مەملەكەت باسشىسى اتاپ وتكەندەي, ۇيلەسىمدى تۇلعا مەن جاۋاپتى ازاماتتى قالىپتاستىرۋ نەگىزدەرى بالالىق شاقتا قالانادى. ەلدەگى ءاربىر بالانىڭ باقىتتى جانە قاۋىپسىز بالالىق شاعى بولۋى كەرەك.
سونداي-اق جولداۋدا وسكەلەڭ ۇرپاقتىڭ پسيحيكالىق دەنساۋلىعى ماسەلەسى دە كوتەرىلدى. ددۇ مالىمەتتەرى بويىنشا, پسيحيكالىق دەنساۋلىقتىڭ بۇزىلۋى 10-19 جاس ارالىعىنداعى ادامدار اراسىنداعى بارلىق جاھاندىق اۋرۋلار مەن جاراقاتتاردىڭ 16 پايىزىن قۇرايدى.
پسيحيكاداعى كىناراتتار نەگىزىنەن 14 جاسقا دەيىن پايدا بولادى, بىراق مۇنداي جاعدايلار كوبىنەسە انىقتالمايدى جانە ەمسىز قالادى. ءجاسوسپىرىم كەزدەگى پسيحيكالىق دەنساۋلىقتىڭ بۇزىلۋىن ەلەمەۋ ەرەسەك جاستا جالعاساتىن, فيزيكالىق جانە پسيحيكالىق دەنساۋلىققا تەرىس اسەر ەتەتىن, سونداي-اق تولىق ەرەسەك ءومىر ءسۇرۋ مۇمكىندىكتەرىن شەكتەيتىن سالدارعا اكەلۋى مۇمكىن.
2021 جىلى 3 298 رەسپوندەنتتى قامتىعان الەۋمەتتىك زەرتتەۋ جۇرگىزگەن ەدىك. زەرتتەۋ ناتيجەلەرىنە سايكەس ءاربىر 5-ءشى قازاقستاندىق ءجاسوسپىرىم بۋللينگتىڭ قۇربانى نەمەسە قاتىسۋشىسى بولادى. مەكتەپتە بۋللينگكە ۇشىراعان بالالار باسقا بالالارعا قاراعاندا وزدەرىن ەكى ەسە جالعىز سەزىنەدى, تۇندە ۇيىقتاي المايدى جانە ساباققا قاتىسپايدى.
پرەزيدەنتتىڭ ءبىلىم بەرۋ مەكەمەلەرىندە پسيحولوگيالىق قولداۋ قىزمەتىن كۇشەيتۋ, بىرىڭعاي سەنىم تەلەفونىن ۇيىمداستىرۋ جانە زورلىق-زومبىلىق پەن بۋللينگ قۇرباندارىنا كومەك كورسەتۋدىڭ پارمەندى باعدارلاماسىن ازىرلەۋ سەكىلدى بۇل سالاعا ناقتى تاپسىرمالار بەرگەنىنە وتە قۋانىشتىمىز.
دينارا سادۋاقاسوۆا,
رەسپۋبليكالىق «جاس ۇلان» بىرىڭعاي بالالار مەن جاسوسپىرىمدەر ۇيىمىنىڭ توراعاسى
