وقۋعا تۇسە الماي قالعان تالاپكەرلەرگە گرانت يەگەرى اتانۋعا بىرنەشە مۇمكىندىك بار. سولاردىڭ ءبىرى – وسى يگەرىلمەگەن گرانتتار. جىل سايىن ەڭبەك جانە حالىقتى الەۋمەتتىك قورعاۋ مينيسترلىگى, «اتامەكەن» ۇلتتىق كاسىپكەرلەر پالاتاسى جانە مەملەكەتتىك ورگاندار كادرلار قاجەتتىلىگى بويىنشا ۇسىنعان رەسمي اقپارات نەگىزىندە مەملەكەتتىك ءبىلىم بەرۋ تاپسىرىسى ورنالاستىرىلادى. سول بويىنشا بيىل 88 204 گرانت بولىنگەن. گرانتتاردىڭ باسىم بولىگى «ينجەنەرلىك, وڭدەۋ, قۇرىلىس سالالارى», «پەداگوگيكالىق عىلىمدار», «اقپاراتتىق-كوممۋنيكاتسيالىق تەحنولوگيالار», «جاراتىلىستانۋ عىلىمدارى, ماتەماتيكا جانە ستاتيستيكا» ءبىلىم بەرۋ باعدارلاما توپتارىنا بەرىلگەن. ال يگەرىلمەي قالعان گرانتتار قايتا بولىنەدى.
تالاپكەرلەردىڭ كوكەيىندە «يگەرىلمەگەن گرانتتارعا قالاي ىلىگە الامىز, ول ءۇشىن نە ىستەۋ كەرەك؟» دەگەن سۇراق تۋىنداعانى تۇسىنىكتى. الايدا يگەرىلمەگەن گرانتتى ۇتىپ الۋعا ەشقانداي قۇجات تاپسىرۋدىڭ قاجەتى جوق. ويتكەنى ول ۇلتتىق بىرىڭعاي تەستىلەۋ ناتيجەسى بويىنشا اۆتوماتتى تۇردە بەرىلەدى. كىمنىڭ باعى جانارى ۇپايىنا بايلانىستى. تالاپكەرلەرگە تەك كونكۋرس ناتيجەسىن كۇتۋ كەرەك.
ء«بىز جىل سايىن ءبىلىم بەرۋ باعدارلامالارى بولىنىسىندە مەملەكەتتىك ءبىلىم بەرۋ تاپسىرىسىن بەكىتۋ بارىسىندا ەڭبەك جانە حالىقتى الەۋمەتتىك قورعاۋ مينيسترلىگى ۇسىناتىن اناليتيكالىق ەسەپتى نەگىزگە الامىز. بيىل مەملەكەتتىك ءبىلىم بەرۋ تاپسىرىسىنىڭ 95,3 پايىزى يگەرىلدى. يگەرىلمەگەن گرانتتار جالپى كونكۋرس بويىنشا قايتا ۇيلەستىرىلىپ, ۇبت ناتيجەسىندە جوعارى ۇپاي جيناعان, بىراق جازداعى كونكۋرس قورىتىندىسىندا گرانت يەگەرى اتانباعان تالاپكەرلەرگە بەرىلەدى», دەدى عىلىم جانە جوعارى ءبىلىم مينيسترلىگىنىڭ باس ساراپشىسى كۇلاش ۇسەنوۆا.
مينيسترلىكتىڭ مالىمەتىنشە, قازىرگى ۋاقىتتا ءتيىستى بۇيرىققا وزگەرىس ەنگىزۋ جۇمىستارى جۇرگىزىلىپ, بوس گرانتتاردى قايتا ءبولۋ ماسەلەسى قاراستىرىلىپ جاتىر. ناتيجەسى قىركۇيەك-قازان ايلارىندا بەلگىلى بولادى.
