فوتو: https://www.akorda.kz/
1. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ شاقىرۋىمەن 2023 جىلعى 6-8 قىركۇيەكتە البانيا رەسپۋبليكاسىنىڭ پرەزيدەنتى بايرام بەگاي قازاقستان رەسپۋبليكاسىنا رەسمي ساپارمەن كەلدى.
2. مەملەكەتتەر باسشىلارى جىلى, دوستىق جانە ىسكەرلىك سيپاتتا كەلىسسوزدەر جۇرگىزىپ, ديپلوماتيالىق قاتىناستاردىڭ 30 جىلىندا قول جەتكىزىلگەن قازاق-البان قاتىناستارىنىڭ دامۋ ناتيجەلەرىنە جوعارى باعا بەردى. قازاقستان مەن البانيا اراسىنداعى بايلانىستار دەڭگەيىن ودان ءارى كوتەرۋگە, ءتۇرلى سالالارداعى ىنتىماقتاستىقتى تەرەڭدەتۋگە ۋاعدالاسىپ, ءوزارا قىزىعۋشىلىق تۋدىراتىن وڭىرلىك جانە حالىقارالىق كۇن تارتىبىندەگى ماسەلەلەر بويىنشا پىكىر الماستى. پرەزيدەنتتەر ەكى ەل اراسىنداعى ساياسي جانە ەكونوميكالىق ىنتىماقتاستىقتىڭ جوعارى ديناميكاسىن قۇپتادى.
3. تاراپتار جاھاندىق جانە وڭىرلىك دەڭگەيدە بەيبىتشىلىكتى, قاۋىپسىزدىك پەن تۇراقتىلىقتى نىعايتۋعا جاردەمدەسۋگە دەگەن نيەتتەرىن ءبىلدىردى. ولار حالىقارالىق قۇقىققا جانە بۇۇ جارعىسىنىڭ نەگىزگى قاعيداتتارىنا قاتىستى ۇستانىمدارىنىڭ مىزعىمايتىنىن اتاپ ءوتتى. وسىعان بايلانىستى تاراپتار الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا بۇۇ وڭىرلىك ورتالىعىن جانە بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋ تۋرالى قازاقستاننىڭ باستامالارىن جوعارى باعالادى.
4. مەملەكەت باسشىسى البانيانى 2022-2023 جىلدار ارالىعىندا بۇۇ قاۋىپسىزدىك كەڭەسىنە تۇراقتى ەمەس مۇشە بولۋىمەن قۇتتىقتادى.
5. تاراپتار ەكى ەلدە جۇرگىزىلىپ جاتقان رەفورمالاردى جانە قازاقستان مەن البانيا حالىقتارىنىڭ ءال-اۋقاتىن ارتتىرۋعا باعىتتالعان تۇراقتى ىشكى ساياسي جانە الەۋمەتتىك-ەكونوميكالىق دامۋ جونىندەگى شارالاردى جوعارى باعالادى.
6. مەملەكەتتەر باسشىلارى ورتالىق ازيادا ترانسكاسپي حالىقارالىق كولىك باعىتىن دامىتۋعا قاتىستى اۋقىمدى باستامالاردىڭ ىسكە اسىرىلۋىنا قاناعاتتانۋشىلىق ءبىلدىردى.
7. تاراپتار ءوز ەلدەرىنىڭ ەكونوميكالىق دامۋى ءۇشىن ينۆەستيتسيالىق ساياساتتىڭ اشىقتىعىن, تۇراقتىلىعىن ءارى بولجامدى بولۋىن ودان ءارى ارتتىرۋعا دايىن ەكەنىن ءبىلدىرىپ, ينۆەستورلار ءۇشىن تۇراقتى, اشىق جانە بولجامدى ىسكەرلىك ورتانى قامتاماسىز ەت ءۇشىن كۇش-جىگەر جۇمساۋدى جالعاستىرۋعا, سونداي-اق ءوزارا تيىمدىلىكتى جۇزەگە اسىرۋ ءۇشىن ىنتىماقتاستىق جوبالارىنا بىرلەسىپ جاردەمدەسۋگە جانە ينۆەستورلاردىڭ قۇقىقتارى مەن مۇددەلەرىن قامتاماسىز ەتۋگە كەلىستى.
8. تاراپتار ەكى ەل اراسىندا تىكەلەي اۋە قاتىناسىن اشۋعا جانە اۆياتسيالىق رەيستەر مەن باعدارلار سانىن ودان ءارى ۇلعايتۋعا مۇددەلىك تانىتتى.
9. مەملەكەتتەر باسشىلارى 2022 جىلعى 22 قىركۇيەكتە نيۋ-يورك قالاسىندا قول قويىلعان ۆيزالىق تالاپتاردان ءوزارا بوساتۋ تۋرالى ەكى ەلدىڭ ۇكىمەتارالىق كەلىسىمىنىڭ كۇشىنە ەنۋىن قاناعاتتانۋشىلىقپەن اتاپ ءوتىپ, اتالعان قۇجاتتى ىسكە اسىرۋعا, ادامداردىڭ ءجۇرىپ-تۇرۋى ءۇشىن بارىنشا قولايلى جاعداي جاساۋدى ىنتالاندىرۋعا جانە كوشى-قون سالاسىنداعى ىنتىماقتاستىقتىڭ نورماتيۆتىك بازاسىن كەڭەيتۋگە باعىتتالعان شارالاردى زەردەلەۋگە ءازىر ەكەنىن ءبىلدىردى.
10. تاراپتار ەكى ەلدىڭ وڭىرلەرى اراسىنداعى ءارتۇرلى سالاداعى ىنتىماقتاستىقتى قولداپ, قازاقستان مەن البانيا حالىقتارىنىڭ اراسىنداعى بايلانىستاردى بەكەمدەۋ ءۇشىن ەكى ەلدىڭ ىنتىماقتاستىق الەۋەتىن نىعايتا تۇسەتىن ەلوردالار مەن باسقا قالالاردىڭ باۋىرلاستىق قاتىناستار ورناتۋىن قۇپتادى.
11. پرەزيدەنتتەر مادەنيەت سالاسىنداعى ىنتىماقتاستىقتى ارتتىرۋعا نيەت ءبىلدىرىپ, الداعى جىلدارى بىرلەسكەن ءىس-شارالار وتكىزۋگە باعىتتالعان باستامالاردى قولدادى.
12. مەملەكەتتەر باسشىلارى كەلىسسوزدەر بارىسىندا قول جەتكىزىلگەن ۋاعدالاستىقتار ءارتۇرلى سالاداعى ەكىجاقتى ىنتىماقتاستىقتى ودان ءارى دامىتۋعا تىڭ سەرپىن بەرەتىنىنە جانە قازاقستان مەن البانيا حالىقتارىنىڭ مۇددەلەرىنە قىزمەت ەتەتىنىنە سەنىم ءبىلدىردى.
