فوتو: استانا قالاسىنىڭ اكىمدىگى
شاباندوزدار 1 300 شاقىرىم قاشىقتىقتا جارىساتىن مارافون-بايگە 19 قىركۇيەك كۇنى تۇركى الەمىنىڭ رۋحاني استاناسى – تۇركىستان قالاسىندا مارەسىنە جەتەدى.
جورىق قاتىسۋشىلارىن شىعارىپ سالۋ ءىس-شاراسىنا مارافون-بايگەگە ۇيىتقى بولعان ۇلتتىق سپورتتىڭ جاناشىر ازاماتتارى – «AMANAT» پارتياسىنىڭ اتقارۋشى حاتشىسى داۋلەت كارىبەك, قر تۋريزم جانە سپورت مينيسترلىگىنە قاراستى سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى بەكبولات بايجانوۆ, قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, «JORYQ» ات سپورتى فەدەراتسياسى قامقورشىلىق كەڭەسىنىڭ توراعاسى الىبەك الدەنەي قاتىستى.
«كەشە عانا ۇلتتىق سپورت تۇرلەرى بويىنشا VI فەستيۆالدىڭ رەسمي اشىلۋىن وتكىزدىك. ال بۇگىن بارشامىز ەكىنشى رەت ۇيىمداستىرىلىپ وتىرعان « ۇلى دالا جورىعىنىڭ» باستالۋ سالتاناتىنا جينالىپ تۇرمىز. ۇلتتىق سپورت قاۋىمداستىعى 2 جىل قاتارىنان سەرىكتەس بولىپ, « ۇلى دالا جورىعى» جوباسىن قولداپ وتىر. ۇلتتىق سپورتىمىز اتا-بابالارىمىزدان بىزگە قالعان اسىل مۇراسى جانە اماناتى. ۇلتتىق سپورتتىڭ ارتىندا ۇلتىمىزدىڭ رۋحى مەن نامىسى, تاريحى مەن سالت-ءداستۇرى تۇر.
ۇلتتىق سپورتىمىز – ەلىمىزدى بىرىكتىرەتىن نەگىزگى فاكتورلاردىڭ ءبىرى.
مەملەكەت باسشىسى قاسىم-جومارت كەمەل ۇلى توقاەۆ ۇلتتىق سپورتتىڭ دامۋى مەن ناسيحاتتالۋىنا ەرەكشە نازار اۋدارىپ وتىر. « ۇلى دالا جورىعى» الەمدە جوق رەسپۋبليكالىق مارافون-بايگە. بۇگىن وسى بايگەگە ەلىمىزدىڭ بارلىق ايماعىنان 100-دەن استام شاباندوز قاتىسىپ جاتىر. ولار 14 كۇندە 1300 شاقىرىم جەردى شاۋىپ وتەدى. استانادان باستالعان بايگە تۇركىستاندا مارەسىنە جەتەدى. مەن بارلىق شاباندوزعا ساتتىلىك تىلەيمىن!», دەدى يسلامبەك سالجانوۆ.
ايتا كەتسەك, بايگەنىڭ جالپى جۇلدە قورى – 65 ملن تەڭگە. جەڭىمپاز كومانداعا 30 ملن تەڭگە, 2-ورىنعا 20 ملن تەڭگە, ال 3-ورىنعا 15 ملن تەڭگە تابىستالادى.
ءوز كەزەگىندە «JORYQ» ات سپورتى فەدەراتسياسى قامقورشىلىق كەڭەسىنىڭ توراعاسى الىبەك الدەنەي جورىقتىڭ بۇل جولى دا جوعارى دەڭگەيدە وتەتىنىنە سەنىمدى ەكەنىن جەتكىزدى.
«تاۋەلسىزدىككە قول جەتكىزىپ, ەگەمەندى ەل بولعالى قازاقستاندا ۇلتتىق سپورت تۇرلەرى جوعارى قارقىنمەن دامىپ كەلەدى. ۇلتتىق سپورتتىڭ ارتىندا ۇلتتىق قۇندىلىق تۇر. جورىق ءبىزدىڭ ەلىمىزدىڭ سالت-ءداستۇرىن ناسيحاتتاپ, وتكەنى مەن بۇگىنىن جالعايتىن تاماشا جوبا. مارافون-بايگەگە قاتىسىپ وتىرعان بارلىق شاباندوزعا ساتتىلىك تىلەيمىن! ساتتىلىك سەرىك بولسىن!», دەدى قامقورشىلىق كەڭەسىنىڭ توراعاسى.
مارافون-بايگەنىڭ ۇيىمداستىرۋشىسى عاني دۇيشەنوۆتىڭ ايتۋىنشا, جورىق بارىسىن 2 حالىقارالىق جانە 2 قازاقستاندىق سۋديا باعالاسا, ال جول بويى اتتاردىڭ جاعدايىن 2 حالىقارالىق جانە 3 قازاقستاندىق مال دارىگەرى قاداعالايدى.
«جورىق 14 كەزەڭنەن تۇرادى. ءبىرىنشى كەزەڭ – 50 شاقىرىم. ودان كەيىن 12 كەزەڭدە 100 شاقىرىمدى ءجۇرىپ وتەدى. شاباندوزدار سوڭعى 14-كەزەڭدە تاعى 50 شاقىرىم جولدى باعىندىرىپ, تۇركىستاندا مارەگە جەتەدى. جورىققا اتىراۋ وبلىسىنان باسقا بارلىق ءوڭىردىڭ كوماندالارى قاتىسىپ جاتىر. بارلىعى مارافون-بايگەگە ساقاداي ساي. كەشە اتتار ۆەتەريناريالىق تەكسەرۋدەن ءوتتى», دەدى عاني دۇيشەنوۆ.
بۇگىن ءبىرىنشى كەزەڭنىڭ ۇزدىكتەرى دە انىقتالدى. ءبىرىنشى كەزەڭنىڭ 50 شاقىرىمىن العاش بولىپ جامبىل وبلىسى 2 ساعات 23 مينۋت, 37 سەكۋندتا باعىندىردى. ەكىنشى ورىن سولتۇستىك قازاقستان وبلىسىنىڭ ەنشىسىندە. ولاردىڭ ناتيجەسى – 2 ساعات, 57 مينۋت, 04 سەكۋند. ال جەتىسۋ وبلىسىنىڭ كومانداسى ۇزدىك ۇشتىكتى 2 ساعات, 58 مينۋت, 32 سەكۋند ۋاقىتپەن تۇيىندەدى.
