«مەملەكەتتىك قولداۋ شارالارىن ءوندىرىستىڭ تەحنولوگيالىق كۇردەلىلىگىنە جانە بيزنەستىڭ ناقتى تۇرىنە قاراي جىكتەۋ ماڭىزدى. ونىڭ وپەراتسيالىق تيىمدىلىگى جوعارى بولۋى دا وتە ماڭىزدى. سوندىقتان «بايتەرەك» حولدينگىنىڭ قۇرىلىمىن وزگەرتىپ, ونى كەڭ اۋقىمدا تسيفرلاندىرعان ءجون. ەكسپورتتى ۇلعايتۋعا ايرىقشا ءمان بەرۋ كەرەك. ونىڭ ءادىس-تاسىلدەرى بولعانىمەن, جۇيەلى ۇستانىم جوق», دەدى پرەزيدەنت.
وسى ورايدا ول KazakhExport كومپانياسى ەكسپورتتى دامىتاتىن تولىققاندى ينستيتۋتقا اينالاتىنىن ايتتى. كومپانياعا وسى مىندەتتى اتقارۋعا قاجەتتى قۇزىرەت بەرىلەدى.
بۇدان بولەك, مەملەكەت باسشىسى «وتباسى بانكتىڭ» قىزمەتىن قايتا قاراۋ كەرەك ەكەنىن ايتتى. باستى نازار وبلىس ورتالىقتارىنا ەمەس, اۋداندارعا, مونو-قالالارعا جانە اۋىلدارعا اۋدارىلادى.
«باسەكەلەستىك دامىماسا, بيزنەس تە وركەندەمەيدى. بۇل – ايدان انىق. قازىر نەگىزگى سالالاردىڭ كوبىندە بىرنەشە ءىرى كاسىپورىن باسىمدىققا يە بولىپ وتىر. بۇل جاعداي نارىقتاعى شىنايى احۋالدى كورسەتە المايدى», دەدى ق.توقاەۆ.
