كۇننىڭ قۇبىلۋى كۇزگى ناۋقاندا قولبايلاۋ بولىپ وتىر

«ەگىن جيناۋ ناۋقانىندا فەرمەرلەر ءۇشىن استىقتى كەپتىرۋگە قاجەتتى ديزەل وتىنىنىڭ قولجەتىمدىلىگى, اۋا رايىنىڭ قولايسىزدىعىنان زارداپ شەككەن فەرمەرلەردىڭ نەسيەلەرىن ۇزارتۋ, سۋبسيديالار بويىنشا قارىزداردى جابۋ ماسەلەلەرى وزەكتى بولىپ وتىر. 

قازاقستاننىڭ نەگىزگى استىق ەگەتىن وڭىرلەرى – قوستاناي, پاۆلودار, سولتۇستىك قازاقستان, اقمولا وبلىستارىندا سوڭعى ەكى اپتادا جاۋىن-شاشىن تولاستاماي تۇر. قازگيدرومەتتىڭ بولجامى كوڭىل كونشىتپەيدى: جاۋىن-شاشىن 17 قىركۇيەككە دەيىن جالعاسىپ, اياز تۇسەدى, سونىڭ سالدارىنان سولتۇستىك وڭىرلەردە جاڭا ءداننىڭ ءونىپ كەتۋى جانە ىلعالدىڭ جوعارىلىعىنان ساپاسىنىڭ تومەن بولۋ قاۋپى بار. 

ءبىرىنشى شارا – استىقتى قابىلداۋ كاسىپورىندارى مەن كارانتيندىك قىزمەتتەر استىقتى قابىلداۋ كەزىندە تاۋلىك بويى جۇمىس ىستەيتىن بولادى. سونداي-اق قتج كومپانياسىمەن استىق تاسىمالدايتىن ۆاگونداردى ۋاقىتىلى جەتكىزۋ ماسەلەسى پىسىقتالادى. بۇگىنگى تاڭدا ەلىمىزدە ەلەۆاتورلاردىڭ جالپى سىيىمدىلىعى 29,9 ملن توننانى قۇرايدى, ونىڭ ىشىندە استىق قابىلداۋ كاسىپورىندارىندا – 13,1 ملن توننا جانە اۋىل شارۋاشىلىعى وندىرۋشىلەرىندە – 16,8 ملن توننا. بۇل وتكەن جىلداردان قالعان ءونىم مەن بيىل ورىلاتىن ەگىندى ساقتاۋعا جەتكىلىكتى.

ەكىنشى شارا – استىقتى كەپتىرۋ ءۇشىن قوسىمشا ديزەل وتىنىن ءبولۋ. شەشىم ەنەرگەتيكا مينيسترلىگىمەن بىرلەسىپ قابىلداندى. ءتيىستى نورماتيۆتىك قۇقىقتىق اكت ازىرلەنىپ, قازىر ءتيىستى ورگاندارمەن كەلىسىلىپ جاتىر. يگەرىلمەگەن ديزەل وتىنىنىڭ قولدا بار قورى جەتكىلىكتى بولماق. ال استىق وڭدەۋشىلەر مەن ليتسەنزياسى بار ەلەۆاتورلارعا قوسىمشا كولەم بولىنەدى.

ءۇشىنشى شارا – قارجى ينستيتۋتتارى مەن ازىق-ت ۇلىك كورپوراتسياسى شارۋالارعا نەسيەلەر مەن ليزينگتەردى تولەۋ مەرزىمىن ۇزارتۋ ماسەلەلەرىن ەگجەي-تەگجەيلى پىسىقتايدى. «بايتەرەك» حولدينگىنىڭ قارجىلىق ۇيىمدارى تاراپىنان قولايسىز اۋا رايىنان زارداپ شەككەن فەرمەرلەردىڭ نەسيە مەن ليزينگ مەرزىمدەرىن ۇزارتۋعا بەرىلگەن ءاربىر ءوتىنىشى جەكە تارتىپپەن قارالادى. 

ءتورتىنشى شارا – قوسىمشا سۋبسيديالار بويىنشا بورىشتاردى جابۋ ماسەلەسىن جەدەلدەتۋ. قوسىمشا قاجەتتىلىك 171 ملرد تەڭگەنى قۇرايدى. بۇل قاراجاتتى ءبولۋ كەزىندە قولدا بار جانە قوسىمشا بولىنگەن قارجىنىڭ ۋاقىتىلى يگەرىلۋىن قامتاماسىز ەتۋ, سونداي-اق تۋىندايتىن پروبلەمالاردى شەشە وتىرىپ, قىسقا مەرزىمدە سۋبسيديالاۋدىڭ اقپاراتتىق جۇيەسىن دايىنداۋ قاجەت. 

بەسىنشى شارا – كەلەسى جىلعا فەرمەرلەر ءۇشىن ساپالى تۇقىم قورىن قۇرۋ. ول ءۇشىن «قازاگرەكس» ازىق-ت ۇلىك كورپوراتسياسىمەن بىرلەسىپ, قويمالاردا قالعان استىقتىڭ وتكەن جىلعى قورلارىنا زەرتتەۋ جۇرگىزەدى. ولار بارلىق تالاپ ەتىلەتىن ساپالىق سيپاتتاماعا سايكەس كەلسە, ازىق-ت ۇلىك كورپوراتسياسى 2022 جانە 2023 جىلدارداعى ەگىننىڭ استىعىن بولەك ساقتاۋ ەسەبىنەن ساپالى تۇقىم قورىنىڭ ساقتالۋىن قامتاماسىز ەتەدى», دەپ جازىلعان حابارلامادا.

8 قىركۇيەككە دەيىنگى مالىمەت  بويىنشا 4,8 ملن گەكتار جەر ورىلعان, بۇل جالپى ەگىس القابىنىڭ 28%-ى. ورتاشا ونىمدىلىگى گەكتارىنا 10 تسەنتنەردەن دەپ ەسەپتەگەندە قامباعا 4,8 ملن توننا استىق  قۇيىلعان.