فوتو: ۇكىمەتتىڭ ءباسپاسوز قىزمەتى
تاراپتار ءبىرىنشى جارتىجىلدىقتاعى ەكىجاقتى تاۋار اينالىمىنىڭ قارقىنىن, ترانزيتتىك-كولىك سالاسىنداعى بىرلەسكەن جوبالاردى جۇزەگە اسىرۋدى, قازاقستان مەن قحر اراسىندا ءوزارا مادەني ورتالىقتاردى اشۋدى, 2024 جىلى قىتايدا قازاقستاننىڭ تۋريزم جىلىن ۇيىمداستىرۋدى جانە بىرقاتار باسقا دا تاقىرىپتى قاراستىردى.
پرەمەر-مينيستر ەلدەر اراسىنداعى ساۋدا-ەكونوميكالىق ىنتىماقتاستىق تۇراقتى دامىپ كەلە جاتقانىن اتاپ ءوتتى. ماسەلەن, بىلتىر ءوزارا ساۋدا 34%-عا ءوسىپ, رەكوردتىق كورسەتكىشكە – $24 ملرد-قا جەتتى. ءبىرىنشى جارتىجىلدىقتىڭ وزىندە ول 20%-عا ارتىپ, $13,6 ملرد قۇرادى. سونىمەن قاتار 2030 جىلعا قاراي ەكىجاقتى ساۋدا كولەمىن $35 ملرد-قا دەيىن جەتكىزۋ بويىنشا جۇمىستار جالعاسىپ جاتىر.
ءاليحان سمايىلوۆ بۇگىندە قازاقستاننان قىتايعا شيكىزاتتىق ەمەس تاۋارلاردى جەتكىزۋ كولەمىنىڭ ارتقانى بايقالاتىنىن اتاپ ءوتتى. اتاپ ايتقاندا, بيىل پلاستماسسا بۇيىمدارىن, مەتالل كونسترۋكتسيالارىن, ۇن, كونديتەرلىك جانە ماكارون ونىمدەرىن جەتكىزۋ باستالدى.
ء«بىز جەتكىزىلەتىن تاۋارلار مەن قىزمەتتەر نومەنكلاتۋراسىن كەڭەيتۋىمىز جانە ەلدەرىمىزدىڭ ىسكەر توپتارى اراسىندا كوبىرەك تىكەلەي بايلانىس ورناتۋىمىز قاجەت دەپ سانايمىن. وسىعان بايلانىستى ءبىز قىتايعا 135 تاۋار پوزيتسياسى بويىنشا $1 ملرد-قا جۋىق شيكىزاتتىق ەمەس ەكسپورتتى ۇلعايتۋعا دايىن ەكەنىمىزدى مالىمدەيمىز», دەدى ول.
ۇكىمەت باسشىسى ينۆەستيتسيالىق ىنتىماقتاستىقتىڭ ماڭىزدى ەكەنىن باسا ايتتى. قىتاي ءداستۇرلى تۇردە قازاقستان ەكونوميكاسىنا ينۆەستور قۇيۋشى ەلدەردىڭ توپ-5 قاتارىنا كىرەدى. سوڭعى 17 جىلدا قىتايدان كەلگەن ينۆەستيتسيانىڭ جالپى كولەمى $23,5 ملرد-قا جەتتى.
«ينۆەستيتسيا كولەمىن ارتتىرۋ بويىنشا ۇلكەن الەۋەت بار ەكەنىن كورىپ وتىرمىز. ءبىز قىتايدىڭ ينۆەستيتسيالىق قوعامداستىعىن بىرلەسكەن جوبالارعا كەڭىنەن قاتىسۋعا شاقىرامىز», دەدى ءاليحان سمايىلوۆ.
ءوز كەزەگىندە قحر-نىڭ قازاقستانداعى ەلشىسى قىتاي حالىق رەسپۋبليكاسىنىڭ توراعاسى سي ءتسزينپيننىڭ قازاقستانعا مەملەكەتتىك ساپارى بارىسىندا استانادا جاريالاعان ء«بىر بەلدەۋ, ءبىر جول» باستاماسىنا بيىل 10 جىل تولاتىنىن ەسكە سالدى.
«قازاقستان بۇل باستاماعا العاشقىلاردىڭ قاتارىندا قوسىلىپ, ونى جۇزەگە اسىرۋعا بەلسەندى تۇردە اتسالىستى. باستاما اياسىندا كوپتەگەن جۇمىس اتقارىلدى. بۇگىندە ءبىزدى 11 تەمىر جول جانە اۆتوموبيل جولدارى, ءۇش مۇناي-گاز قۇبىرى جانە «قورعاس» شەكارا ماڭى ىنتىماقتاستىعى ورتالىعى بىرىكتىرىپ وتىر. كەز كەلگەن سەرىكتەسىمىز قول جەتكىزگەن جەتىستىكتەرىمىزگە قىزىعا قارايدى دەپ ايتساق, ارتىق ەمەس. بيىلعى جىل دا ەكىجاقتى قارىم-قاتىناستاردى دامىتۋ تۇرعىسىنان جەمىستى بولماق», دەدى چجان سياو.
سونداي-اق ول قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قىتايعا مامىر ايىنداعى ساپارىنىڭ تاريحي ماڭىزدىلىعىن اتاپ ءوتتى, ونىڭ بارىسىندا بىرقاتار ماڭىزدى مەملەكەتارالىق كەلىسىمگە قول جەتكىزىلدى.
«بۇگىنگى كۇنى ءبىزدىڭ الدىمىزدا تۇرعان باستى مىندەت – بارلىق قول جەتكىزىلگەن ۋاعدالاستىقتاردى جۇزەگە اسىرۋ», دەدى قىتايدىڭ قازاقستانداعى ەلشىسى.
