فوتو: gov.kz
ءبىر عاسىردان استام تاريحى بار تۇركىستان وبلىستىق تاريحي-ولكەتانۋ مۋزەيى جادىگەرلەردى جيناقتاپ, ساقتاپ, كوپشىلىككە تانىستىرىپ, كەڭىنەن ناسيحاتتاپ كەلە جاتىر.
اتالعان كورمە مۋزەي قورىنداعى جادىگەرلەر نەگىزىندە كيەلى تۇركىستاننىڭ بۇگىنگى جاڭعىرۋى مەن جەتىستىكتەرىن حالىققا تانىستىرۋ, ناسيحاتتاۋ ماقساتىندا ۇيىمداستىرىلىپ وتىر.
كورمەنى وبلىستىق مادەنيەت جانە تۋريزم باسقارماسىنىڭ باسشىسى ءازىمحان قويلىباەۆ اشىپ بەردى.
«ۇلتتىق رۋحىمىزدىڭ ءبىر تارماعى اتا-بابا مۇراسى مەن ونەگەسىن كەيىنگى ۇرپاققا تانىتۋدا مۋزەيدىڭ الاتىن ورنى ەرەكشە. وتكەنگە قۇرمەتپەن قاراپ, بۇگىنگى كۇندى قادىرلەپ, كەلەشەكتىڭ قامىن ويلاۋ – باستى مىندەتىمىز. جالپى مۋزەي – تاريحي-عىلىمي دەرەكتەردى, كونە زامان ەسكەرتكىشتەرىن, ولاردىڭ ۇلگى نۇسقالارىن, ونەر تۋىندىلارىن, مادەني قۇندىلىقتاردى, مۇرالاردى زەرتتەپ جيناقتاۋشى, ساقتاۋشى ءارى بۇل مۇرالاردى ۇرپاقتان-ۇرپاققا جەتكىزە وتىرىپ, سولاردىڭ نەگىزىندە جاستارعا جالپى قوعام مۇشەلەرىنە ءتالىم-تاربيە, بەرەتىن مادەني جانە رۋحاني مەكەمە. سوندىقتان ەكى اي بويى جالعاساتىن كوشپەلى كورمەنىڭ ماڭىزى زور», دەدى باسقارما باسشىسى.
تۇركىستان وبلىسى اكىمدىگىنىڭ ءباسپاسوز قىزمەتىنىڭ اقپاراتىنشا وسى كۇندەرى وبلىستاعى مۋزەي قورىندا 170 مىڭنان استام رۋحاني قۇندىلىق ساقتالعان. ولاردىڭ باسىم بولىگىن ارحەولوگيالىق, ەتنوگرافيالىق ەكسپەديتسيالار ناتيجەسىندە جيناقتالعان بىرەگەي جادىگەرلەر قۇرايدى. اتاپ ايتساق, قازاقتىڭ سوڭعى حانى كەڭەسارىنىڭ قىلىشى, اتاقتى قازاق بالۋانى قاجىمۇقاننىڭ قارا ءۇيى, ۇلى كومپوزيتور ءشامشىنىڭ جەكە زاتتارى, حالىق قاھارماندارى, سوعىس, تىل, ەڭبەك ارداگەرلەرى, سپورت, ءبىلىم, مادەنيەت سالاسىنىڭ دامۋىنا ءوز ۇلەسىن قوسقان ازاماتتاردىڭ دا جەتىستىگىن ايقىندايتىن جادىگەرلەر بار.
كەڭەيتىلگەن كوشپەلى كورمەگە تۇركىستان وبلىسىنداعى رەسپۋبليكالىق «ازىرەت سۇلتان», «وتىرار» مەملەكەتتىك تاريحي-مادەني مۋزەي-قورىقتارىنىڭ, «ورداباسى» ۇلتتىق تاريحي-مادەني قورىعى, وبلىستىق مادەنيەت جانە تۋريزم باسقارماسىنا قاراستى 24 مۋزەي قاتىسادى.
ايتا كەتسەك, مۋزەيلەر شەرۋى 1 قىركۇيەك پەن 29 قازان ارالىعىندا, اپتانىڭ جۇما, سەنبى, جەكسەنبى كۇندەرى وتەدى.
