«بارشاڭىزدى كەزەكتى سەسسيانىڭ اشىلۋىمەن قۇتتىقتايمىن! جاۋاپتى قىزمەتتەرىڭىزگە تابىس تىلەيمىن!
كوكتەمدەگى سايلاۋدان كەيىن پارلامەنتتەگى ساياسي پارتيالاردىڭ قاتارى كوبەيدى. دەپۋتاتتار قۇرامى ايتارلىقتاي وزگەردى. ساياسي پارتيالاردىڭ فراكتسيالارى, ءبىر مانداتتى وكرۋگتان سايلانعان دەپۋتاتتار دا جۇمىسقا بەلسەنە كىرىستى. ولار كوپتەگەن زاڭ جوباسىنا باستاماشىلىق ەتىپ, وزەكتى ماسەلەلەردى باتىل كوتەرە باستادى. دەپۋتاتتارىمىز جازدا دا كوپ جۇمىس اتقاردى. نەبارى ەكى ايدا 1200-دەن استام ەلدى مەكەندى ارالاپ, سايلاۋشىلارمەن كەزدەستى, تۇرعىنداردىڭ تىنىس-تىرشىلىگىمەن تانىستى. مەن بارشاڭىزعا تابىستى قىزمەتتەرىڭىز ءۇشىن شىنايى ريزاشىلىعىمدى بىلدىرەمىن. جاڭا سەسسيادا جۇمىس قارقىنى بۇدان دا جوعارى بولادى دەپ ويلايمىن», دەدى مەملەكەت باسشىسى.
پرەزيدەنتتىڭ ايتۋىنشا, جىل سايىنعى جولداۋ جاقسى داستۇرگە اينالدى. وسى تۇستا قاسىم-جومارت توقاەۆ بيىلعى جولداۋدىڭ ايرىقشا ءمانى بار ەكەنىن اتاپ ءوتتى.
«بارشاڭىزعا ءمالىم, مەن جىل سايىن حالىققا جولداۋىمدى پارلامەنت سەسسياسىنىڭ اشىلۋىندا جاريالايمىن. بۇگىندە بۇل جاقسى داستۇرگە اينالدى. مۇنىڭ ايرىقشا ءمانى بار. سەبەبى ءدال وسى ساتتە جانە ءدال وسى جەردە بيلىك تارماقتارىنىڭ بارلىق وكىلدەرى باس قوسادى. الداعى ورتا مەرزىمدىك جۇمىستىڭ باعىت-باعدارى ايقىندالادى. ناقتى تاپسىرمالار بەرىلەدى, جاڭا مىندەتتەر جۇكتەلەدى. پارلامەنت, ۇكىمەت جانە باسقا دا قۇزىرلى ورگاندار تىڭ قارقىنمەن ىسكە كىرىسەدى. ءبىر سوزبەن ايتساق, مەملەكەتتىك اپپاراتتىڭ ۇيلەسىمدى ءارى ءتيىمدى جۇمىس ىستەۋى ءۇشىن بۇل ءىس-شارا وتە ماڭىزدى. بۇگىندە مەنىڭ باستامالارىمنىڭ باسىم كوپشىلىگى جۇزەگە استى. بىرقاتار جۇمىس جالعاسىپ جاتىر», دەدى قاسىم-جومارت كەمەل ۇلى.
ەسكە سالا كەتسەك, جولداۋدى www.akorda.kz رەسمي سايتىنان, Facebook جانە Youtube جەلىسىندەگى Aqorda پاراقشاسىنان تىكەلەي ەفيردە كورۋگە بولادى.
