمىنا ۋاقتىلى دايىندالۋعا, ۇنەمدى تۇتىنۋ تۇجىرىمداماسىن ەنگىزۋگە جانە باعا بەلگىلەۋ ءىسىن رەفورمالاۋعا باعىتتالعان بىرقاتار تاپسىرما بەردى.
