«وسىمدىك شيكىزاتى نەگىزىندە سيىر ءسۇتىنىڭ الماستىرعىشتارى ءوندىرىسىن قۇرۋ» جوباسىن عىلىم قورى ارقىلى وندىرىسكە ەنگىزۋ جانە كوممەرتسيالاندىرۋ قولعا الىندى. كوممەرتسيالاندىرۋ جوباسى اياسىندا وسىمدىك شيكىزاتىنان ءسۇت الماستىرعىشتاردى شىعاراتىن قۇرال-جابدىق ساتىپ الۋ, جاڭا ءوندىرىستى ۇيىمداستىرۋ, ازىرلەنگەن تەحنولوگيالاردى وندىرىسكە ەنگىزۋ جۇمىستارى جۇزەگە اسىرىلىپ جاتىر.
– جاڭا ونىمدەردىڭ نارىقتاعى ارتىقشىلىعى كوپ. ايتالىق, يمپورتتىق ونىمدەردى الماستىرادى. سونداي-اق بيوتەحنولوگيالىق ادىستەردى قولدانا وتىرىپ جوعارى ساپاعا قول جەتكىزۋگە, قوسىمشا ميكروەلەمەنتتەرمەن بايىتۋعا مۇمكىندىك بەرەدى. دايىن ءونىمنىڭ قۇرامىن جانە سۇرانىسقا بايلانىستى نىسانالى ماقساتىن رەتتەۋ مۇمكىندىگى پايدا بولادى. اللەرگيامەن اۋىراتىندار مەن ورتالىق جۇيكە جۇيەسىنىڭ سىرقاتى بار ادامدار ءۇشىن قاۋىپسىز, كونسەرۆانتتارى جوق, دارۋمەندەرمەن بايىتىلعان ءونىم الىنادى. ونىڭ ۇستىنە قازىر ۋنيۆەرسيتەت ەلىمىزدەگى جالعىز ءوندىرۋشى سانالادى. الدىن الا ەسەپتەۋلەر بويىنشا جاڭا ءونىمنىڭ وزىندىك قۇنى نارىقتاعى يمپورتتىق انالوگتەردەن ەكى-ءۇش ەسە تومەن. سونىمەن قاتار ءونىمنىڭ ەكسپورتتىق الەۋەتى بار: 100 توننا ءونىم جەتكىزۋ ءۇشىن قىتايداعى «Shaanxi Xingkailong Trading Co» جشس-مەن الدىن الا كەلىسىم جاسالدى, – دەيدى بيولوگيا عىلىمدارىنىڭ كانديداتى, جوبا جەتەكشىسى گۇلنازىم وسپانقۇلوۆا.
عالىمنىڭ ايتۋىنشا, قازىر ءسۇت ونىمدەرىنىڭ ىشىندەگى ەڭ كوپ تۇتىنىلاتىنى – بادام, س ۇلى جانە سويادان الىنعان ءسۇت ونىمدەرى. ەلىمىزدە وسىمدىك شيكىزاتىنان الىناتىن ءسۇت نارىعى قارقىندى ءوسىپ كەلەدى. يمپورتتىق وسىمدىك ءسۇتىن ساتىپ الۋ 2021 جىلى 2020 جىلمەن سالىستىرعاندا 50 پايىزعا وسكەن. لاكتوزاعا توزبەۋشىلىگى بار تۇتىنۋشىلار كۇننەن-كۇنگە كوبەيىپ, دامدىك تالعامدار وزگەرىپ جاتىر. سوندىقتان وسىمدىك نەگىزىندەگى ءسۇت ونىمدەرىنە سۇرانىس ارتىپ كەلەدى. بۇعان قوسا, وسىمدىك ءسۇتى لاكتوزاسىز يوگۋرت پەن بالمۇزداق ءوندىرىسىنىڭ شيكىزاتى بولا الادى ءارى قۇرعاق تۇرىندە بوتقاعا قوساتىن ينگرەديەنت رەتىندە قولدانىلادى. بۇل لاكتوزاعا اللەرگياسى بار تۇتىنۋشىلار مەن ۆەگەتارياندىقتار ءۇشىن ماڭىزدى.
